خليفه خلف خلف الله خلف خلاف
إما ان الزهايمر تملك من هذا الرجل ...او انه عنيد ... و إللي بيعاند بيعاند نفسه .. و اللي بيشيل قربه مخرومه بتخر عليه ..
أياً كان محتواها
هذا الرئيس المحترم-أشك- لم و لن (على رأي ابنه) ترى أي بوادر او إرهاصات ... و لا إرهاصة واحده لتنفيذ أي كلمة تفط من فمه.
و المصيبه انك مثلا مش تلاقي تجاهل أو انكار لما قاله ... لاااأ تجد سبحان الله كدا يتم تنفيذ عكسه تماما.
فرئيسنا عِكس عِكاس يتحدث دائما عن محدودي الدخل و يتحفنا بقوله ان محدودي الدخل في المرتبه الأولى من أهتماماته و تجد الدعم يرفع تدريجيا و الأسعار في ارتفاع مستمر و أختفاء سلع مع توفير بديل بسعر أعلى (حركات قرعه) و عمل مشاريع لا تعود عليهم بأي فائده بل تنغص عليهم حياتهم و تقيدهم بمصاريف و فواتير و أقساط جديده ... كل هذا و يقولك في المرتبه الأولى من اهتماماته ... طب ياريت تبقى تحط مشمع عشان واضح ان المرتبه اتبلت يا ريس.
الرئيس المخالف يمطر جميع الناس و الفئات بالوعود .. اكثرهم تحنيثا الصحفيين.
وعوده للصحفيين لا حصر لها ...من حرية الصحافة و الصحافة المستقلة و قانون منع الحبس في قضايا النشر و عهد لم يقصف فيه قلم و و و
و لم يصدر قانون منع الحبس حتى الآن .. و عالنقيض تماما يحبس الصحفيين و يرسل لهم برسائل التهديد و الوعيد و يهتك عرض الصحفيات و تعتيم اعلامي و يسيب صحافة الإخوان الموالسين على الصحفيين المحترمين أصحاب الفكر المستقل.
و عن الإصلاحات السياسية و التعدديه الحزبية و الحراك السياسي و حرية الاحزاب و بسم الله ما شاء الله أكبر حزبين معارضة رؤسائهم فالسجن .
تلفيق قضايا و دس الدسائس و تجميد أحزاب و أعتقال النشطاء ... و يدعو الشباب للمشاركة السياسية و بدلا من العزوف عنها ... و لما حد يشترك يتحبس .. الله عليك
دا حتى أعطى للمواطن كامل حريته و الدليل تمديد العمل بقانون الطوارئ ... لجل ما المواطن ياخد راحته كمان و كمان ...و يطلعلك المحروس لرفع ضغطنا و يقول ..ان قانون الطوارئ لا يعيق حرية المواطن ... مين؟! امال بيعيق ايه ؟!! دا لا نافع مع تجار مخدرات اللي ازدهرت تجارتهم في ظله... ولا نافع مع ارهابيين الي بيفتكسو كل جديد و يتكتكو و هو شغال ... والواضح انه لحمايه النظام و الاسره الحاكمة لا أكثر...
و طبعا منسيش يطبق قاعده خلف خلاف على حرية التعبير ... فقمعت المظاهرات و اعتقل المتظاهرين.
و اصبح يجب عليك كي تتظاهر ان تخرج تصريح مظاهره ... تورح كدا زي الشاطر تديهم صورة البطاقه و اسامي و عناوين اللي هيتظاهروا و ربنا يوفق بئا..
ربنا يوفق و يخلف اكتر و اكتر .. دا ختى سيادته قال انه لن يرحم المفسدين و سيضرب بيد من حديد باين و لن يكون هناك تستر على المفسدين ... و توماتيكي بئه ماحنا عرفنا ... تلاقي الفساد و الفسده رايحين جايين فالبلد و اللي السارق سارق و الناهب ناهب و ابواب المطار مفتوحه امامه للهرب و شبابيك المجلس للحصانه و بيع بابخس الاسعار و صفقات مشبوهه و سلملي على محاربه الفساد.
كوووول اللي بيحصل دا .. و تفاجأ بالموالسين يخرجون مره واحده في زفه موالسه و يطل علينا كل منهم إحدى ابواق الحكومة معاه طبلتة و الشخاليل ليعزفوا لنا اوركيسترا موالسه إنما ايه .. تمااااام
عندما ترى ذلك.. تتذكر انه قال انا بقول للموالسين ...العبو غيرها .. طب ماهم لعبوها و حصلوا على ما يريدو ... من مناصب
صرح بسلامته انه لا يريد ان تتدخل الدولة لحل أزمة القضاه ... الله !أمال مين اللي كان محاصر وسط البلد؟ و مين اللي ضرب و سحل القضاه و حاصرهم في ناديهم ؟ و مين اللي سحل المواطنين المتضامنين ؟ و هتك عرض و اعتقل البنات ؟ و ضرب الصحفيين ؟ ... الظاهر انه بيتكلم عن دولة منغوليا .اخ نسيت .. دا تطبيق للقاعده -خلف خلاف-
خلاص بئا ماحنا فهمنا ...
يوم ماتقول انك قررت ان تتنحى .. نعلم جيدا انك تنوى التمديد لفتره سادسة
No comments:
Post a Comment