حكم العسكر

حكم العسكر أعمق من مجرد رئيس يحمل رتبة عسكرية
العسكر كونوا دولة صغيرة جوه بلدنا ليها مواردها وميزانيتها ومشروعاتها وحلفائها وأعدائها وكمان حدودها وأراضيها ومواطنيها اللي ليهم امتيازات في دولتنا ومتحكمين في كل مفاصل دولتنا ومتقلدين اعلى مناصبها لأنمناصب دولتنا بتكون عندهم للتهادي ومكافئة نهاية الخدمة بالنسبالهم

دولة الجيش مسيطرة على حوالي 45% من الاقتصاد المصري .. و سيطرته وتحكمة على قطاعات زي السياحة والاستثمار والبترول .. كمية الاراضي اللي بيمتلكها او بيستولي عليها بحجة الامن القومي، ضفاف النيل والجزر اللي فيه وسينا و الصحراء اللي الدولة بتشتريها منها لما تحب تتوسع في مدن جديدة.. ومئات المصانع اللي بتنتج سلع عذائية من زيت و مكرونة كوين ومربى وصلصة سينا و مياة معدنية صافي .. وشوك ومعالق واجهزة كهربائية وبلاستيكية و مزارع محاصيل ومواشي ولامؤاخذه بيض .. وسوبر ماركتس وبنزينات وشركات التأمين وحراسة وفنادق ومنتجعات سياحية وعشرات السلع والخدمات اللي بيشتغل فيها الشباب الغلابة المجندين سُخرة تحت مسمى "الخدمة العسكرية" وتلاقيه بيمسح زريبة في مزارع الجيش أو بيلمع إزاز عربية في بنزينة وطنية..
وتلاقي حد يقولك طيب ما ده كويس، بيفيدوا البلد اهه.. وينسى انه بيتكلم عن وزارة الدفاع اللي مهمتها حماية البلاد وتأمين حدودها!
الوضع دا حتى لو كان لظرف استثنائي اصبح دلوقتي واقع وبيدافع عنه الجنرالات باستماته حفاظا على مصالحهم ومرتباتهم وبدلاتهم اللي بتصل للملايين شهريا .. عكس طبعا الظباط الصغار.
سلع وخدمات الجيش بنكتشفها مع الوقت وبالصدفة او بعد لما تبدأ تعلن فخرها انها تتبع للقوات المسلحة زي مابدأ يحصل مؤخرا..
ليييه بقى منعرفش حاجة عن السلع والخدمات والحاجات دي؟؟ علشان الحاجات دي كلها تبع القوات المسلحة و حاجات سرية .. امن قومي بقى وكدا 

ومتقدرش تراقب عليها ولا تعرف مصروفاتها كام ولا ارباح ايه لأنها هتظهر رقم واحد في الموازنة العامة بدون تفاصيل.. ومجلس الشعب مكانش بيقدر يناقشها ولا هيقدر.. في حين انك تقدر تعرف صفقات تسليح مصر من الدول الاخرى .. وجزء كبير من صفقات تسليح مصر بتكون معلومة لأمريكا و اسرائيل بحكم اتفاقية كامب ديفيد .. بس بتكون على الشعب سر .. هي وايرادات المواشي و المكرونة 

كل رؤساء جمهوريتنا من العسكر -باستثناء مرسي-
هتلاقي 19 محافظة من 27 محافظة بيحكمها لواءات .. والمحافظات اللي نفدت هتلاقي نواب ومساعدين المحافظين ورؤساء ديوان المحافظة لواءات .. بالاضافة لرؤساء الاحياء طبعا.
حتى في الوزارات، في وزارات مسيطر عليها لواءات ابرزها وزارة البيئة والنقل والاسكان.. و الهيئات المدنية والمراكز القومية .. كلها لواءات لواءات
والشركات القابضة والقطاع العام دائما ما تجدهم متصدرين رئاسة مجلس الادارة .. لواء فلان الفلاني

وبعد 60 سنة حكم عسكر و كل اللواءات والعمداء والعقداء اللي مسيطرين على كل حاجة في البلد من محافظات وأحياء ومراكز و وزارات وهيئات ومجالس وكبرى الشركات، تلاقي واحد يقولك "احنا محتاجين واحد عسكري يحكمنا .. هو دا اللي هيظبط البلد" .. 

اعرف اكتر

الجيش والاقتصاد في بر مصر
http://goo.gl/nW3yqb

إمبراطورية العسكر الإقتصادية في مصر
http://goo.gl/VeAmQQ

بالأسماء والمناصب.. خريطة جنرالات حكم العسكر لمصر
http://goo.gl/6aXVeY