لا يسمع ... لا يرى ... و المصيبة انه بيتكلم

لا يسمع ... لا يرى ... و المصيبة انه بيتكلم


بالطبع أقصد الحاكم بأمره في جميع بقاع المدهوسة... انة الزعيم القائد . رئيسنا و رئيس اللي خلفونا .. صاحب الـ78 عاما حتى الآن .. لا أطال الله في عمره .

أنا لا أسطيع ان اتصور كيف لإنسان ان يمتلك هذا القدر من البجاحة ... و كأنة عنصر جذب لذرات البجاحة اللي في العالم .. هذا الشخص يطل علينا كل فترة من خلال وسيلة من وسائل الإعلام المسماه بالقومية ليتحفنا بكذبة جديدة ... رئيس و كذاب يا جدعان ... انا مش عارف مخدوش فالحضانة ان اللي بيكدب يروح النار ؟!!! آه صحيح أكيد ماكنش في حضانات في كفر مصيلحي .

و طبعا لما كبر عرف ان اللي بيكدب بيروح البحر ... و صدق من كتر الموالسة و المصلحجية اللي حوالية انة الرئيس الإله الذي لا يحاسب من بشر .الرئيس الذي اذا تحدث كذب و اذا وعد اخلف و اذا اؤتمن خان...

له وعود لا حصر لها ...

و عد بانتخابات نزيهة..نظيفة ..شفافة.تيجي الانتخابات و تلاقي التزوير و التلاعب و البلطجة اشتغلت و على ودنوو ... ليخرج علينا بعدها هو و موالسه ليأكدو لنا ان الانتخابات نزيهه و شريفة و عفيفة و محدش لمسها قبل كدا .. و ان الناس كانت ماشية تقطع و تعور في بعضها من كتر الشفافية و النزاهه المفرطة.

و في احداث الفتنة الطائفية الأخيرة يخرج بيان رسمي من وزارة الداخلية ليؤكد أن مرتكب الحادث (مختل عقليا) .. يجي عم نظيف

لينفي انه مختل عقليا ... يطلعلنا حسني بك لينفي وجود فتنة او حالة احتقان في مصر من أساسه ... و الناس مقطعة بعض في اسكندرية و المتخلفين عقليا مبهدلين الدنيا ... طب نصدق مين فيهم ولا نصدق اللي بنشوفه !!!

بالنسبة لأزمة القضاه ... يؤكد الرئيس و يجز على سنانه اوي انه لا يوجد ما يسمى بأزمة قضاه و مفيش احتقان و كلام فارغ من دا ... و في نفس الوقت القضاه معتصمين في ناديهم و قضاه بتتحاكم و ناس بتتضامن معاهم و ناس بتتحبس و ناس بتتسحل.. و يخرج عليا نظيف ليتحفنا ان هناك ازمة و في طريقها للانفراج و هتتحل ان شاء الله ... الله يعني فيه ازمه اهه.

شوية و ينطلنا سيادة في التليفزيون بحجة خطبة عيد العمال ... و يرزعلنا شوية أرقام لا وجود لها على أرض الواقع ... سبحان الله . في الوقت الذي يحتفل بعيد العمال و يتحدث عنهم يشرد آلاف العمال ولا ينظر لتدني الاجور و يبيع القطاع العام بأبخس الاسعار ولا يراعي حقوق عمال ولا يحزنون ... و يذكر معدلات تنمية لا أعرف من أي مصدر حصل عليها ... و الأكثر مسخرة هو الرقم 257.

ايه 257 دا... سيادة بيقول انة تم بناء 257 مصنعا في الـ6 أشهر الأخيرة .... نعم ..عارف دا معناتو ايه ؟!! .انة يتم في مصر بناء المصانع بمعدل مصنع و نصف فاليوم ... مصنع ايه دا اللي بيتبني في يوم ؟!.. دا لو محل كشري ميخلصش في يوم... و في تصريحات نظيف اللي الظاهر اصبح متخصص في احراج سيادته و يذكر في احدى تصريحاتة انه تم بناء 34 مصنعا في في الـ6 أشهر الماضية .. و كلا الرقمين لا تواجد لهم على ارضنا ... فقط على اوراق خطبهم.

سيادته مرتااااح ثم يعلن سموه في حديثه لقناة العربية إرتياحة الرسمي للاوضاع في مصر ... الناس قرفانة و سيادتة مرتاح ... ضرب و طحن و سحل و فقر و مرتاح ... غضب و مظاهرات و اعتصامات و حضرتة مرتاح ... طب ريحنا معاك يا اخي و حل عن سمانا بئا ... هي كدا كدا جاية من عند ربنا قريبا ان شاء الله .

يا سيادة الرئيس .. بما انك مش عارف حاجة كدا .. أكرملك تقعد فالبيت جنب سوزي ..بدل الفضايح دي ... مصر مش هتنصلح غير بزوالك .. و مش انت لوحدك . انت و الشلة او ما يسمى برجال الحزب الوطني.

ان وجودكم معا يزيد من قوه الفساد و تستمد منهم شرعية باطلة و يستمدون من منصبك قوه ...فيسرقون و ينهبون و يفسدون و... و بتسترك عليهم تصبح مثلهم .. فطبيعي جدا جدا ان تجد قائد سرب طيور النورس طائر نورس و ليس دكر بط مثلا ... و قطيع الخرفان قائدهم خروف كبير .بس ابنه مسموش جمال . ... و شئ اساسي ان تجد رئيس عصابة الحرامية و المحتالين و النصابين حرامي كبيييييييير و ليس فقيه او إمام مسجد او راهب.و على هذا الاساس يمكن استنتاج مما نراه من فساد و مفسدين و محتالين و مزورين و فاشلين يعملون تحت رايتك و وزارات متعاقبة أعلنت فشلها و قلما أخرجت لنا وزير عِدل .... من يكون رئيسهم ؟

هناك ما يسمى بالخجل ... كذب و فساد و تستر و مش عارف حاجة في اي حاجة و ليك عين تتكلم .

.يا بجاحتك يا اخي