هو الناس المؤيده لاستخدام الحل الامني فقط لانهاء الازمة مش واخدين بالهم ان علشان تنهي الازمة لازم تموت كل العدد اللي بتشوفه بيتظاهر دا او على الاقل اكبر عدد منهم يكون رادع للباقي انه مينزلش!
عارف انت كدا بتتكلم في قتل كام انسان؟؟
انت عارف اللي هناك مين؟ اخوان وجماعات اسلامية وارهابيين وشايلين سلاح..اوك
بس افتكر بردو ان معاهم مواطنين عاديين متضامنين معاهم.. ومواطنين مش متضامنين معاهم بس ضد اللي بيحصل.. وغلابة مضحوك عليهم.. وناس شايفين من طرف واحد زيك كدا و دول مش شايلين سلاح!
الناس اللي بتموت دي مش مقطوعين من شجرة .. ليهم اهل و معارف ومش هيسكتوا على حقهم
وبغض النظر عن كونهم على حق او على باطل مجرد احساسهم بالقهر كفيل بتجديد العنف والخاسر الطرفين وانت والبلد ومحدش كسبان.
اللي هيتقتل جنبه حد هينزل يجيب حقه ولو مش شايل سلاح هيشيل سلاح
الحل الامني مش حل .. و تسبب في اول يوم لاكتر من 700 قتيل من المعتصمين و اكتر من 60 من الداخلية و قانون طوارئ على الجميع.. وحظر تجوال شهر بينيم البلد ويقفل الاشغال من الساعه 7 !
مستني تكمل في الحل الامني؟؟ لما توصل لعمليات ارهابية وتفجيرات عشوائية تخليك تخاف تنزل من بيتكو اصلا؟؟
ولا لما الداخلية يتشد عليها وتهرب و تلاقي الاخوان مسيطرين على محافظة من محافظات الصعيد.. العواقب وخيمية
وعاجلا ام آجلا الطرفين لازم هيقعدوا يتفاوضوا.. بمزاجهم او مش بمزاجهم .. مش هيقعدوا يقتلوا في بعض كدا كتير .. ولو استمر الاقتتال فانت كدا بتتكلم عن حرب اهليه!
شفنا الحل الامني وصلنا لايه
والطوارئ اتطبقت على الكل.. وطرق متقفلة ومافيش امان
و مشاغل بتتقفل من الساعه 7
وآلاف القتلى والمصابين
حرق وتخريب مؤسسات ودور عبادة
وماشيين في سكة الحرب الاهلية ان مكناش وصلنا
فكرني بقى الاعتصام اتفض ليه ؟؟
قالك علشان مصالح واحوال المواطنين.. وعلشان نحقن الدماء.. ونحافظ على البلد من الحرب الاهلية..!!
نقف ونفكر ولا نكمل في السكة دي؟؟!
ولذلك احترمت استقالة البرادعي.. كونه رافض الحل الأمني و رافض انه يكون طرطور تأخذ قرارات لا تتفق مع مبادئه وضميرة و يسقط قتلى وهو في السلطة.. حقيقي متسق مع ذاته
وعلشان كدا مستغرب من تمسك برحيل مبارك لسقوط شهداء و كررها مع المجلس العسكري و رفع الشرعية عن مرسي مع اول شهيد .. ومع سقوط المئات الآن يعطي التبريرات!!
