كادر يسري التكديري

قعدت أفكر .. هل ما يحدث في المدارس هذه الأيام أمر طبيعي ام جديد علينا ... سلسلة الحوادث دي حاجة عادي كدا و ظهرت بسبب اهتمام الإعلام بها ولا زادت و تنوعت فعلا ... في شهور قليلة تحديدا منذ بداية العام الدراسي الجديد و ظهرت لنا اخبار جميع ابطالها من المعلمين .. مدرس يعاقب طالب بالضرب حتى الموت لعدم آداء الواجب و آخر ينظر لتميذه شزرا فتفارق الحياة من شده الخوف و آخر يعتدي على تلاميذ جنسيا و آخر يعاقبهم بالوقوف عرايا و مدرس يفقع عين طالب و مُدرسة تسرق وزة من بياعه في الشارع و تطلع تجري و هي خارجة من المدرسة !! و غيره و غيره.
كل الاحداث المأساويه دي و لم ينتهي النصف الاول من العام الدراسي...
ايه السبب في دا كله ..أكيد السبب هي سياسات فاشلة تطبق من اشخاص فاشلين .. اخذوا على القص و اللصق من نظم اخرى ... حتى صار الامر ترقيع للتعليم و ليس تطوير للتعليم.
تخيل المنظر .. تقويم تراكمي و أعمال سنه و غيرها من الأساليب الجديدة تطبق لتجبر الطالب على التواجد في فصلة طوال اليوم الدراسي . شيء جميل و لكن ... اصبح عندك 60 - 70 طالب مفعوصين فوق بعض .. و استاذ مطحون زي اي مواطن و غير كدا قد يعايره تلميذ او ولي امر التلميذ ولا استاذ زميل برسوبه في امتحانات الكادر -يا فاشل يا فاشل و كدا- , ذهنه مشتت بين متطلبات البيت و العيال و امتحانات الاكاديمية و الحصة دي و اللي بعدها و مش هيخلص اليوم دا كله و يروح يرتاح .. لا. لسه فيه الدروس لغاية بالليل , هيجيب فلوس منين يعني!! و متواجد في نفس المكان مع الـ60 - 70 طالب اللي محشورين فوق بعض في فصل واحد .. ايه اللي ممكن يحصل غير الكوارث دي !!
نجح يسري الجمل في تأزيم الموضوع اكثر ... وضع المعلم موضع سخرية من الجميع .. من الطلبة قبل زملاءه المعلمين ... و طبعا لما تاخد درس عند مدرس ناجح غير المدرس الساقط .. و مش هتدفع هنا زي هنا أكيد .. و في ستين داهية كرامة المعلم.
و المصيبة ان كل يومين يخرج علينا بتصريحات بيتفاخر بيها بالكادر على انه إنجاز محصلش و المدرسيين طايرين من الفرحة بسبب الكادر ... حتى الآن لم اجد مدرس و لو مدرس تدبير منزلي مبسوط بموضوع الكادر دا.
صدق اللي سماه كادر .. يكدر فعلا.

موضوع تاني بيحرق دمي و ليه علاقة بالأولاني ... و هو أكثر ما يستفزني الإصرار اللي ملوش اي معنى على وضع صورة حسني مبارك في كل فصل من فصول اي مدرسة و صورة كبيرة في غرفة المدير طبعا ... ليييه.. معرفش !.
هل في اي نص دستوري بيوجب و يحتم علينا لطع صورة سعادته على الحائط ..
و ايام الدراسة و خصوصا فيه لجنه من الادارة التعليمية ولا الوزراة كانو يهتموا جدا بوجود العلم و القسم و صورة سعادته .. طيب العلم و القسم ماشي .. انما صورة سعادته ليه .. علشان تهل البركة ولا هتطرد الارواح الشريرة .
طب دا انا شاكك و بنسبه كبيره ان وجود صورتة في الفصول هي السبب الرئيسي في المهازل اللي بتحصل كل يوم دي ... العيال مخنوقة و اهاليهم مخنوقة و المدرس مخنوق و اللي خانقهم صورتة فوقهم على الحيطة و باصص لهم كده ..ناقص يطلع لسانه.. ما لازم يعملوا كدا في بعض ...
عمر التعليم في مصر ما هينصلح حاله الا لما تتشال صورته

Billal vs Nazif

دا نظيف .. و دا بلال .. و في جامعه القاهرة

تحديث

قام الطالب بلال دياب احد الطلاب الليبراليين بمداخلة رائعة اثناء كلمة احمد نظيف بجامعه القاهرة بمناسبة الاحتفال بمئوية الجامعه.
بعد انتهاء بلال من كلماتة العفوية .. تباهى نظيف بالحرية و الديمقراطية المتواجدة و التي سمحت له بالحديث. و على الرغم من ذلك و قبل خروجنا من القاعه بدأت مضايقات الامن . بل وصل الامر الى حد الاختطاف.. في ساحة كلية اللآداب اتى بعض الحرس و معهم شخص ادعى انه دكتور بالجامعه مطالب بانفعال بلال بما يثبت انه طالب بالجامعه و لم يعطه حتى الفرصة للحديث او يثبت على الاقل انه هو دكتور كما يدعي و من معه انهم حرس بالجامعه و اصطحبوه بطريقة مهينة جدا اشبه بالاختطاف او القاء القبض على مسجل خطر وسط اندهاش الطلبة من الموقف الحادث امامهم .. و نعم الحرية!
و بعد عده اتصالات و بمرور الوقت هدأ الموضوع .. و في مكتب قائد الحرس المحتجز به بلال لا ادري باي تهمه استدعانا قائد الحرس ليطمئنا على سلامته خشية من تصعيد الحدث .. نظرا للاهتمام الاعلامي بالامر ..
اثناء الحديث سألت قائد الحرس ..كيف يعامل طالب بهذه الطريقة المهينة داخل الجامعه و امام زملاءه من الطلبة و كأنة -حرامي غسيل- .. فقالي "صلي على النبي ... انت مصري ولا تركي ؟! " رديت مصري طبعا .. قالي " مش تركي يعني .. طب خلاص" اللي يتفهم انه عادي يعني متتحمقش اوي كدا ..مصري فياخد بالجزمة عادي ميقولش لأ
هو دا منطق و فكر الامن في التعامل في اي موضوع .. لا احترام لحق انساني او قانون او حرية اي فرد في البلد .. عادي
لا مجال للحديث عن اي ترتيبات مسبقة لليوم او ما كان المفترض ان يحدث لان شيء لم يحدث .. سواء بسبب التواجد الامني المكثف و المشدد جدا او لتجاهل البعض و التقليل من امكانية استغلال الحدث و توظيفة بطريقة جيدة لصالحنا .. المهم ان الرسالة و صلت من خلال كلمات بلال العفوية العالية الصوت و التي غيرت مسار كلمة نظيف من الحديث عن ذكرياتة في الجامعه الى قضايا و هموم البلد .
ماذا لو فرضنا ان بلال التزم كما قال نظيف و انتظر وقت المداخلات ليسمح له بالحديث ؟
اساسا عند فتح باب المداخلات و التحدث المباشر لم يلتفت احد اطلاقا للطابق العلوي و هو المكان المتواجدين فيه .. اما بالاسفل الاعلام و دكاترة الجامعه و طلاب اتحاد الطلبة و التربية العسكرية-تم جمعهم لملئ القاعه و السلام- و هم من اتيحت لهم فرصة التحدث.
و بالطبع كانت الاسئلة من نوعية " ما دور سيادتكم في تنمية دور المرأه ؟ او مطالبة بوجود تعليم بمقايل مادي بجانب المجاني بالجامعات الحكومية .. مع العلم انه موجود بالفعل تحت مسمى التعليم المتميز و جلب العديد من المشاكل.. فكانت الاسئلة ما بين التافهه و الساذجة او تروج و تلمع لفكر او سياسة بعينها عدا مداخلة د/ابو الغار.
كنت اتمنى استغلال الفرصة افضل من ذلك بكثير ..لكن اهه اللي حصل
تحيه لبلال و جرأته

يوم الطالب العالمي

لحظة فتح باب جامعة القاهرة في يوم الطالب العام الماضي

في ذكرى يوم الطاب العالمي- 21 فبراير- تتحسر على حال جيل بأكمله عندما تتذكر ما كانت الجامعه عليه من كام يوم - 14 تحديدا- حيث الفلانتين و الثورة الحمراء لكنها للحبيبه .. فلا توجد ادنى صله بينها و بين الاشتراكيين.

معنديش اي اعتراض طبعا على الاحتفل بعيد الحب لكن ما فرسني ان يكون يوم الطالب العالمي مهمل بهذه الدرجة و لا يعطية احد قدر من الاهتمام و لو مقدرا ضئيل من الاهتمام بالفلانتين

المهم.. اليوم لا يقارن بنفس اليوم من العام الماضي . يوم الطالب العالمي العام الماضي كان حكاية .. اخوان مع جهة بالمسيرات و اسكتشات و معارض .. والاشتراكيين و الناصريين و الغد من جهة اخرى قاموا بدور جيد جدا بالاضافه لعمل بطولي و تحدي الامن و كردنته و فتح الباب الرئيسي للجامعه رغم انف الأمن .. و حركة كفاية من خارج الجامعه .. و حركة 9 مارس .. يعني كان يوم ملحمه

للاسف اليوم - اللي هو النهارده- لم يكن على المستوى المطلوب لكن .. هه خير و بركة و احسن من مفيش ...اكيد الظروف اتغيرت .. حالة الترقب لاي فعل يصدر من حركة الاخوان جعلته ياخذ حذره و يحافظ على طلابه, فلم ارى احد منهم اليوم بأي نشاط ملحوظ .. كذلك حركة كفاية لم تتواجد .

فمن قام بالمشاركة الطلاب الاشتراكيين و بعض طلاب الغد .. ستجد اليوم باهت اذا قارنته بالعام الماضي ..

اكتفى الطلاب بمعرض من اللوحات و توزيع البيانات في كلية الحقوق و الآداب و التجارة ... و كالعاده بفضل خفه دم بعض الطلاب و بلاهة البعض ايضا ..كان من الضروري ان تقع على مسامعك جمل زي "دول بتوع اتحاد الطلبة" " دا عشان المسجد الاقصى " " هو انتو بئا بتوع ايمن نور !!" " ايه يوم الطالب دا .. آآه زي عيد الطفولة كدا !! " "الله .. هما مش هيشيلوا الاشتراكية من الدستور " نظام امال انتو بتعملوا ايه يعني هنا! او من يلقي برأيه ان مفيش احسن من الحزب الوطني ... و في كتر خيرهم كتير بيفرحوا الواحد بالاسئله المنطقيه او الدخول في نقاش و حوارات تحس من خلالها ان لسه في أمل . بس للأسف النسبة معكوسة .. الاغلبية ساكتة سلبيه كسلانة تجد في عيونهم لا مبالاه و كأن الأمر لا يعنيهم ..هو احنا بنطالب بحقوقنا اللي هي حقوقهم ولا بنطالب بحقوق ناس تانيه !مادام اتحاد الطلبة و اللائحة الطلابية و الفساد و سرقة حقوقهم و الفقر و البطالة والمرض و غلا الاسعار ميهمش .. أمال ايه اللي يهم

التقشف الإخواني

مع اول يوم نزولي للجامعه النهاردة .. التمست حالة التقشف اللي فيها الاخوان.
الاقي الجداول اللي بيوزعوها اول كل تيرم بئت معمولة على ورق تصوير اخضر غريب كدا و الشعار بتاعه على ضهر الورقة معمول بالايد كدا ..زمان كان طباعة محترمة مرتبط بحملة و لوجو تلاقي الجامعة متغرقة بيها.. وبعد ما كانت يافطة الترحيب بتتعمل بتصميم و على خامات عالية ... الاقيها الترم دا قماش و معمولة عند خطاط ولا واحد فيهم اللي كاتبها.
اللهم لا شماتة يعني .. ربنا يكون في عونهم
لكن الضربة المرة دي جت في مقتل بعد تجميد اموال الـ29 قيادي في الجماعة .. اكيد منابع لتمويل نشاطات الجماعة
و اعتقد ان السبب في التصعيد دا.. او حجته , الحركة الغبية اللي قام بيها طلاب الاخوان في جامعة الازهر ..الاستعراض الرياضي او القتالي ولا الميليشيات الاخوانية زي ما يحبوا يقولو عليه .. محدش يقتنع ابدا انها حركة جت غلط من طلاب تصرفوا من تلقاء نفسهم... لا يمكن ان استعراض منظم زي دا يحدث بطريقة منظمة من اعضاء جماعة الاخوان المنظمة جدا و يقولو عمل غير مقصود ..لا كان مقصود و بهدف و من قيادات كبيرة .. بس مكانش ليها اي لزمة و لم تجلب لهم سوى الاعتقالات و التشهير بهم في كل الوسائل سواء الحكومية او خصومهم و تشويه السمعه و و.. اطرفها زي ان سفاح المعادي من جماعة الاخوان ... و الأطرف منه ان "جماعة الإخوان خطر على أمن مصر" .. بغض النظر عن هو فين أمن مصر دا اساسا !! يا ريت اللي قالها حد عدل اصلا
بس هل كل الاجراءات اللي بتتخذ ضد الجماعة وقياداتها و أفرادها هيؤدي لتصفيتها؟! ... اعتقد بعيد جدا .. مينفعش اصلا ان جماعة الاخوان تتلاشى او ميكونش ليها وجود.. بس اكيد هتتأثر تأثر شديد و دا اللي وضح و هيوضح اكتر من خلال نشاط الجماعة.

هو في ايه !

تكون قاعد فأمان الله يا جدع مستني الأستاذ ولا الدكتور اللي جاي و تسمع و تشوف العجب ناس داخلة و ناس طالعة ممكن مش من الجامعه اساسا .. بس اهو داخل يتفرج ... اللي يتكلم و يقوله بؤين و يمشي زي بتاع حكاية الفيل دا ... بس عادة هم اللي بيدخلوا كل مره .. فا وانت قاعد كدا هوب تلاقيهم دخلوا ... و تبدأ قصيده كل يوم

يرمي احدهم السلام ... السلام عليكم و رحمة الله - يرد البعض التحية- .... يتكرر النداء ( السلام عليكم ورحمة الله و بركاتة) محدش يرد المرادي .. يبتدو بئا و محدش عارف هما عايزين ايه بالظبط ! فينده احدهم.." يقول الله تعالى "و اذا قرأ القرأن فاستمعوا له و انصتوا لعلكم ترحمون" كل هذا وسط ضجيج المدرج .. و ما ادراك بضجيج مدرجات كلية التجارة ...اللي بتهزر مع دا و اللي بيشد شعر دي و اللي بيسمع اللي جنبه اغنيه مش عارف مين كدا و اللي بيلعبوا صلح ورا و شغلانه ... فوسط كل دا يتأهب احدهم و يفتح المصحف و يبدأ بصوت يكاد يكون مسموع للمحيطين في دائرة قطرها من 1:2 متر يكون هو مركزها و يبدأ

.. اعوذ بالله من الشيطان الرجيم .. و يسكت شويه و ينظر حوله ليرى من المناظر ما ذكرته اعلاه .. و يعيد الاستعاذة مره اخرى.. يقل الضجيج بعض الشي فيستعيذ زميل له مرة اخرى برده في مكان آخر فالمدرج برده .. و في كل مره يقل الضجيج بعض الشئ . فيعيدها ببسملة مرة دون تلاوة آيات .. و هنا تكون النقطة الفاصلة .. فكل من التفت اليهم لم يجد شئ غير اصوات متفرقه من المدرج عمالين يبسملوا و يستعيذوا ... فيعود الضجيج لمستواه الاصلي و ربما اعلى ... هب شوية و يمشوا!

قبل كل محاضرة تقريبا بيحصل كدا... و محدش عارف ليه .. هل هو غصب ؟ام يعتبرونه جهاد مثلا...

ولكن احيانا ينجحون في تلاوه آيات من القرآن فيدخلون المدرج و يبدأون بالصياح و هنا و على طريقة اللي يحب النبي يصقف .. يقفون من في المدرج من طلاب مسلمين على مسحيين و الطلاب المسحيين البعض يقف احتراما او يقف باسلوب لما نشوف آخرتها .. و الآخر ينفض و يفضل قاعد و يهزر..طبعا و القرآن بيقرأ ..فهو غير مجبر و من فعل هذا الوضع المحرج كام طالب لا اعرف ما سبب اصرارهم على ذلك قبل كل محاضرة ...

اعتقد ممكن بيعملوا كدا كإعلان عن نفسهم و تواجدهم ...بس كفاية اوي ان فكل حته تلاقي اسرة تبعهم و ملصقاتهم مغرقة الجامعة .. وانت ماشي تلاقي مقر طلاب الاخوان المسلمين .. ايه المطلوب تاني .

لكن الموقف دا انا شايف انه بيكون محرج جدا .. دانت بتقعد تقرأ قرآن و لا حد سائل فيك ..طيب و ليه الاحراج دا .. و بعدين هو اصلا مش مكانه ! .

و بقينا حيوانات !!

مره نفسي هفتني إني احضرالمحاضره ....دا أيام ما كان فيه حضور يعني

فنويت و دخلت المدرج.خير الله ما أجعله خير ... قاعد فالمدرج مستني الدكتور لما يشرف ...

وسط الدوشة و الهزار بتاع اي مدرج من كلية تجارة .. دخل شاب كده و معاه شاب تاني .مسكو المايك و قعدو يفعصو فية لغاية ما شغلوه ..اتنحنح احدهم و القى السلام و بعد طبعا ما أستئذنا انة هيضيع خمس دقايق من وقتنا السمين ... قال : هحكيلو يا جماعة حكاية فيل صغير اسمة ( ويلسون )اية دا ... فيل و صغير و اسمة ويلسون .. اية دا الجدع دا اهبل ولا اية ؟!!

استنى يا عم لما نشوف ابو زلومة دا هيقول اية ... مش هطول عليكم بالتعليقات اللي كانت بتتقال ... كمل الشاب حكاية عمنا ويلسون بطريقة شيقة مغيرا من نبرات صوتة و بآداء تمثيلي احيانا معبرا بيدية و تقسيما وجهه(ويلسون يا جماعة كان فيل صغير فالغابة .. عمال يتنطط و يمرح و فرحان بيلعب عالحشائش و مع الفيلة التانية ... كان شقي قوي و مبيبطلش حركة .. طول اليوم يجري براحتة فالغابة زي ما هو عاوز.لغاية ما في يوم نزلو مجموعة صيادين صوب احدهم السنيبر تجاه ويلسون و هوب جهه السهم المخدر فويلسون ... وقع ويلسون على الأرض .. حملوه معاهم فالسيارة .

شاهده أحد الاغنياء من أصحاب النفوذ و عرض عليهم شراءه و بالفعل اشتراه منهم

وضع هذا الشخص ويلسون بقفص صغير بحديقة حيوان يمتلكها و قيده من قدمة بسلسلة و بآخرها كرة كبيرة من الحديد ((هنا كان الدكتور شرف و طلب من الشاب انه ينجز ... و الشاب استمر بس بكروتة )) و كمل>>... و لما استيقظ ويلسون من المخدر و أخذ فالتحرك حتى استرد طاقتة لكنة كان متعود عالحركة و التنطيط و النشاط ... فأخذ يحاول ويحاول .. لكن كانت القيود تمنعة.

فحاول أول يوم حتى أجهد و نام من التعب و أخذ يحاول كل يوم و ينام في آخرة من الأرهاق ... و حاول يوم و اثنين و عشرة ... حتى فقد الأمل و استسلم للقيود التي و ضعت له.و في أحد الأيام جاء الصياد لرؤية ويلسون فوجده خامد ساكن على عكس طبيعتة نشيط لا يهدأ.

)اهو احنا دلوقتي زي ويلسون دا بالظبط.. المفروض انك متستسلمش و تعرف حقوقك و واجباتك ... و انا بدعوكم لمؤتمر تنمية بشرية بمدرج كذا يوم كذا ... و انصرف الشاب طبعا مخلصش من التعليقات ... دا داخل اسوار كلية تجارة.... بس بردو الحكاية شدت ناس كتير و اثبتت ان لسة فية ناس بتحس

... دي مره و بقينا زي الفيل ابو زلومه ويلسون طب ايه تاني ..؟!!

وانا قاعد في احدى مقاهي وسط البلد اللي مليانه باصحاب الاتجاهات السياسية المختلفة .رميت و دني مع واحد من لهجته باين انه مش مصري ولا شكلة حتى ... كان نضيف شويتين .. بيكلم ناس من المصريين اللي قاعدين معاه و اللي باين عليهم انهم مصريين . ... بيقولو يا سيدي ان الشعب المصري بيفكره بنظرية القردة الخمسة.و نظرية القردة الخمسة هي ان تأتي بخمس قرود و تضعهم في قفص و تضع به سلم و في اعلى القفص كام صوباع موز ... شوية كدا و احد القرود هيحاول الصعود للحصول على الموز ... فتقوم انت برش باقي الاربع قرود بالماء و ضربهم و ازعاجهم ... شوية و هيحاول واحد تاني يوصل للموز ... كرر نفس الازعاج لباقي القروود .. شوية و هتلاقي ان اول ما يجي قرد يطلع عشان يجيب الموز باقي القرود هتمنعة و تضربه ... خرج قرد من القرود الخمس و بدله بواحد جديد لسه ميعرفش حاجة و هنسميه عباس مثلا ...اول ما عباس يحاول يطلع للموز القرود التانية هتظبطه ... طبعا هو مش فاهم في ايه ... هيكرر العملية تاني و القرود هتضربة تاني ...شوية و خرج قرد من القدام (اي واحد غير عباس)و دخل قرد جديد ميعرفش حاجة بردو معاهم ...هيحاول القرد الجديد الصعود للحصول على الموز ... هب هتلاقي القرود قامت علية قفيان على شلاليت و بكسات و هتلاقي اكثرهم حماسه عمك عباس ... اللي اتضرب من غير ما يعرف ليه ... استبدل جميع القرده القدامى قرد قرد ...لتجد ان بمجرد محاولة احدهم الصعود تلاقي الباقي قاموا علية و هاتك يا ضرب ... من غير ما يحاولو يفهموا ولا يفكروا هو في ايه .....

هذا حالكم يا مصريين .

الله يخربيت اللي خلانا زي الحيوانات .... مره فيل ( ويلسون ) و مره قرد و الله اعلم المره الجايه هتكون ايييييييه .