جمعة الغضب - جمعة تحديد مصير مصر

النهاردة لو الاخوان والجماعات الاسلامية ناويين يخلوها جمعة غضب تانية وزي ما بيروجوا هيكون هدفهم اقسام وافرد الشرطة هنكون امام حاجة من تلاتة

- الاسلاميين يقصروا الشر ويجروا مع اول طلقة في الهوا وخلص اليوم على كدا (recommended)

- الاسلاميين يصمدوا ويتكرر تاني هروب الداخلية ويقلعوا هدومهم ويجرو.. ودي هتكون المرحلة الاولى
ويقابلوا في المرحلة اللي بعدها الجيش.. وندخل في دوامة سيطرة الاخوان على مناطق واعلان تحريرها والجو دا
والجيش يا يجيب ورا ويقعد يتفاوض.. يا تكون بداية مشروع سوريا

- او ان الداخلية هتنزل بتسليح كامل وتتعامل باقصى عنف ويدعمهم الجيش
وساعتها هيقع عدد بالالاف وبعدها طبيعي هيعلن الكفاح المسلح من جانب الاسلاميين لان غير منطقي بعد سقوط آلاف القتلى ان يكون في مجال للتفاوض..

 دا غير اساسا ان لو محصلش حاجة من دول والوضع فضل معلق كدا كتير الاقتصاد مش هيستحمل.. البنوك والبورصة والشركات الاجنبية بتقفل.. مش هيكون في دولة حد يتخانق عليها اصلا.. وهترجع في الاخر للمؤسسة العسكرية بردو لانها اقوى مؤسسة هتقدر تصمد بتنظيمها وتسليحها و اقتصادها

او ان هناك اتفاقات غرف مغلقة واتفاقات أوامر لا نعلم عنها شئ ستحسم الامر

مين اللي في ايده الحل ؟؟

مشهدين منفصلين متصلين في نفس ذات الوقت

الأول:
متهم اخد الشاور بتاعه و لبس ترنجه الابيض الفخم وأسترخى على الشازلونج المتحرك ليظهر على شاشات التليفزيون يضحك ويلوح للمعجبين والمتفرجين باي باي!
ده مبارك المتهم في قضايا فساد و سرقة اموال بالملايين و سبب في قتل آلاف المصريين و السبب الرئيسي لفشل دولة كاملة..
الثاني:
4 شباب في سجن برج العقرب مشدد الحراسة كل منهم في زنزانة متر × متر منفردا تخلوا من كل شيء وأي شيء.. إلا الحشرات.. الزاحفة منها و الطائرة
لا هواء ولا سماء ولا مكان للنوم او لقضاء الحاجة .. و التهمة إهانة وزير الداخلية!!
الـ4 شباب هم محمد مصطفى - زيزو عبده - ابو آدم.. و المواطن سيد منير نجار مسلح مر صدفة اثناء فاعلية تنتقد سياسات وزارة الداخلية التي لم تتغير بعد الثورة

والناس تسأل و تستغرب.. هو مبارك بيضحك ليه؟!
لانه لسه بيحكم :)

يسقط يسقط مرسي مبارك .. يسقط يسقط كل مبارك
الحرية لمحمد مصطفى - زيزو عبده - أبو آدم .. و سيد منير الراجل الرابع اللي كان معدي صدفة

هيتم عرضهم بكرة امام نيابة في مجمع محاكم القاهرة الجديدة .. الساعة 9 الصبح.. يا ريت كل الناس تيجي

وجودك هيفرق


** الصورة لمحمد مصطفى أحد المعتقلين في سجون محمد مرسي الآن
 ممسك بلافته "اين ابناءنا يا مبارك" عقي اختطاف اعضاء من حركة شباب من اجل التغيير في سيناء.. المظاهرة في الاساس ضد غلاء الاسعار امام نقابة الصحفيين عام 2006 

اسأل نفسك ليه الشباب اللي اشعلوا شرارة الثورة بيقولوا لا للدستور
اسأل نفسك ليه البرادعي اللي تحدي مبارك ونادي بالثورة بيقول لا للدستور

اسأل نفسك ليه حركة ٦ ابريل وصفحة خالد سعيد اللي كان ليهم دور كبير في قيام ثورة ٢٥ يناير بيقولوا لا للدستور
اسأل نفسك ليه عبدالمنعم ابوالفتوح العضو السابق في جماعة الاخوان المسلمين بيقول لا للدستور
اسأل نفسك ليه اكتر من ٨٠٪ من قضاة مصر رافضين الدستور ورافضين الاشراف عليه
اسأل نفسك ليه الكتاب والصحفيين والشباب والرموز السياسية اللي دعموا مرسي في انتخابات الرئاسه دلوقتي بيقولوا لا للدستور
اسأل نفسك ليه كل الناس والاحزاب والمجموعات السياسيه متحده مع بعض وبتقول لا للدستور؟
افتكر لما قولت نعم في استفتاء مارس ٢٠١١ حصل ايه ، ودخلنا في دوامه وفوضي لغاية دلوقتي مش عارفين نخرج منها

فكر شوية ليه كل الناس دي بتقول لا وليه كلهم شايفين ان الدستور ده لو اتوافق عليه هايخدم مجموعه واحده عايزه السلطة بأي تمن

فكر شوية ليه كل الناس دي بتقول ان الدستور ده لو اتوافق عليه هايؤدي للفوضي وهايرجع مصر لورا

فكر واعمل الصح ، وقول لا للدستور ده علشان يتعمل دستور احسن يليق بمصر ويحفظ حقوقنا

قول لا للدستور من اجل الاستقرار وعلشان نمنع اي استبداد وعلشان كل الناس تاخد حقوقها

بين مرسي و شفيق يا قلبي لا تحزن وبين المشاركة و المقاطعة لأ احزن

اخيرا حسمت امري ولن اشارك في هذه السخافة.. مستريح الضمير :)

وقبل ما حد يقولي انت كدا بتدعم شفيق..

احب اقوله اللي ماصدرش قانون العزل وقانون افساد الحياة السياسية وساب الفلول في مؤسسات الدولة ومتمسك ومصمم بانتخابات مليانه تزوير 

هو اللي دعم شفيق وهيوصله للرئاسة مش انا :)


انا معترض اساسا على فساد العملية الانتخابية واللجنة العليا للانتخابات و القوانين المحصنة ليها بالاسلوب اللي بتتبعه وعدم دستوريتها و على ان شفيق ينزل انتخابات اساسا ..

كان اللي هيجبرني اني انتخب مرسي انه "مش فلول" وقد يدعم مطالب الثورة في معركة مع "واحد فلول" ... ولكن وحتى الآن و مع بدأ تصويت المصريين بالخارج و مظهرش ما يضمن لي انه هيكون مرشح الثورة مش مرشح الجماعة .. وبالتالي افضل لي اني اعترض علىفساد العملية الانتخابية عن المشاركة في موقف مريب كي يتضح في آخر الامر انها التمثيلية المتفق عليه!

مش هقبل بوضع غلط وغير دستوري و انتخابات مش نزيهه و مرشح انا مش مقتنع بيه اساسا.. علشان البيه "احتمال" ينجح و"احتمال" ينفذ مطالبنا .... واحتمال لأ

وبالتالي آســف انــا غــيــــر مــجــبــــر على اضفاء الشرعية على حاجة غير شرعية علشان احتمالات في الآخر وياريتها تصب في مصلحة الجميع
في دائما خيار وطرح تالت .. وفي انتزاع الحقوق :)

الصراع الجديد بقى هقاطع ولا هبطل صوتي .. حتى الان انا اميل لفريق مبطلون على حساب مقاطعون

والله الموفقو المستعان