جمعة الغضب - جمعة تحديد مصير مصر

النهاردة لو الاخوان والجماعات الاسلامية ناويين يخلوها جمعة غضب تانية وزي ما بيروجوا هيكون هدفهم اقسام وافرد الشرطة هنكون امام حاجة من تلاتة

- الاسلاميين يقصروا الشر ويجروا مع اول طلقة في الهوا وخلص اليوم على كدا (recommended)

- الاسلاميين يصمدوا ويتكرر تاني هروب الداخلية ويقلعوا هدومهم ويجرو.. ودي هتكون المرحلة الاولى
ويقابلوا في المرحلة اللي بعدها الجيش.. وندخل في دوامة سيطرة الاخوان على مناطق واعلان تحريرها والجو دا
والجيش يا يجيب ورا ويقعد يتفاوض.. يا تكون بداية مشروع سوريا

- او ان الداخلية هتنزل بتسليح كامل وتتعامل باقصى عنف ويدعمهم الجيش
وساعتها هيقع عدد بالالاف وبعدها طبيعي هيعلن الكفاح المسلح من جانب الاسلاميين لان غير منطقي بعد سقوط آلاف القتلى ان يكون في مجال للتفاوض..

 دا غير اساسا ان لو محصلش حاجة من دول والوضع فضل معلق كدا كتير الاقتصاد مش هيستحمل.. البنوك والبورصة والشركات الاجنبية بتقفل.. مش هيكون في دولة حد يتخانق عليها اصلا.. وهترجع في الاخر للمؤسسة العسكرية بردو لانها اقوى مؤسسة هتقدر تصمد بتنظيمها وتسليحها و اقتصادها

او ان هناك اتفاقات غرف مغلقة واتفاقات أوامر لا نعلم عنها شئ ستحسم الامر

مين اللي في ايده الحل ؟؟

انا مش عايز حكم عسكر .. انا نزلت اطالب بإنتخابات رئاسية مبكرة

ايه يا عم دا!! انا نزلت اطالب بإنتخابات رئاسية مبكرة
انا مش عايز حكم عسكري تاني.. كل اللي احنا فيه ده وصلناله بسبب حكم العسكر و تخبطه وفشله
الحكم العسكري اثبت فشله عموما وغير منطقي اساسا في ظل المطالبة بدولة مدنية.. دا غير اصلا ان العسكر اللي عندنا مايتخيروش عن الاخوان والنظام السابق في حاجة نفس الفشل و المكابرة و الكذب والوعود اللي في الهوا ومحدش منهم اتحاسب عن جرائمة اللي فاتت علشان نشعر ان العقيدة اتغيرت ونصدق .. دول كمان اتكرموا!
هو مش العسكر قالوا هيقعدوا 6 شهور وقعدوا سنة و نص
العسكر فشلوا في ادارة البلاد فشل ذريع والحالة الاقتصادية وصلت لاسوأ حالتها بفضل ادارتهم للبلاد وكبريائهم العسكري منعهم من الاعتراف
العسكر امطرنا باكاذيب من نوعية الجيش حمى الثورة ولن نطلق رصاصة واحدة
والرصاص بتاعه معلم في الحواجز الحديد في التحرير 
مش لما عارضنا العسكر قال علينا خونة وعملاء ولما قلنا له اثبت محدش شاف وشه من ساعتها
ولما اعطى التحية العسكرية للشهداء زود عددهم وكلنا شفنا الجثث وهي بتجرجر على الارض تترمي في الزبالة
شفنا ست البنات وهي بتتعرى من جنود جيشنا 
شفنا غادة كمال زميلتنا وهي بتتسحل وزمايلنا اللي بتتخطف وترجع معدومة العافية
شفنا مذبحة ماسبيرو والمدرعات بتدوس على الناس
شفنا زمايلنا وهي متبهدلة واثار الصعق بالكهربا معلم في جسمهم من التعذيب في المتحف المصري و مجلس الوزرا واعتصام كلية الاعلام
شفنا احداث العباسية و زمايلنا اللي راحوا فيها
شفنا جنود جيشنا وهي بتتبول على المعتصمين من فوق المباني
شفنا جنود وهي بتفض اعتصاماتنا وتحرق الخيم وبتجري ورانا زي الكلاب المطلوقة
مش قياداته اللي اقسمت انها لم تطلق رصاصة واحده وزميلنا ماتوا برصاصهم؟؟
مش اعتذر عن سحل ست البنات ؟؟طيب مين اللي سحلها؟؟ مين اللي سحل غادة كمال وسطينا؟ مين اللي عمل كشوف عذرية للبنات؟
مين خطف زمايلنا واتعذبوا في المتحف المصري ومجلس الوزرا والكهربا لسه معلمه في اجسامهم ؟؟
حد اتحاسب؟؟ حد اعترف بغلطة ؟؟ حد اوفى بوعوده ؟؟

انا مش عايز حكم عسكر .. انا نزلت اطالب بإنتخابات رئاسية مبكرة

انا للاسف من اللي هتفوا الجيش والشعب ايد واحده بعد التنحي وكنت فاكر ان الجيش -لامؤاخذه يعني- حمى الثورة
واتزنجفت من قيادات المجلس العسكري وهي بتعلن انها مع الشرعية والشعب والجو ده في بيانتاهم ومؤتمراتهم
اتأثرت بالاغاني و الفواصل بتاعة الشئون المعنوية اللي كانت بتتذاع في القنوات..
و بالمناسبة قبل ما المجلس العسكري يعمل فينا كل اللي فوق ده نزل التحرير ووزع اعلام و جاب فرقة حسب الله تعزف مزيكا في التحرير قال ايه بتشاركنا فرحتنا!

فـ ينزلوا يوزعوا اعلام.. ورد.. فل.. مناديل معطره.. يطيروا طيارات.. ينزلوا يوزعوا دباديب .. مش هصدق عسكر تاني .. زيهم زي الأخوان زي مبارك

بعد كل اللي شفته واللي ذكرت جزء منه فوق بعلنها

يـسـقـــط يـسـقـــط حـكـــم الـعـسـكـــر

انا مش عايز حكم عسكر .. انا نزلت اطالب بإنتخابات رئاسية مبكرة