ظيطة الحجاب و مزايدة الوطني ع الاخوان

انا شايف من وجهه نظري يعني .. ان الضجة اللي اثيرت حول تصريح فاروق حسني عن الحجاب .. ماهي الا ظيطة ..

كل واحد ما صدق انه يزايد فيها و اتخذوا من الوزير كبش فداء امام الرأي العام.. اهم يضاربو فالدين شوية عشان يبقوا ناس بتوع ربنا مش الاخوان لوحدهم يعني و بعدين ما الراجل قدم استقالته قبل كدا .. لكن و بما ان محدش عندنا بيخرج اصلا عشان يخرج بمزاجه فلازم العقد و الكلاكيع تطلع عليه ..يعني زي ما جابه ..هو برده اللي يمشيه .. و بالطبع ميقدرش حد يقف جنبه في موضوع زي دا و إلا وضع نفسه امام عجلات الاخوان و بالتالي سخط الرأي العام.

.

و المواضيع اللي الدين جانب فيها بتكون من الحاجات اللي الحكومة و الحزب الوطني يحبها اوي و ما بيصدق يشبط فيها الايام دي بالذات.. ليؤكدوا مدى تمسكه بالدين و انهم ناس بتخاف ربنا ... طيب ياخوانا ياللي كلمة الوزير عن الحجاب حرقاهم اوي .. مايشوفو حرم رئيس البلد ...ولا يشوفو تليفزيون البلد نفسه و اللي فتليفزيون البلد و شوارع البلد ... ليه مذيعتين القناه الخامسة معرفوش يشتغلوا بعد ما تحجبوا الا بحكم قضائي من المحكمة ؟!!! مش كدا اللي منعهم بيحاب الحجاب برده ؟! ولا ساعتها مكانش فيه اخوان عشان كله يزايد !!

شوية كمان و هتلاقي الريس طلعتله زبيبه صلاه في قورتة .. ماهو لسه كان بيقولك انه .. لا ينحني الا لله ...-طبعا لمشاكل فالغضروف مش اكثر بحكم السن و كده- ... سيبك من اللي بيحصل لرضاء امريكا و اسرائيل دا مش انحناء دا حاجة شبيهه بالانحناء و اسمه حاجة تانيه .و أهو منه تحذير للمعارضة انه -لامؤاخذه- مبيوطيش لاي ضغوط و منه انك تعرف ان الراجل يعرف ربنا و بيخاف منه و بينحنيله .. هو و الحكومة و الحزب كذلك و محدش احسن من حد و كلنا مسلمين يا معلم و كمان يرفض طلب باصدار قرار جمهوري بمنع النقاب ..و اهو كله بيصب في صالحة.

الدين ليه فعل السحر عند الشعوب البسيطة مثل التي تنتمي لهذا البلد ... عندك مثلا علاء مبارك و كل ما حوله من اقاويل ... هب يختفي و ينتشر بين الناس انه استقام و اطلق لحيته ... و عليه.. فامريكا خايفه ليوصل للحكم ولا حاجة فميظهرش للجماهيرعشان ميكونش ليه شعبيه ... و شوف رد فعل كل واحد بعد ما يسمع اشاعة زي دي .. يمكن تلاقي 80% يظهر تعاطفه معاه و يتحول السخط اللي كان نتيجة ما يسمعه عنه من سلوك سئ الى تعاطف و حب و تأييد ...

زي ما السادات عمل شخصية الرئيس المؤمن .. و اهو ياخد شعبيه و الاسلاميين في صفه و يسيبهم يتعاملوا مع قوى اليسار ساعتها. ماهو تربيته صحيح.

و سيظل الدين رايه يلوح بها كل من يريد ان تسير وراءه الشعوب

لأ و يجي زكريا عزمي يقول أن السيدات والفتيات اللائي شاركن في حملة الرئيس مبارك الانتخابية كن من المحجبات وكمان كمال الشاذلي اشار أن زوجته وبناته يرتدين الحجاب .. يا سلام و هم من اهل البيت يعني ... طيب يا اخي اضرب المثل بحد عِدل.