تحقيق

تحقيق

الأسم : مسحول مواطن مسحول
السن : 25 سنة طوارئ
التهمة : المشيان فالشارع و الانضمام لتنظيم محظور و الترويج لأفكار متطرفة

س: كنت بتعمل ايه لما قفشناك ؟

ج: كنت ماشي فالشارع

س: هل سبق لك و مشيت فالشارع قبل كدا؟

ج: يا سلام ! طبعا كتير

س: هل قمت بهذا من تلقاء نفسك .. ام ان هناك من حرضك على ذلك ؟

ج : حرضني ! .. لأ عادي يعني ..هو عيب ولا حاجه؟

حضظابط : أكتب يابني : و قد اعترف المدعو مسحول مواطن مسحول بعد المواجهه بأنه كان ماشي فالشارع .. عالحجز يا عسكري.

اللي بعدووووو

الأسم: مقهور مواطن مظلوم ... بنفس القضيه

حضظابط ... : زميلك اعترفلنا أنكو كنتو ماشيين فالشارع سوا ...س: حصل الكلام دا؟

ج: حصل يا باشا.

س:كان فيه حد غيركو ؟

ج: آه طبعا .. كتير

س: الله .. دانتو تنظيم بئه ؟

ج : تنظيم !!! تنظيم ايه يا باشا ... داحنا غلابة .

س: انتو ... تقصد مين بـ"احنا "دي؟؟

ج: احنا يا باشا ... شعب مصر .. ما لشعب كلو بيمشي فالشارع.

حضظابط : أكتب يابني .. و قد اعترف مقهور مواطن مقهور بأنه عضو تنظيم جديد يدعى شعب مصر .. و سيتم حبسه على زمه التحقيق ..عالحجز .

ربنا عالظالم

الأسم : عبده روقااااان

السن :مش فاكر

بنفس القضيه ..

س: انضميت امتى للتنظيم ؟

ج : تنظيم .. تنظم ايه يا باشا ؟!!!

س : انت هتستعبط ياروح امك ..أمال ايه اللي مشاك فالشارع ؟

و يكون في علمك .. زمايلك قايلين على كل حاجة ..

ج: هما مين دوول .. ؟!! معرفهمش يا باشا.

س: امال طلعت تجري ليه ؟؟ و يكون في علمك الانكار مش في صالحك

ج : اخ .. بص يا باشا ..انا هقول على كل حاجه .. بس بشويش .

انا اتفقت مع الولا حمو على مغربي نضيف و وصاية و اديته 220 جنيه .. ضحك عليا و جابلي مصري مخلوط معفن ياباشا و البنجو دا مش بتاعي ... و الله برئ يا بيه .. الذنب ذنب صحابي هما لرموني عليه

حضظابط : خلاص .. خلاص .. يخلى سبيل المتهم بضمان محل إقامته .. و يستدعى كشاهد فالقضيه.

عبده : مين انا ؟

الظبوط: امال امي يلا.

عبده : امشي يعني ؟!! اروح ؟

في ايه يلا ... انت عبيط ولا حاجة؟

عبده : لا يا باشا .. بس انا قاعد فالشارع .. و انت بتقول بضمان محل اقمتك ..

الظبوط : لما نعوذك هنعرف نجيبك.

عبده : يعني امشي كدا من غير حاجه ؟!

الظبوط : ايوه.... اتفضل

عبده :!!! انا ماشي

الظبوط : متغور يابن الكلب

الأسم : عبد الله المدقوق

معاهم بنفس القضيه

س: تعرف ايه عن تنظيم شعب مصر ؟

ج : هو تنظيم ؟! لا أعلم

س: و النبي ايه ... دانت باين عليك من المؤسسين

ج : حاش لله

س : اتكلم عربي يا عم الله يخليك ... و تقدر تفسرلي ايه اللي كان ممشيك فالشارع ؟

ج : كنت في طريقي للمنزل عائد من المسجد

س: مسجد ! و كنت بتعمل ايه فالمسجد ان شاء الله؟

ج: !! كنت بصلي المغرب

س: بتصلي ! استغفر الله ... و ايه علاقتك بالناس اللي فالمسجد دا و الناس اللي ماشيه فالشارع ؟

ج :أخوه فالاسلام

حضظابط :و قد تبين من التحقيقات بأنه اما امير التنظيم او واعظهم الديني و محرضهم ... يحجز على زمه التحقيقات.

الأسم : بوسي دندشه ... بنفس القضيه

س : و انت ان شاء الله معاهم فالتنظيم ؟

ج : تنظيم ايه يا خويا .. و ربنا دنا مابروح هنا ولا هنا

و بحب الريس و ابنه ... و ستنا خديجه

س:و اللي بيحب الريس يمشي فالشارع بردو؟ كنتي بتعملي ايه فالشارع؟

ج :!!! كنت بجيب حاجه من الصيدلية اللي على اول الشارع و طالعة

س: حاجة زي ايه كدا ؟

ج : هه !

س: ايه الحاجة دي ؟

ج : حاجة يا باشا ... هما كدا كدا خادوها مني

س: احم .. هي دي الحاجة ؟

ج : آآه

يفرج عن المتهمة بضمان الحاجة ...مع الف الف سلامة