طيب علشان الناس اللي دماغها بتودي وتجيب بعد اذاعة تسجيلات التنصت على مكالماتنا
كل الملفات اللي كانت في المقرات هي نسخ والاصل بتاعها في ارشيف الوزارة، دا غير النسخة الالكترونية اللي في لاظوغلي .. ولاظوغلي محدش لمسه
دا بالاضافة ان منصور العيسوي وزير الداخلية الاسبق صرح ان ارشيف وزارة الداخلية كامل لم يمس .. يعني الملفات كلها لسه عندهم من 2008 .. لو فيها حاجة تدين متقدمتش ليه لجهات التحقيق التحقيق من ساعتها؟؟
وبعدين هي ايه المخططات اللي بنفذها علشان نسقط البلد؟؟!!
ومدام احنا بنخرب مصر امال انتو بتعملوا ايه ؟!
وايه المعلومات اللي نعرفها عن البلد تضر بالأمن القومي علشان تقولوا عملا وجواسيس!
احنا كل اللي نعرفه فشلكم وفسادكم او حفاظكم على مصالحكم الشخصية على حساب الناس الغلابة
نعرف الشباب العاطل اللي كل حلمه يسافر ويسيب البلد من قرفكم حتى لو هيموت في البحر
نعرف أهالينا اللي جالها السرطان علشان وزير فاسد ضيع اجيال
نعرف ناس بتعيش في عشش وقبور والدولة بتبني قصور وتوزع اراضي على الحبايب
نعرف الزبالة اللي في الشوارع وشركات النظافة اللي اتعاقدتم معاها لسنين
نعرف بلد بتتعك وتغرق في شبر مية لما النيا تمطر
نعرف الانتخابات اللي بتتزور
نعرف مستشفيات الناس بتموت فيها مش تتعالج
نعرف تعليم بيخرج ناس مبتعرفش تقرأ وتكتب او تاخد ورقة ملهاش لزمة بتسموها شهادة
نعرف الشباب الحاصل على مؤهلات عليا ويشتغل شيال
نعرف التعذيب اللي في الاقسام وعقد ضباطكم النفسية ومعاملتهم الوسخة
نعرف ناس ماتت في عبارات وقطارات
نعرف القتل اللي في الشوارع من غير حساب
نعرف حبسكم لشباب عايز يشوف بلده احسن بلد في الدنيا
نعرف وساختكم وتشويهكم لشباب كل جريمته انه عايز يعيش انسان في بلده بدل ما الغربة تكون احن عليه من وطنه ..
دا ذنبنا اننا بنحلم ولا ذنب اللي وصلنا لكده!!!
No comments:
Post a Comment