ناس تروح المريخ و ترجع بالسلامة و ناس تروح قليوب و مترجعش ولا داعي لذكر السلامة و كلة بأمره.
في خبر كدا من فترة عن السياحة الفضائية كاتبين ان انوشة انصاري الامريكية من اصل ايراني هتكون اول واحده لا مؤاخذة يعني سايحة و تتفسح فالفضاء وبتاع ... و رابع حد يجرب موضوع السياحة الفضائية كدا بعد المقاول الامريكي دنيس تيتو اول سائح فضاء في العالم ابريل - 2001. وبعدية الجنوب افريقي مارك شوتلورث ابريل 2002 ثم الامريكي جريج اولسين اكتوبر -2005 .. و هتتبعهم ست انوشة فـ 14 سبتمبر 2006 الجاي دا يعني.
و الرحلة دي بتتكلف حوالي 20 مليون دولار و دا اللي يخلي الواحد ميستغربش من رجوعهم من غير ولا خدش و كلة بامرة بردة ... انما عشرة ايام يتدفع فيهم 20 مليون دولار !! مش كتير شوية !
دا عندنا فمصر بيقطعوا بعض عشان يدبرو كام مية جنية عشان يروحو المصيف ولا يتفسحوا .. و القطر يولع بيهم و لا السفينة تغرق ولا الاتوبيس ولا الميكروباص يتقلب و جايز كمان قبل ما يوصلوا .. اللهم لا اعتراض يعني... و عادي بئا ما في كتير منهم.
بس اللي يدفع 20 مليون دولار فخروجة .. يبئى معاه كام يا ترا!! دا مش حسد ولا حاجة .. دا أر.
مش عارف ايه شعور ثنية و عبد التواب لما بيشوفو الاخبار دي .. مش عارف مين ثنية و عبد التواب ... بس اكيد عبد التواب دا موظف يعني .. اكيد هيقولها .. شايفة الحريم يا ولية رايحة تتفسح 10 ايام ...و بـ20 مليون دولار(مش متاكد هيذكر موضوع الفلوس دا لا لأ )... مش انت .. مش فالحة غير عايزة ازور امي و هات فلوس ... طبعا ثنية هتتذكر الذكريات الجميلةو دمعتها على خدودها .. لما كانت بتشد حلة المحشي و يروحو يقعدو فالجونينة .
انما بمناسبة ان أنوشة اول حرمة تتفسح فالفضاء ... مش كان واجب تاخد معاها جوزها بردة .. صباح البيعة يعني:( ... و لو مش متجوزة تاخد محرم و تقطعلة مرافق.
و بمناسبة انها امريكية من اصل ايراني يعني احتمال كبير تكون مسلمة ... هتعرف منين القبلة !! ولا مواقيت الصلا بتوقيت المريخ ولا الزهرة! و هتتوضى ازاي من الحاجات اللي ربساها ... لا يا عم دي حوسة .. انا مش رايح .. بيقولو يمكن فترة كدا و السفر -برا خالص- يرخص يبئى 19 - 18 مليون كدا... اهو ساعتها الواحد ممكن يفكر.
تخيلوا الموضوع دا لو وصل عندنا فمصر ...اكيد مش هيحصل قبل سنة 3752 ويوم ما يكونو بيحتفلوا بالثورة بئا يروحو مطلعين اتوبيس و لا اتوبيسين القمر و اكيد هيخبطلة فقمر صناعي ولا نيزك معدي و يتقلب ... ماهو الفقر ورانا و رانا
4 comments:
7elwa :)
:D
we 2a7la law kont sharaftena b nafsak.
ma3alena ... kelmetak b el donya ..
sharaftena ya rayes
يا ساتر يا أخي على العين الوحشة..أهو البنية شكلها لا هتروح و لا تيجي من أرك ده و النيزك هيضرب رحلتها هي:)
إحنا رحلاتنا خاصة جدا يا إما يخبط فيه مكوك و يطلع السواق مختل عقليا يا إما يحصل عطل و يكونوا اللي في المحطة بيتفرجوا على مباراة انبي و فريق من كوالا لامبور ومش عارفين ايه اللي بيحصل فوق
دا مش ار ولا حاجة يا ارابيسك هانم ..تقدري تقولي حدقد كدا مثلا.
و بعدين حتى لو طلعوا المحطة يعني ... هيتفرجو عالماتش ازاي ... دا الواحد بيكون الاريال بتاع التليفزيون على سطح مبنى الاذاعة و الفلزيون. جنب الاريال بتاعهم كمان و الارسال الماتشات بالذات بيقطع. يقومو يتفرجو عليها فالمحطة!
Post a Comment