اللهم لا شماتة :)

 رغم انه السبب فاللي احنا فيه وان الحل في ايده بس اسهل حاجة بيعملها الاخوان واللي مش اخوان بس بيحبوهم انه يحملك مسئولية اللي بيحصل!
يقولك بص الفلول نازلين.. طيب وهو مين اللي عملهم قيمة ؟؟
بص العسكر هيركبوا .. وهو مين اللي ركبهم؟؟

انا حصلتلي شوية مشاهد كدا في يوم 30-6

لما كنت ماشي في مسيرة كان ادامنا مسيرة والشباب رافض يضم عليها وسألت ليه ؟! قالوا اصل دي مسيرة مصطفى بكري!!!
مصطفى بكري .. طالع في مسيرة ضد مرسي :)
افتكرت مصطفى بكري لما كان واقف في البرلمان بيشتم في الثورة ورمزها وشبابها وشهدائها وبيتكلم عن الشرعية والاخوان و السلفيين بيصفقوا له بحرارة وجريوا عليه يبوسوه وعملوا منه بطل قومي.. اللهم لا شماته :)

المشهد التاني .. خبر ان وزير الداخلية منصور العيسوي بيقود مظاهرات المطالبة برحيل مرسي!
تذكرت واحنا محطوط علينا في محمد محمود و الشباب عنيها بتروح واجسامهم بتتخرم من الخرطوش والفيديوهات مصورة كل دا.. ويطلع وزير الداخلية آنذاك منصور العيسوي يقولك احنا معندناش خرطوش! (راجع فيديو مدبلج لابوحامد عن الخرطوش..مسخرة :D )
ويمسك في كلمته نواب التيار الاسلامي برئيس مجلسهم ويتهموا اللي بيقول ان في خرطوش بانه عايز يعمل مشاكل ومخططات اناركية ومؤامرات فوضى .. صدقوه وكدبونا وعملوا منه بطل.. شفتوه وهو بيقود المظاهرات ضدكم .. اللهم لا شماته :)

المشهد الثالث.. مداخلة هاتفية من سامي عنان بيعلن فيها استقالته من منصب مستشار الرئيس والمذيعة بتسأله يعني حضرتك ارسلت الاستقالة للرئاسة قالها لأ لم ارسلها و مش هرسلها! وكمان اعلن عن نيته للترشح لانتخابات الرئاسة :)
افتكرت لما كنا بننزل نهتف ضد جرائم المجلس العسكري وبنطالب محاكمة قياداته اللي انت كرمتها وادتها قلادة النيل.. والتيار الاسلامي بيقول علينا اننا بننفذ مخطط خارجي لاسقاط الجيش وهدم العمود الاخير في الدولة المصرية.. القيادات الفاسدة عمود؟!
طيب آدي يا سيدي العمود ماتهدمش .. ألبسه بقى :D
 واللهم لا شماته :)

هذا ما جنته أيديكم من بعد كذب وتخبط وعناد ومراوغة وغباء والمواقف كثيرة .. بداية من الانسحاب من الميدان – التفاوض مع العسكر – استعداء الثوار وكسب ود العسكر – معارك الاستفاء والبرلمان و الدستور وتجاهل مطالب المحاسبة والتطهير و و و 

المشاهد كتييير .. ملخصها
{وما ظلمناهم ولكن كانوا أنفسهم يظلمون}