واحد زميلي اطلق لحيته .. و دا فتح باب النقاش عن اللحية و النقاب و كدا .. و كان النقاش ماشي زي الفل لغاية ما واحد طلع مره واحده كدا و اعلن ان إطلاق اللحية فرض و النقاب كمان فرض ... و طبعا لازم الالتزام بالزي كله .. جلبيه بيضا و قصيرة بئا و الكلام دا ... و بالمرة نلبس خف و احنا مسافرين!! يا جدعان ارحمونا بئا ..
زي مرة وانا في الثانوية العامة بعض الناس العجيبة اللي كانوا معانا في الفصل وزع ورق يحتوي كلام عجيب من قبيل اللي ثوبة يلامس كعبة ملعون و فالنار و ان حلق اللحية ذنب عظيم و تشبه بالنساء ! - هي النساء بتحلق دقنها- و التاني يقولي ما اه صح ! يعني حد يخش النار عشان رجل البنطلون بتلامس كعب الكوتشي!
و افتكرت واحد زميلي عادي مش متدين و كدا و هو بينصح واحد زميلي تاني على تسريحة شعره عشان حرام و اللي كان بيعملها زمان كانو بيقيموا عليه الحد و تقطع اطراف اصابعة :$ .. مش عارف الكلام دا صح ولا لأ
و بعدين معظم الأمور دي كانت لها حجج و بحكم المجتمع ساعتها.
بس سيبك انت يطلق ولا ميطلقش لحيتة ... اللي يفرس ان لما يطلق لحيته ميعتبرش نفسه ولي من اولياء الله و يعطي لنفسه الحق في محاسبة الآخرين .
و دا اللي مدينا صورة الارهابيين .. ما فيه في الديانات التانية ناس مربية دقنها و محجبين كمان ... مانت عندك في المسيحية البابا بتاعهم مربي دقنة و الراهبات بيكونو مغطيين شعرهم و الحاخامات في اليهودية ليهم زيهم و مربيين دقنهم بردو ... طيب ليه متقالش عليهم ارهابيين !! دا اللوجو بتاع الارهابي بئا واحد مربي دقنة ,لابس جلباب ابيض و قصير ... جايز الاعلام هو اللي صور كدا سواء المحلي او العالمي و هما جابو الصورة دي منين! اكيد من اللي الفزالكة-اللي بيتفزلكوا يعني- و المنافقين .هما اللي شوهو صورة الاسلام و جعلوا منه الارهاب و التخلف.
طبعا مع كامل الاحترام و الحرية المطلقه لاي ملتحي سواء كان مربيها عشان شكله ببيها حلو ولا سنه عن الرسول صلى الله عليه و سلم ولا حتى عشان يبان انه تقي و راجل بتاع ربنا ... و المنتقبات سواء اللي بتستسهله ولا اللي بتختفي وراه او اللي لبساه احتشام بجد ...
و النقاب دا موضوع لوحده بعد ما بتشوف مناظر المنقبات و العمايل اللي بيعملوها .. طبعا مش كلهم .. بس الغالبية منهم شوهوا صوره المنقبات.
و دا طبعا لان الغالبيه بيستسهل و يلجأ للتدين المظهري و متعرفش من جواه عامل ازاي .. و اهو نفاق زي ما المجتمع كله ما بينافق فبعضة ...
اعتقد ان سواء لحية ولا حجاب ولا نقاب ولا بندانا حتى لازم يكون نابع من داخل الفرد عشان يكون ملتزم بيه صح .. مش موضوع يتفرض و خلاص و المظاهر بتتاخد ستار لبلاوي تانية ... فلا يمكن ان يختصر الدين في لحية و ثوب .
6 comments:
اولا يا مصطفى اشكرك على الموضوع عشان فعلا التدين المظهرى انتشر اوى دلوقتى
ثانيا بئا , انا ليا رأى فى الموضوع دة
انا شايفة ان ما دام العلماء اختلفوا فى تحديد اذا كانت اللحية او النقاب فرض , يبئا الاختلاف دة دليل على انهم مش فرض و الله اعلم
هما ممكن يكونوا سنة او طاعة الناس بتقرب بيها لربنا و من رأيى الشخصي ان لو حد التزم بحاجة منهم يبئا يديها حقها و يكون أدها عشان ميحصلش العكس و يشوهوا صورتها زى ما انت قلت
و كدة كدة , الاعتدال خير الأمور , و سواء التزم الانسان بنقاب او لحية او ملتزمش بيهم لازم يبعد عن التشدد و عن التسيب , يكون وسط
و زى ما قلت دة رأيى الشخصى و شكرا مرة تانية يا مصطفى
هاحكيلك موقف
واحد صاحبي اطلق لحيته فابقله ما تشيلها انت شاكلك احلى من غيرها
قالي لأ دي سنة مؤكدة
قلتله ماشى ..مؤكدة ولا لأ مادام مش فرض ربنا مش هايحسبك
قالي لأ هايحسبني
قلتله ازاي و هي سنة مش فرض
قالي دي سنة مؤكدة
كبرت دماغي منه مادام هو مش فاهم ان مؤكدة دي معناها متفق عليها من جميع الامة بس تظل في جميع الاحوال سنة
القصد ان الموضوع دة بقى منظرة و هبل و محدش فيهم فاهم حاجة
Ditto!!
صعب اوى اللى بقى الناس فيه ده بس عمومآ كل ما زاد الفقر و الإنحدار زاد التمسك بالدين والتطرف فييه...
يعنى إحنا مش واخدين من الدنيا غير الشقى و القرف نتدين عشان ربنا يدينا اللى إتحرمنا منه فى النيا لما نموت... و عشان المعظم يا جاهل يا بيكسل يقرأ النصوص السليمة بيسمع شرايط و واحدة واحدة بيتغير فكره و يبقى عنده إيمان قوى بإن هى دى الأفكار السلييمة و كل ما زاد يأسه فى الدنيا زاد تطرفه عشان الآخرة... و بينى و بنكوا أسهل حاجة ان الواحد يفتكر إن التدين جلابية و ذقن و نقاب و إن الجنة بتتمحور حواليهم!!
السلام عليكم
اللي أعرفه أنا إن اللحية سنة مؤكدة، والنقاب اختلف فيه العلماء وهو سنة
وأعرف كمان إن كل فرض "جنة ونار" وكل سنة "درجات جنة" يعني لو سيبنا فرض بنخاطر بالاقتراب من النار إنما لو سيبنا السنة بنخسر درجة أعلى في الجنة ممكن نوصلها لو عملنا
المشكلة بقى هي في النفاق اللي انت قلت عليه، فلو حد مقتنع بحاجة يعملها ولو مش مقتنع ميعملهاش وده مش ممكن يحصل عشان إحنا العرب لناش شغلانة غير اننا نراقب بعض ونتكلم عن بعض ونلاحظ في تصرفات بعض فكل واحد بيحاول يعمل اللي يرضي اللي حواليه مش اللي يرضيه هو أو اللي يرضي ربنا...زي مثلا الولد اللي بيدخن اول مرة بيبقى قاعد مع اصحابه فبيوسوسوله يشاركهم "خليك راجل" "إنت خايف؟" "هاهاها ده بيخاف يا جماعة"فبيطاوعهم ويعمل اللي هما عايزينه مع انه عارف انها مضرة
الناس بيخافوا من بعضهم أكتر من خوفهم من ربنا يمكن لانهم عارفين إن ربنا بيرحم إنما ابن آدم مبيرحمش
وبالنسبة لحكاية الحجاب في القلب فدي أنا مش بتفق معاها هعرف منين انه فيه حجاب في القلب لو ملمستش الدليل
بس خلاص
hoda
فعلا مهما كان السبب لاطلاق اللحية او ارتداء النقاب فيجب على من يلتزم بالمظهر من الخارج ان يكون ملتزم من الداخل اصلا ... مش يلتزم بمجرد زي و بعدين تبئا تفرج ولا ترتدي النقاب و تفعل كل ما يخالف المظهر!
و أهو خير الامور الوسط .. بعيد عن التشدد و التسيب زي ما قلتي.
انا كدا كدا مبحبش اتكلم فأمور الدين لاني لا فقيه ولا حاجة زي مانت شايفة و فنفس الوقت دي حاجة خاصة بالفرد و ربه ... هو اللي هيعمل كدا او مش هيعمل كدا و ربنا هو اللي هيحاسبه
و شكرا ليكي و لمرورك و لرأيك المتوازن :)
دماغ ماك
جايز فرحان و هو منظرة بئا مدي على تقي و حس انه بئا شيخ ... كدا ولا كدا دي حرية شخصية يحلفها ..يربيها دي حاجة ترجع للفرد نفسه ... بس كونه يفرضها على حد او حتى يحرمها اهو دا اللي محدش ليه فيه ...
و شكرا لزيارتك يا جميل و شكرا على الفيديو و احييك انك متأخرتش في نشره
و سلملي على صاحبك كتير :D
spellz
من اسهل الطرق للظهور بمظهر استثنائي في المجتمع و كسب الاحترام من البعض..فلو الدين جلابيه و دقن مكانش حد غلب ...
و فعلا ناس كتير متفتكرش ربنا الا فالزنقه .. و طول ما الجهل موجود طول ما سهل يتضحك على البني آدمين خصوصا بموضوع الدين .لانهم بيكونو عايزين يطلعوا باقل خساير من الدنيا لينالوا اللي مشافوهوش هناك فالآخره بئا
و ربنا يوفق الجميع و يرضى عنا و يدخلنا جناته
سعيد جدا بتشريفك للبلوج للمرة التانية و ياريت تبئي تشوفي الناس محدودي اللغة بتدوينة عربي كدا ولا حاجة و تحيتي ليكي
iman_conan87
الفرد فالمجتمعات العربية بينفذ اللي متعود عليه من عادات و تقاليد قبل الدين و دا لخوفة من المجتمع ... و بطبيعة الحال بينتج بعد كدا ان بيعمل اي حاجة لينال رضا المجتمع عنه ...
و الولد اللي بيدخن دا بيرضي المجتمع الصغير اللي هو صحابة انه بيددخن قصادهم عشان المنظر العام ... و فالمجتمع التاني اللي هو اسرته بيخبي عشان برده المنظر العام ... يعني الموضوع كله مظاهر.
فعالمنا العربي نادر لما حد يعمل حاجة بمزاجه .. كله غصب عنه مفيش للاسف اي حرية او تقبل للآخر ... يلا قدرنا
و مش عارف ايه اللي جاب سيرة حجاب القلب فالموضوع ! .. و بعدين دليل ايه اللي عايزة تلمسيه دا .ممكن تتصلي بيه على 140 :p ولا شوفي عندكو فالمغرب كام.
و بعدين انت بتقولي ان الدرجة الاعلى من الجنه هنوصلها بالعمل ... مش باللحية .. دي مجرد مظهر
و سلامي ليكي
موضوع حلو يا مصطفى!
انا عديت الأربعين، لما كنت طالب في الجامعة كانت نسبة المحجبات اقل من 10% وانا في اول سنتين وزادت بعد كده، وبعدين لما أتعينت معيد تابعت حاجة غريبة؛ كل ما حال البلد يتنيل، كل ما نسبة الطالبات المحجبة تزيد (طبعاً النقاب ده مكنش حد سامع عنه). انا فاكر كويس ان سنة اولى 94 و95 كانت نسبة المحجبات فيهم قليلة قوي بالنسبة للسنين اللي قبلهم ولو فكرت هتلاقي ان ساعتها الحالة الأقتصادية في البلد كانت كويسة. بعدها ابتدت تزيد تاني وأبتدينا نشوف النقاب!
على فكرة سكرتير (؟) جماعة الأخوان طلع مرة على قناة المحور، وقال الحجاب الصحيح هو النقاب ، وقال ان حديث اسماء بنت ابي بكر حديث ضعيف او موضوع (يعني مش حقيقي)!!!!!
Post a Comment