افتكرت موقف كان فكرني بموقف افتكرته قبل كده .. و كلاهما اثبتولي ان مفيش فايده من المقاومة و ان القعدة بالبيت في رمضان تضمن الحفاظ على الصيام الى حد ما ...
نزولك الشارع يخليك تقابل العوامل المضادة للصيام من زحمة و اخوات فاضلات مش محتشمات و ناس قليلة الذوق ..اول ماتنزل تلاقي الارض منبتة بنى آدمين على الصفين ... واقفين متحفزين مستنيين اي وسيلة مواصلات .. تاكسي - اوتوبيس - ميكروباص - حنطور - كاراتة .... اول ما يظهر اي نوع من الوسائل .. يقومو يحاصروها ثم ينقضوا عليها و ياخدوا السواق أسير عشان يوصلهم عنوه ....
نيجي بئا للاخوات المستفزات ... تحس انهم بيتعمدوا يلبسوا كدا في رمضان ... تقريبا بيكونو عاوزين ياخدوا ثواب افطار صائم ... بس على طريقتهم بئه ..
الموقف اللي افتكرته لما افتكرت الموقف الاولاني كان فالمترو.. الاتنين على السلم .. واحد وانا طالع و التاني و انا نازل ..
مستعجل و و رايح الجامعة نزلت التحرير و رايح اغير لمترو الجيزة .. عمال امشي جاريا و اسحب و اضرب غرز ما بين الناس لغاية ما وصلت للسلم و نازل اهه ... الاقي الناس كلها نازلين و فيه نص دايرة خالية من البنى آدمين محدش متواجد فيها خالص ... قولت اشطة ..اتخللها و اتخطى الفوج دا كله بخطوه واحده ... يادوبك دخلت جوا محيط النص دايره دي لاجد ان مركز هذه النص دايرة انثى !! بس مش اي انثى.. طبعا لقيت نفسي الوحيد جوا المنطقة المهجورة دي الكل بيبص عليك بئا و الموقف كان مش لذيذ خالص ..
تنحيت جانبا حفاظا على صيامي و على الامن العام... و كل شوية تلاقي واحد مستعجل غيري يقع فنفس النص دايرة التي اشك في وجودها لولا شهر رمضان الله يكرمة...
في نفس ذات السلم بس طالع المرة دي بئا فأمان الله تلاقي خير الله ما اجعله خير حاجة بتلمع قدامك ... تبص غصب عنك طبعا تلاقي زخارف اسلامية رائعة بالترتر بئه و أوعى .... تصاحبة حالة من الاندهاش مع فتح البؤ ... لأن الزخارف الرائعة دي موضوعة في مكان استراتيجي ... أعلى الجيب الوراني .... طب الواحد يعمل ايه ... بص فالارض .. بصيت فالارض ... بردو تسمع اصوات لازم تبص عشان تشوف فية ايه .... اخ و بعض الاخوات على ما يبدوا انهم على ديانة اخرى غير الإسلام ... واقفين يهرجوا و هاتك يا ضحك -ضحك مش من العادي دا لأ ... من بتاع التليفزيون - ... انا لقيت حاجة افتكرتها فالاول زعافة .... طلعت شعر الاخت عماله تهرج مع الاخ و يلعبلها فشعرها ... و الواحد واقف عمال يحرق في دمة ... طب نديهم ضهرنا و نرفع الاريال !... الاصوات هتستفذنا ... ايه العمل!
هي القعدة فالبيت .. بلا تعليم بلا اسمه ايه د
كان الله في عون الملك اللي على ايدي الشمال ..
و شياطين ايه دي يا خويا اللي محبوسة ... الواحد ولا حاسس بيهم .. بيهم من غيرهم هي هي نفس كل حاجة بتيجي و تروح ... عالاقل و هما موجودين عاملين منظر كدا و بيونسونا .. واهو نتحجج بيهم
3 comments:
أخى الكريم
يحتاج كل واحد منا وواحده ايضا فى هذه الايام الى الكثير والكثير غير غض البصر
نحن جميعا نحتاج الى كلمه سر ! ايوه كلمه السر اللى تخلينا لا ننظر الى المحرمات عن حب وطيب خاطر
كلمه السر اللى تخلينا نحب غض البصر
كلمه السر اللى تخلينا مسلمين
كفايه تشويق بقى لحد كدا ! ايه كلمه السر دى ؟ هتلاقيها فى البوست الجاى بتاعى ان شاء الله
:D
انت بتعمل اعلان للبوست الجاي ولا ايه ;)
و انا منتظره و متشوقله
انا و الله بحاول اغض بصري بقدر الإمكان ..بس هما اللي بيجو ادامي (",)
شرفني ردك و في انتظار كلمة السر
العوامل المضادة للصيام ستستمر حتى بعد آذان المغرب.. فهي مضادة لصيامك في اليوم التالي!
من مشاهد رمضان المنقضي مشهد لسيدة منقبة متسولة انتظرت فرصة انتهاء الصلاة لتتسول بصوت عالي جداً في قلب المسجد .. الأمر الذي أثار غضب المصلين بطبيعة الحال ..
وبعد عودتي للمسجد الذي كنت أصلي فيه في أواخر رمضان المنصرف بعد جفاء جعلني أصلي في مسجد آخر .. وجدت نفس تلك السيدة تحاول مزاولة نشاطها هناك..
وهناك خطباء مساجد يجعلوك تنقلب على صيامك بسرعة الصاروخ ، منهم أحدهم الذي دخلت معه في نقاش عن المشايخ المطربين في صلاة التراويح ، بيقول لي سيادته أنا صح وانت غلط ومش حينفع النقاش بالطريقة دي!
مش حنحس برمضان إلا إذا انضبطنا فيه ، مش التعامل معاه على إنه حصة ولما يخلص ننزل م الفصول ع الشوارع ونتحرش ونلمس و.. و..
Post a Comment