من كام يوم اثناء عبوري من امام التليفزيون .. لفت نظري احتفال قناة الجزيرة بالسنة العاشرة ليها .. فقعدت اتفرج و انشكحت جدا من منظر المذيعين و هما متجمعين مع بعض بمحاورة احمد منصور و هم يدعبسون في حلقات برامج و نشرات و مواجيز الاخبار بتوع السنوات العشر و ما بها من مواقف لذيذة .. و ما زادني انشكاحا و فخرا بهذه المؤسسة العظيمة حقا .. حاجة زي فيلم تسجيلي كدا عن مواقفها و مواقف الغير تجاهها اثناء حرب افغانستان و العراق و احداث 11 سبتمر و غير ذلك ... و ما حدث لمراسليها و مكاتبها و اتهام جميع اطراف اي مشكلة -من ضارب و مضروب- بالعماله و الخيانة و عدم الحيادية بانحيازها للطرف الآخر و طبعا دعم الارهاب .. فعندما تجد الصحاف و رامسفيلد كلاهما يتهمها بالانحياز للطرف الآخر .. هذا ما جعلني افكر في تصريحات بعض المعارضين مثل " الجزيرة باعتنا او متوصي عليها .. وان مش عارف مين راح فين للاتفاق على تهدئه الموقف" ان هذا الكلام غير صحيح .. لانها فعلا حيادية و تهتم بجديه الخبر و ثقله .فعلا مؤسسة عظيمة افخر بانها عربية فهي شئ شاذ خرج فشذ عن شذوذ كل ما حولنا من اشياء شاذه فالوطن العربي.
و في حديث لاحد إداريها عن مواقف قناة الجزيرة و ردود الافعال الخارجية نتيجة لما تذيعة ..ذكر الدول التي تنتقدها و مثيلاتها من الدول العربية مثل السعودية و مصر ... بس ذكر كلمة مصر .. و هو ما جعلني افكر و وصلت بالفكر بدرجة من الحقد تقريبا .. فلماذا قطر تمتلك قناة بهذا الحجم و مصر صاحبة الريادة الاعلامية ( و خليها في سرك) لا تمتلك سوى يادوبك قناة النيل للاخبار ..
قناة النيل للأخبار .. القناة التي لا يشاهدها سوى اقارب و اصدقاء المذيعين .. و بعض معارف العاملين بها في حاله انتظارهم مرور اسم من يعرفوه بالتتر الاولاني او الاخراني .
طبعا مع كامل احترامي لجميع العاملين بقناة النيل للاخبار ... العيب مش فيهم طبعا .. و الدليل تألقهم لما بيهاجروا لأي القنوات الاخبارية المحترمة زي الجزيرة و العربية و الحرة و قنوات اخرى .
و بما اننا نمتلك كوادر ممتازة و قدرات عالية و افضل الامكانيات الاعلامية من اماكن تدريس و استاذة معلمين و استديوهات و اقمار صناعية ... ما السبب اذا ؟؟ ما السبب ايها المنادون بالريادة الاعلامية .
دانت متلقيش قناة فضائية عربية متألقه تخلى من مذيع او معد او مخرج مصري او كلهم مع بعض ... بئا امارة تقدر تجمع الاعلاميين من الوطن العربي لتخرج علينا بقناة بحجم قناة الجزيرة و مصر اللي بيقولك صاحبة الاعلام الرائد عندها النيل للاخبار !! ***
10 comments:
الكلام دة يا مصطفى عشان اغلب الدول التانية بتسمح للاعلام بمساحة محترمة من الحرية , حرية الرأى و التعبير , و العاملين فى الاعلام بيقدروا الحرية دى و بيخرجوا افضل ما عندهم
فى مصر بئا بلد الريادة زى ما بتقول , اللى بيفتح بؤه بحاجة غير اللى على مزاج الحزب الوطنى الموقر بياخد بالجزمة
يعنى مفيش مساحة من الحرية معطاة للاعلام , سواء مرئى او مقروء , و دة بيسبب عدم المصداقية عشان الناس عارفة ان اللى هيتقال عندنا مش صحيح , فبيتجهوا لاعلام الدول التانية , و دة يسبب كمان ان العاملين بالاعلام هنا يطفشوا عشان محدش فيهم يقدر يعبر عن رأيه و محدش هيتابعهم
دة غير اننا عندنا بطء نحسد عليه فى تغطية الأخبار حتى لو كانت الأحداث بتحصل عندنا فى مصر
يعنى تلاقى كل وكالات الأنباء جريت تغطى الخبر و احنا نستنى الأول ناخد الاذن من الوزير و بعد كام ساعة نفكر نغطى الخبر و كمان من غير المصداقية اللى قلنا عليها قبل كدة , و فى الوقت دة الناس بتكون تابعت الأخبار الصحيحة بالفعل على قنوات تانية
دة بئا فى رأيى السبب ان مصر مفيهاش قناة اخبارية محترمة و صادقة ممكن الناس تتابعها زى الجزيرة و غيرها
ان كنت تبحث عن الخلل في جهاز الإعلام المصري فلن يطول بحثك و لكن سيطول فحصك للأسباب العديدة للتخلف الإعلامي بل و الحضاري و اللذي هو مبدأ يرمي بظلاله ليس على الفكر الإعلامي فحسب بل على جميع الإتجاهات التخطيطية و السياسية
قناة الجزيرة لا تنتقي مذيعين و مقدمي برامج بموازين الواسطة و صلات القرابة لمسئوليها و انما هي تضع معايير ثقيلة لانتقاء الوجوه اللتي تطالعنا يوميا عبر أثيرها
كل الوجوه اللتي تظهر على شاشة القناة حاصلة على درجات علمية مرموقة في الإعلام و السياسة و لذلك لا نجد بينهم من يجهل معلومة تاريخية في مجال تقديمه لبرنامج ما
قناة الجزيرة تحاول إثراء عقل المشاهد و تخطب ود الصفوة من مقفي العالم العربي و ما دون ذلك فهم منتقدين تحكمهم أسس نظرية المؤامرة و غيرها من عضال الداءات العربية المنشأ و الواسعة الإنتشار
و لكن يبقى النقد البناء حيث لا تتناول الجزيرة من قريب أو بعيد الداخل القطري و هو ما يؤخذ عليا و لكن في نفس الوقت لن تجد على وجه الأرض قناة إخبارية محايدة مائة في المائة .. و لكن يكفيني حياد الجزيرة المنقوص عن انحياز غيرها الصارخ
برأيي أن مصر تخلفت في جميع المجالات
ليس بالإعلام فقط
ومكانة مصر أكبر بكثير من وضعها الذي فيه حالياً
والله يجازي من كان السبب
انا كمان شفت البرنامج ده ليف , وكمان حاولت اشوف الاعاده بتاعته , لانه كان مميز جدا , اما بالنسبة للتليفزيون المصرى فبساطه من الممكن ان اقول لك نحن نملك الكوادر الاعلاميه الممتاذه ,والتى تستطيع صنع اعلام راقى وحر , ولكن المناخ لا يسمح
وتقبل تحياتى
anonymous
ماهو لازم يجي يوم يكون عندنا اعلام صادق ... عيب اوي اللي بيحصل دا .. احنا و سهل اوي نعرف الحقيقة و اكيد هما عارفين كدا .. ميتكسفوش على دمهم بئا !
memes
اهلا يا ريس شرفتنا ..
و الله انا شايف ان انحياز قناة الجزيرة يكاد ينعد ...حتى لو ادارة القناة سمحت بذلك فلا اعتقد ان الشخيات المحترمة اللي فيها هتسمح بذلك...ممكن تتدخل الاهواء الشخصية فالموضوع .. لكن لن انسى تغطية قناة النيل للاخبار لجلسة مجلس الشعب بتاعة تعديل المادة 76 ..قمة ف السذاجة ..
mashi_97
اكثر من شئ اسعدني بردك دا ..
الاول اسعدني مرورك و اسعدني تفهمك للموقف ... و اللي اسعدني اكتر جملة الله يجازي من كان السبب ..يعني الحمد لله مش احنا لوحدنا اللي عارفين .
شكرا لمرورك و ولا تبخل علينا بتكرارها ان شاء الله
hany
ايه الغيبة الطويلة دي ... عاش من شافك .
انا شايف ان المناخ مناسب و يسمح ...بس الحزب هو اللي لا يسمح .
دا لو على كلام المسئولين المضروب عن حرية العلام و الشبه النضج الفكري و الوعي فالفترة الاخيرة يعتبر مناخ جيد لولادة اعلام جديد بعيدا عن الفكر الجديد ... و ربنا يسهل
تحيتي لك
لن أزيد على ما كتبه الزميل العزيز شريف نجيب يوماً عن قناة النيلة للأخبار في مدونته الجميلة "هدوء نسبي" ، إلا قولي أن المسألة مش مسألة حرية ولا ملوخية .. مسألة ناس جبتهم من الدار للنار دخلتهم لعبة ما هماش قدها..
المذيع مش قد العملية فبيحاول تقليد مذيعي الجزيرة بشكل يشبه "عزب شو" ..
المخرج مش قد العملية .. الصورة تعبانة طحن ، الاختيارات الموسيقية تعبانة طحن ، المونتاج تعبان ، الجرافيكس ميت .. كل الفنون البصرية الله يرحمها ويحسن إليها؟
يا جدعان دي قناة مش إذاعة .. فيه حاجة اسمها الصورة اللي بتميز التليفزيون عن الإذاعة والبوتاجاز الأربعة شعلة..
فيه قضايا متباعة بالكامل في القناة دي للي يتفقع برؤيتها ..تهون قصادها مشاكل الحرية وانعدام الابتكار وعناوين الأخبار اللي شكل واحد روزجي كاتبها..
ولو همة فاكرين إن التزيد والمبالغة في الاهتمام بالشأن الفلسطيني حيخليهم زي الجزيرة والعربية .. يبقوا ينسوا عمرو.. وزيد كمان!
حيقولولك القنوات دي بيتصرف عليها مليارات ، لو خدوا مليارات وفوق المليارات مليارات مش حيكفي ، لإن الفلوس في مصر بتتعفرت بطريقة يصعب على أمثالي فِهمها.. ومش حتستغل خالص وحتضيع زي ما ملايين المسلسلات ضاعت..
كويس إنك فتحت موضوع قناة النيلة للأخبار ، عقبال ما نحضر سرادق عزاها في عمر مكرم أو حتى في عمر أفندي.. ما تفرقش.. ادعي معايا بس اليوم دة يقرب..
طيب
المراسل بيقول ان الناس جم من الدار للنار
يعني مش المفروض التطور الطبيعي لاي شئ انهم يتمرنوا و الكبير يعلم الصغير , ولا الكوادر الموجودة في قناة الجزيرة ولدت عملاقة هاكذا ؟؟؟؟
مشكلتنا اصلا مشكلة ادارة فاسدة جاية علي حساب المعارف و المحسوبية و ما شابة .... القيادات الاعلامية لم يتم تغييرها منذ امد بعيد ... لا توجد دماء جديدة ولا فكر جديد يصلح لهذا العصر بجحة احتكارهم للحكمة
لا ادري
هي ازمة بلد بحالها و ليست قناة النيل للاخبار
ربنا يستر علي الايام الجاية بجد
بص يا صاحبى مهما حاول البعض يخفى الحقيقية هى اتكون قبل نفيها وصلت للناس ومن اكثر من مصدر
وفى اخبار بتكون للفرقعة بس
وطبعا اتمنى يكون الاعلام وسائل الاخبار حرة فى كل حاجة
تحياتى
قلم جاف
أصبت انت و الاخ العزيز شريف نجيب ... فعلا بيتعاملوا معاها على انها اذاعة .. الظاهر ان الحاجات الحكومية لازم يعملولها مذاق خاص ... تحسسك بالسبعينات كدا ... حتى فالراديو شوف الفرق بين اذاعة خاصة زي نجوم اف ام و اذاعة الاغاني و هتستمخ ...
بس يا راجل متدعيش عليها يمكن يجي عليها يوم و تتباع و ينصلح حالها .. يمكن الشيخ صالح يأممها .و تتشفر زي غيرها
ربك يسهلها و كله هيبئا تمام .. و شكرا للزيارة
شمس الدين
تلت اربع الحاجات في مصر ماشية بالفهلوه و لا عزاء للادارة و اللي بيدرسوها ... و دي حاجة في حد ذاتها تنقط .. لو تبصي على حاجة زي الهيئة القومية للبريد و اللي حصلها من تغير ملموس و محسوس و متشاف بعد حسن ادارتها .. هيكون في امل في تصحيح مسار كل شئ شارد في مصر ..
و وقت ما نتخلص من المحسوبية هيكون لينا شأن كبير باذن الله
تفائلي و ان شاء الله خير
و اهلا بيكي عندنا :)
tamer
عمرهم ما هيقدرو يخفوا الحقيقة و دي اهم حاجة يا تامر باشا ... مش هيقدروا يضللوا كل الناس لوجود المصادر التانية المحترمة و المفروض يتكسفوا على دمهم بس تقول ايه مفيش دم ...
المصيبة ان القناة العار دي منسوبة لمصر .. يلا قدرنا . و اللي يعيش فعصره ياما يشوف .. من انجازات ;)
و منور البلوج بردك
ديه مش النيل للأخبار
ديه النيلة للأخبار
Post a Comment