تناول العديد من الصحف و الجرايد و المدونيين و مواقع الأخبار و برامج التليفزيزن و كل اللي بيكتوبوا و بيتكلموا عموما , عن موضوع الجزم -جمع جزمة- لانة و على مدار اسبوعين فاتوا ظهرت على الساحة السياسية و الرياضية جزمتين جداد يضافوا لتاريخ مصر من الجزم فى العصر الحديث ...
طبعا الجميع تناولة لأنة في قمة المسخرة و مادة كويسة للإستلام والسخرية... و هناك من جاب لمصر القديم و الجديد ... و ظهرت جزم مكانش الواحد يسمع عنها حاجة ... و على اي حال فالواحد اصبح مطمئن على مستقبل الجزمة في مصر .. و لو انك نظرت للجزمة بالخارج فاعتقد ان اول ما سيظهر كنتيجة لعملية السيرش اللي عملتها في دماغك هتكون جزمة السندريلا و الساعة 12 و كدا ;)... شوف الفرق بين رائحة الرومانسية اللي طالعة من جزمة السندريلا و الرائحة اللي طالعة من حكايات جزم المصريين :-$
فعندك جزم من ايام محمد على .. و من ايام الفراعنة - بس ساعتها كان شبشب بصباع- و كان ليه دور فعال بردو , دا غير القباقيب ايام شجرة الدر.
و طبعا من اشهر الجزم الجزمة الشهيرة التى ضرب بها عبد الرازق السنهوري باشا . كاتب الدستور في عهد الثورة .
ثم مرة واحده شاهدنا عودة قوية للجزمة .. في البرلمان بين طلعت السادات و الحليوة احمد عز و بين مرتضى و عبد الوهاب في مقصورة الاستاد و كلمة المرشد المشكوك فيها انة هيضرب المعارضة بالجزمة في حالة وصول الاخوان للحكم...
و طبعا الجزمة غير مقصورة على الاوساط دي بس ... لكنها متداولة بيننا نحن العامة بكثرة .. اتذكر مرة عندما سأل صديق لي صديق آخر عن باسورد اليوزر الفلاني... فقالة يابن الجزمة .. التاني استغرب و قالة في ايه يلا ! قالة الباسورد يابن الجزمة ! ... المهم بعد مداولات عرف انة يقصد ان الباسورد ( يابن الجزمة) ... و حاجة اسعدتني جدا جدا بردو ... ان الزعماء مسلموش من الجزمة .. ففي ايام حديث احد الزعماء العرب لقناة العربية .. قال كلام كدا معجبش الشيعة ... فاذا بمقالات انتقاد و ردود في المنتديات الخليجية خاصة كانت تدخلت فيها الجزمة بكثرة ... اكثرها انتشار ساعتها و اللي عجبني .. كان ( حسني مبارك .. عليك الجزمة ) ..
يلا عالبركة ... بس مش عارف ليه المواقع دي كلها متقفلتش و الناس اللي كتبوا الكلام دا متشدوش ليه على طره بتهمت سب الرئيس و تكدير الراي العام -بسبب ريحة الجزمة- و تعطيل حركة المرور عالانترنت.
5 comments:
اية الحلاوة دى يا مصطفى ...بس بصراحة مجهود رائع واكثر من رائع يا عم احمد
انت اصلا فاكرنى ولا لا؟
انا محمد السعيد افتكرتنى ؟؟؟ ...
عيب عليك يا ريس ...طبعا فاكرك
شكرا لمرورك الكريم
جميل يامصطفي بس انت منفض كده ليا
ماتدولنا كام بوست كده حلوين وماتغبش عنا
والله يا مصطفى اكيد الحاجات دى مقفلتش عشان فى حرية فى البلد ( اكتموا الضحكة يمكن بنتراقب !! )
هو التعبير عن الرأى كمان هيستكتروه علينا ؟
د.احمد
يااه ايه النور دا كلة .. شكرا لكل اللي عدا خصوصا الحبايب .
و آسف على الغيبة دي .. الواحد ملوش نفس يعمل اي حاجة اصلا .. قرف ملل زهق !
Post a Comment