رسالة لطالبي وحدة الصف و المصفوفين

عزيزي الفلول.. ولا بلاش علشان وحدة الصف

عزيزي المواطن اللي مش ثوري

ازيك؟ :)

من الواضح اننا هننزل في يوم واحد مع بعض.. اليوم ده يعتبر موجة ثالثة لثورة 25 يناير.. فاكرها؟؟

اللي خلعت مبارك .. اللي رموزك كانوا بيدافعوا عنه وقالوا ان الثورة مؤامرة و ان اللي معتصمين متمولين و خونة و عملا و بيعملوا سيكو سيكو في الخيمة ;)

واحتمال كمان تكون قلت ان الناس اللي استشهدت علشان تحقق حلمها.. بلطجية

وجايز تكون واحد من اللي كانوا واقفين عند المتحف المصري بيحدفوا علينا طوب يوم موقعة الجمل .. او انت الراجل اللي كان راكب الجمل ذات نفسه.

و ربما تكون احد المواطنين الطيبيين اللي كانوا في البيوت بتتفرج علينا في التليفزيون وبيتشحتف مع تامر بتاع غمرة و مصدق الاكاذيب اللي بتتقال علينا و كارهنا و عمال تردد جمل من قبيل "اللي بيحصل ده قلة ادب - خربتوا البلد حرام عليكوا - كفاية بقى - الاستقرار" بلا بلا بلا

وطبعا انتخبت شفيق بغض النظر عن المبررك المهم اننا هدفنا اليوم ده نخلص من الاخوان ونستكمل ثورتنا علشان نتجه للاستقرار والبناء والتنمية والشعارات اللي جريك وراها وصلنا للي احنا فيه .. و لازم تكون عارف اننا لن نقبل باي حال من الاحول الرجوع للخلف او بحد من النظام السابق.. ولو فكرت في فرض حاجة زي كدا يبقى هتخسر الاستقرار و التنمية والحاجات دي علشان اكيد اكيد احنا مش هنسكت.

 في اليوم ده هتنزل معانا وهنكون احنا الاتنين في نفس المكان وانا هدفي اسقط نظام الاخوان لاستكمال ثورتي وانت الله اعلم بنواياك

ويهمني ويهمك ان اليوم ينجح .. هذكرك تاني انت هتنزل معانا وهدفك هدفي فلو مش عايز اليوم يبوظ حاول تلتزم بادبيات اليوم

زي مثلا انك تلتزم بالسيناريو اللي مرسوم لليوم.. وفكك من جو المنصة ومصطفى محمود والعباسية.. لا ترفعلي صورة شفيق ولا سيسي ولا سيدك مبارك ولا مجلسة العسكري وتوفيق عكاشة و العالم دي.. هتخسر كتير لو مجرد فكرت في كدا.

 وياريت متحاولش تهتف لان هتافك هيكون غريب علينا .. ولو سمعت هتاف من هتافاتنا كان جارح شوية لمشاعرك ضد النظام الفاسد او مبارك او المجلس العسكري ولا رمز من رموزك.. معلش استحمل..حاول تردد وراهم، ولو مقدرتش اسمع وانت ساكت ومترددش..

 نفض ياعم..اقولك عد من 1 لـ 10 بالمشقلب.. جز على سنانك.. استحمل شوية يا اخي دانت استحملت مبارك 30 سنة و كنت بتقول نستحمل كمان باقي فترتة .. استحمل انت الكام ساعه ولا الكام يوم دول لغاية ما تعدي على خير.. دا لو انت عايز تخلص من الاخوان ..

عزيزي المواطن اللي مش ثوري ياريت بلاش افتعال مشاكل والتزم وحدة الصف الثوري علشان اليوم ينجح ونحقق هدفنا وهو اسقاط نظام الاخوان ..  ولا انت ليك هدف تاني؟؟

عزيزي الثوري اللي عايش دور السياسي المحنك و المصلح الاجتماعي

اللي هتقول ان مش وقته نتكلم على فلول دلوقتي عايزين نتوحد.. نتوحد مع مين! مع اللي قتلك او سكت على قتلك وخونك واقلها شتمك؟!

 قولي انت طيب نتكلم امتى على الفلول؟؟ بعد 30-6 لما يركبوا وتلاقيهم رجعوا الحكم ؟؟ ولا انتوا اساسا خلاص معتبرين نفسكم ايد واحده .. ولما هم ايد واحده نزلت ليه تثور عليه يابن !@$%

الثائر الحق هو من يثور ليسقط الاخوان ولا يترك مجال لعودة النظام السابق ثم يهدأ ليبني الامجاد.. تحت حكم الثورة #30_6