Fasakonya

ماله المجلس و يرحل يروح فين؟ و هيسلم السلطه لمين؟!

2012-01-21T07:00:00.000-08:00

_أشمعنى السلطة تتسلم لمجلس الشعب؟
لأنه الجهه الوحيده المنتخبه من الشعب واللي جايه بارادته .. يختار هو رئيس أو مجلس رئاسي من المجلس نفسه أو من خارجه المهم ان السلطه تتسلم من المجلس العسكري اللي أثبت فشله في اداره البلاد و اللي أثبت انه بيسعى لحماية مبارك و اجهاض الثورة بكل الطرق و كل لحظة قاعدها في السلطه خطر على البلد و اقتصادها و ثورتها و ثوارها.
_طيب ما كدا هنسلم البلد للاسلاميين؟
الاسلاميين مش بعبع أوي يعني و اساسا السلطه هتتسلم لمجلس الشعب اللي أغلبه اسلاميين باختيار شعبك .. و دا لازم يحترم.
_طيب و الاستفتاء.. مش دا كان رأي شعب بردو ولازم يحترم؟
محدش معترض على الاستفتاء رغم ان مش منطقي تماما انك تنتخب رئيس متعرفش ايه صلحياته ولا هتنتخبه لنظام برلماني ولا رئاسي !! بس ما علينا نمشي على نتيجة الاستفتاء و بعدها نعمل انتخابات الرئاسة ، مشكلتنا مش مع الاستفتاء.
طيب و المجلس لو مشي البلد هتخرب و هنصيغ من غيره ..ثم هو هيرحل يروح فين؟!
تخرب ليه!! هو المجلس كان ايه خبرته في السياسه اساسا و في خلال السنه دي ماحنا شفنا الخراب بجد و أدينا وصلنا لأنبوبة ب 40 جنية ؤ أزمة بنزين ؤ غلاء أسعار ؤ تدني. مرتبات
عموما نقصد بيرحل انه يرحل من السلطه و يرجع تاني لثكناته يرجع لمهمته و واجبه الطبيعي و هو حمايه و تأمين حدود البلاد و الدفاع عنها وقت الخطر
_طيب ما المجلس قال هيعمل كدا .. ما تستنوا الشوية دول ؟
و مبارك قال هيعمل كدا و قال ٦ شهور و المجلس قال هيسلم السلطه بعد ٦ شهور و كانت هتمتد ل ٢٠١٣ لولا ضغط الثوار ... مشكلتنا ان اللي يدير المرحلة الانتقالية و ينفذ نتيجة الاستفتاء و يعمل انتخابات الرئاسة و يشرف على صياغه دستور البلاد يكون حد ضد الثورة و مش مؤمن بيها اساسا و موالي للنظام الفاسد السابق ... و يفرض وضع استثنائي لنفسه في الدستور الجديد يخليه يتدخل في سياسات الدولة و و يكون فوق الحساب .. و دا اللي مش هنقبله أبدا و بنسعى نتخلص منه فاسرع وقت علشان البلد تهدى و نبدأ كلنا نبني بلدنا على نضافه

حملة مقاطعة البائعين داخل الميدان

2011-07-18T06:58:00.000-07:00

شكل الميدان زفت بسبب البائعيين
انا شايف حاجتين ذكرتهم في الاستيت دي

https://www.facebook.com/m.maher87/posts/10150703859005551

... اولهم حملة لمقاطعة الشراء من البائعين جوا الميدان و ان اللي عايز حاجة يجي على نفسة و يجيبها من برا الميدان .. و لو الناس التزمت بيها هم هيمشوا لوحدهم إلا اذا كان ليهم اهداف تانية غير الربح من وقفتهم دي ...

الحاجة التانية لازم يكون في لجنة لأمن الميدان متكونة من كل التيارات
كل تيار يحدد مسئول امن .. و مسئول الامن دا يحدد الافراد اللي هيرشحهم من مجموعته للمشاركة في تأمين الميدان
علشان لازم كل بوابات الميدان تكون متأمنه و نكون عارفين مين اللي واقف عليها .. و علشان منرجعش نستغرب هي البياعيين دخلوا تاني ازاي

اشمعنى ساويرس !

2011-06-28T04:52:00.000-07:00

احب اقول حاجة بمناسبة الهجمة الشرسة و دعوات المقاطعة اللي حاصلة على نجيب ساويرس:

الصورة اللي نشرها ساويرس "على حسابة الشخصي" على تويتر قديمة جدا و مرتبطة بالفيديو بتاع الشيخ محمد المنجد 2008 اللي قال فيه "ان ميكي ماوس شرعا يقتل في الحل و الحرم" و اللي بعده اتفسرت على انها فتوى تحل دم ميكي ماوس. و ظهرت الصورة و كان واضح ان معناها ان ميكي خاف على نفسة و ربى دقنه .. يعني الموضوع هزار في هزار
الصورة في وقتها الحالي انا مش شايفها تريقة على النقاب و اللحية .. زيها زي اي كاريكاتير بيعبر عن الانتشار و الظهور المكثف للاسلاميين بعد الثورة لا أكثر.
ثم بالنسبة لدعوات المقاطعة .. فرحانين علشان المؤشر انخفض !! طيب ما كل ده هيجي على دماغنا .. هي الاسهم كلها بتاعة ساويرس لواحده ؟!! يملكها آلاف المساهمين.. ولا العاملين في شركاته قرايبة مثلا !! .. في عز ما عمالين ندعوا لدعم الاقتصاد نتفاخر اننا خلينا المؤشر انخفض و لسه !!
و رغم ان في اعمال كتيرة مشابهه و محدش علق .. اشمعنى ساويرس و الانتقام السريع من موبنيل و حزب المصريين الاحرار ؟!

انا شايف ان دعوات مقاطعة ساويرس ماهي الا حقد و نفسنة من الراجل مش اكتر او ليها ابعاد سياسية او لعب بيزنس و تصفية حسابات .. و انا شخصيآ قابل أعتذاره ... ومن الأفضل اني اقاطع كل ما هو اسرائيلي ولا امريكي بعد حرقهم القرآن .. مش هقاطع أبن بلدي وأقفل بيوت مسلمين كتير بيشتغلوا معاه ...
و بعدين مش الباربي لما جت تتباع في دول الخليج لبسوها عباية و حجاب و سموها فلة .. ايه المشكلة لما ميني تنتقب و ميكي يطلق لحيته !

الفريق التالت

2011-06-21T06:59:00.000-07:00

قبل الثورة الشعب كان متقسم 3 فرق
فريق الوطنيين اللي بيتدعي الوطنية و فريق العملاء و الخونة اللي بيحاول يعارض ، و باقي الشعب في فريق تالت بيشتم الفريقين لان محدش فاهمة او معبره.
بعد الثورة الوضع اختلف شوية ، اصبحنا كلنا وطنيين .. بس وطنيين مسلمين و وطنيين كفار و كل شوية بعاركة جديده زي عاركة نعم و الدستور اولا ...
و الفريق التالت لسه محدش معبره
اعتقد ان لما الفريق التالت يحس ان في حاجة بتحصل لصالحة هيكون حصل التغيير

تانيا صالح عالعين

2011-06-17T06:46:00.000-07:00

عَ العين موليّتين 18 موليَّ

جسر الحديد انقطع من دوس رجليَّ

عندي 18 ملّة كلّن عم يبكولي

شي عم يبكي من القلّة و شي عامل قبّولة

إذا بتلاقولن حلّة يا ناس قولولي

أحسن ما بكرا الفلّة كلّها تطلع فيَّ

عَ العين موليّتين 18 موليَّ

جسر الحديد انقطع من دوس رجليَّ

كلّ مين في عقل براسُه بيصير علمانيّ

العالم ماشي لَ قدّام و عم نمشي خليفاني

قصّتنا بدّها دكتور تحليل نفسانيّ

يحكّمنا من هالعلّة و يخفّف همّ عليّ

عَ العين موليّتين 18 موليَّ

جسر الحديد انقطع من دوس رجليَّ

كلّ ملّة عندها مشروع ، كلّ ملّة دكّانة

كلّن اللّه باعتلن إلهام ربّانيّ

الجسر اللّي انقطع مرّة بينقطع مرّة تاني

أهليّة بمحلّيّة منكفّي المسرحيّة

عَ العين موليّتين 18 موليَّ

جسر الحديد انقطع من دوس رجليَّ

~~~~~

تطرح الفنانة تانيا صالح أغنية "عالعين مولايتين" (للفنانة الكبيرة سميرة توفيق) من جديد، إنما بكلام مختلف من كتابة صالح نفسها، تنتقد من خلاله الوضع الراهن الذي أصبح يحتاج إلى خطة طوارئ سحرية ليجد سبيلاً إلى الخلاص

الأغنية التي نسمعها أخيراً على إذاعة "صوت الشعب" بشكل مكُثف يظهر أن المستمعين يطلبون سماعها مراراً نظراً إلى سلاسة اللحن الذي يعيش في ذاكرة المستمع العربي... وصولاً إلى المضمون الذي تنتقد فيه صالح الحالة التي وصلنا إليها. اللافت أن صالح كتبت هذه الأغنية من ستة أعوام لكنها قررت الإفراج عنها اليوم لتساهم في تحريك وجدان الجمهور اللبناني على وضع لم يعد مقبولاً السكوت عنه وخصوصاً أنه ينعكس سلباً على يومياتنا ومستقبلنا

تغني الفنانة تانيا صالح للـ 18 ملّة في لبنان، والتي أصبح لكل منها مشروع خاص للبلاد، كما لو أن الجميع "فاتحين على حسابهم" معتبرين أن مشروعهم هو "بأمر ربّاني"... وتتابع صالح: كل مين في عقل براسو بصير علماني/ العالم ماشي لقدام وعم نمشي خليفاني... في إشارة إلى حث المواطن اللبناني على ضرورة إلغاء الطائفية وأن تكون المراكز والمناصب للشخص المناسب في المكان المناسب، بعيداً عن عقد الطائفية التي أظهرت أنها تزيد الشرخ والتشرذم بين أبناء البلد الواحد

في أغنية تانيا صالح دعوة إلى التفكير في المستقبل وأخذ العبر من الماضي الذي أكد لنا مراراً أن الطائفية هي علّة لبنان من دون منازع، حتى أصبح تعدد الطوائف الذي من المفترض أن يشكل غنى للبنان، هو النكسة الحقيقية التي أسقطتنا في دوّامة لن تنتهي فصولها ما دمنا لن نمتثل للتاريخ

منقول .. للتفكير في المستقبل المصري

مصر هتتقدم بيهم

2011-06-01T17:05:00.000-07:00

امن الدولة معندوش ورقة اخيرة

2011-03-08T21:52:00.000-08:00

بعد ما قريت النوت دي على الفيس بوك و اللي بعنوان

الخطة القذرة ليوم الثلاثاء 8\3 .... الورقة الاخيرة (الفتنة الطائفية

الصراحة مش قادر اسكت و لا اهزر كالعادة في النوت زي كل مرة ...... اصلي كنت مستغرب قوي بقالي كام يوم من الي بيحصل .... في موضوع الفتنة ده و علشان الموضوع مش واضح .. فمحدش فاهم فيه حاجة ... بس النهاردة و انا قاعد بالليل كدة قعدت اقرا حبت اخبار كده علي الموضوع متفرقة و استرجعت كام حاجة مكنش ليهم علاقة ببعض خالص و بعد كدة لقيت ان المواضيع متربطة بجد و ده الي اداني الدلييل ان فيه ايادي بنت ستيين تيييييييييييت بتلعب و عايزة تولع البلد .... انا حقولكم الاخبار بالترتيب الي عرفته فيه و بعد كدة نركب مع بعض الصورة كاملة !!!

اولا : سمعت اخبار الخناقة الي حصلت في اطفيح ... و الكلام الكتير الي عليها و البنت و الولد و العمدة و العلتين و كله كلام مش رسمي ... يعني محدش فاهم حاجة .. كل المعروف ان فيه مسلميين راحوا هدو الكنيسة .. ليه ؟؟ محدش متاكد ... قعد الموضوع ده مستفزني جدا .... يعني ازاي يعني .. يعني احنا قعدنا شهر تقريبا من غير امن خالص .. و مفييش كنيسه اترمي عليها طوبة ده بالعكس كانت الروح جميلة جدا لدرجة ان كان فيه خبر مش عارف فين ان في سيناذ و لا مطروح و لا فين ان السلفيين نزلوا يحموا الكنايس ... .. مين امتي لما حتي المسلميين و المسيحيين بيتخنقوا حد بيروح يهد كنيسة و لا جامع ... جديدة ده ... لا و مين ده الي كان رايق جدا و صور الهدم بتاع الكنيسة و الناس بتقول الله اكبر و الحاجات ده و عمله كمان ابلوود علي النت ... اصلو اولا اكييد كان مسلم مش مسيحي و اكييد كان مثقف كدا انه عنده نت و عملوا ابلوود علي يوتيوب .... ميين ده الي في قرية اطفيح لمو اخزة ممكن يكون يفهم يعمل كده و احنا شايفيين في الفيديو ان كل الموجودين ناس فلاحين بسطاء .. معتقدش ان عوض ابن ولد محمديين اللي كان بيصور عانده اكونت علي الفاسبوك

ثاني خبر : لقيت ايفينت علي الفاس بوك و حد من اصحابي الي اعرفهم بعتهولي مش هوه الي عملوا بس لقيتو بعتهولي بعنوان "وقفة اسلاميه لاخراج كاميليا شحاته من الكنيسة " .... قلت ايه العبط ده هوه ده وقته ؟؟!! هوه ايه الي فكر الناس بالموضوع ده دلوقتي ؟؟!! مش عارف ... رحت نسييت الموضوع خالض و رفضت المشاركة

ثالث خبر النهاردة : ناس مسيحيين من عزبة الزباليين اللي علي مطلع المقطم نزلوا هددو الناس و ولعو مش عارف في ايه و كسروا عربيات و ووقفوا الطريق .... قعدت كدة قلت اده هوه ايه اللي بيحصل ؟؟!! ... انا فاهم المظاهرات الي بقالها تلت ايام معمولة قدام الاذاعة و التلفزيون .... علشان حق الناس تستفز الصراحة انا نفسي لما شفت الفيديو استفزييت .... بس مفهمتش ليه بقي بتوع العزبة نزلو النهاردة بالذات ؟؟؟ ما كان ينزلوا من اول يوم ؟؟! و مكنتش فاهم برضه

رابع خبر : اشتبكات بالطوب بين اقباط و سلفيين علي الاتوستراد ... و في الخبر ان السلفيين دول كانوا عملين وقفة اصلا علشان كاميليا شحاته ؟؟!!!!!! قولت اوباااااااااااا ،،، اه يا ولاد التييييييييت ..... رجعت للايفينت بتاع الوقفة الي كان اتباعتلي لقيتهم عايزين يعملو الوقفة بتاريخ الثلاثاء ٨\٢

لا ... ده فيه تخطييط كبير و ناس بتلعب علي كبيير ... عايزيين يولعو الدنيا و يخلو الناس تضرب في بعض و تقتل في بعض و يبقي الراي العام منشغل بالحكاية ده علشان يهربو بقي و لا يتنييلوا او يطلع ناس بجد تقول احنا اسفين يا امن الدولة .... و من وجهة نظري القصيرة ده اخر ورقة بيلعبوا بيها ... الفتنة الطائفية .. عايزيين يولعووها ،،، فكر شياطين بجد ... بس الناس لازم تكون اوعي من كده ... احنا ان شاء الله حنروح يوم الجمعة لاطفيح .. حنعمل وقفة سلمية تضامنا مع الاخوة المسيحيين و نساعد علي الاقل في رفع الانقاض حتي لو بصورة رمزية لحد ان شاء الله ما الجيش يبني الكنيسة تاني زي ما وعد

انا متفق معاها جدا إلا في حاجة واحده ..ان امن الدولة معندوش ورقة اخيرة

الفتنة الطائفية قد تكون الورقة الاخيرة في حالة التخلص من جميع عناصره فورا .. و قد تكون القبل الاخيرة في حالة المماطلة في التخلص منه ... لسه فيه ورقة الإرهـــاب

خصوصا اني شايف تبريرات مستقبليه بتظهر .. اولها هيكون استغلال الحالة اللي سببتها الفتنة الطائفية و الظهور القوي للسلفيين مؤخرا - المطالبة بتطبيق الشريعة و الخلافة الاسلامية - الاثارة المتعمدة لمناقشة المادة التانية من الدستور - نشر اخبار هروب اعضاء الجماعات و التنظيمات الجهادية و التكفيرية

لازم يتم القضاء فورا على جميع عناصر امن الدولة قبل البدء في استخدام الورقة التالية

المره دي لو نجحوا في استخدام ورقة الفتنة الطائفية

و اخشى ان عدم نجاحهم في استغلال ورقة الفتنة الطائفية يكون مجرد فتح مجال و تمهيد لورقة الارهاب

و ربنا يستر

من المواقف المسخرة - ليلة اقتحام أمن الدولة - مدينة نصر

2011-03-05T22:37:00.000-08:00

بعد اقتحامنا امن الدولة بمدينة نصر امبارح

طلعنا للدور التاني و كنا اول ناس تطلع و مفيش غيرنا

لقينا طرقة في آخرها باب مكتوب عليه غرفة مؤمنة بالغاز

fm200

و كاميرات مراقبة و جهاز كدا جنب الباب فية لمبة بتنور و صفارة متقطعه زي بتاع القلب دا و جو قلق كدا

قلنا بس أكيد جوا في بلاوي متلتلة و الغاز دا اكيد سام .. حيث ان لو حد دخل من غير الكارت الممغنط يموت طوالي

المهم قلنا لازم نقتحم و تلثمنا و اللي حط الكوفية على مناخيره و اللي تلثم بتي شيرتة و اللي سابنا و طلع يجري اساسا

و 1 2 3 هوب اضرب و اجري يا جدع .. الباب اتفتح اتهبد في الحيطة و اتقفل تاني .. ما علينا

هتخطى مرحلة الشك ان في حد قفل الباب من جوا و الكلام دا

استجمعنا شجاعتنا و دخلنا .. شمينا شمتين كدا .. مفيش ريحة غاز مميت ولا حاجة

و اصلا الباب بيودي على طرقة تانية فيها غرف بتاعه مكاتب زي الكول سنتر كدا

و على الحيطة جنبنا ورقة ارشادات الغاز اف ام 200 اللي بيقولو عليه دا .. و اللي مطلعش سام اساسا

و طلع نظام إطفاء حرائق ذاتي و لامؤاخذه

و العلم نورن :डी

و كل ثورة و انتم طيبين

آخر كلام - بخصوص جمعة الرحيل

2011-02-04T00:36:00.000-08:00

يا جدعان حرام عليكو بجد

الناس اللي جابتلكوا حقوقكم و كرامتكم متستاهلش منكم الشتيمة و النقد و انكم تنقلبوا ضدهم كدا

بموقفك دا بتدعم كل رجل اعمال عمال ينهب في البلد و خايف مصيرة يكون زي عز

كل عضو مجلس نجح بالتزوير و خد الحصانة و عايز يحقق اهدافة الشخصية و مش عارف

كل عضو حزب وطني كان ماشي بكارنية الحزب على انه المفتاح السحري دلوقتي بيتضربوا من الناس

كل ظابط و امين شرطة و مرشد بيفرض اتاوات على الناش و كرامة البشر عنده متساوييش يقدر يعمل اللي هو عايزة فاي وقت

كل دول بيبزلوا كل جهودهم و بيدفعوا ملايين علشان يرجعوا الحال زي ما هو

كل دول منتشرين يشوهوا في صورة و سمعة الناس اللي نزلت في التحرير

الناس اللي نزلت في التحرير اللي جابتلك حقوقك و كرامتك و فلوس البلد اللي بتتنهب من سنين

انت لما بتقف ضدهم بتدعم كل الفئات اللي ذكرتها فوق دي

عارفين يعني ايه تكون واقف و تيجي في اللي جنبك رصاصة تنهي حياتة ادام عنيك .. و انك ممكن تكون مكانة.. و لامبالاة الشخص اللي ضرب الرصاصة و استهانة صاحب الامر بضرب النار بالبنى آدمين اللي ادامة؟؟ .. اعتقد انك لو عشت اللحظة دي هتعرف انا ليه مصمم انزل بكرة حتى لو فيها موتي .. انا مش عايز اولعها بس الناس اللي ماتت و اللي اتجرحت و اللي اتبهدل...ت و سهرت في الشوارع ماتستاهلش اننا نتخلى عنهم و نضيع حقهم

احنا نزلنا لهدف و هنكملة

واحد ولع في البلد كلها و عيش الناس في رعب و قطع كل انواع الاتصالات علشان يحافظ على مكانة .. واحد في نفس اليوم اللي وعد فيه بانه هيصلح و الناس صدقتة قتل 5 و جرح اكتر من1400 و اعتقل العشرات

هستنى منه ايه عدل تاني ؟؟

تقول خاين تقول عميل ولا مضحوك عليا و معمولي غسيل مخ

هنزل بكرة ..

و لو بكرة فشلنا و مقدرناش نحقق حاجة .. اوعدكوا انها هتكون آخره مره اتكلم فيها عن حق حد من الشعب ابن الــ ولا بلاش

دا لو متلمناش كلنا بعدها اصلا

سلامي يا شعب العجايب

خد بالك -دعوة للنزول 25 يناير 2011

2011-01-21T01:36:00.000-08:00

دعوه و تعليمات ليوم 25 يناير
لو كلنا .. هنقدر

الفديو يحتوي على مقاطع من فديوهات تعذيب حقيقية .. مش فظيعة ولا حاجة بس وجب التنويه

شوف الفديو و تابع على الفيس بوك

صفحة شباب 6 ابريل
http://www.facebook.com/shabab6april
صفحة كلنا خالد سعيد
http://www.facebook.com/ElShaheeed

هتعلن تباعا تفاصيل يوم البداية

أجمد إلقاء لجحا - هشام الجخ

2011-01-21T01:25:00.000-08:00

حاجات تحرق الدم

2010-12-23T06:46:00.000-08:00

من ضمن الحاجات اللي تحرق الدم ان من حوالي اسبوعين كدا جم عملوا عندنا في الشارع رصيف موازي للرصيف و حملة تنضيف و دهان للرصفان و عملوه موقف للميكروباص॥و دا كلام زي الفل و النظام مفيش احسن منه ॥ مفيش اسبوعين و جهه ونش امبارح و شال الكلام دا كله ॥ طب على حساب مين يا رجالة الكلام دا ؟؟ ولا هو طلع مكنش يقصدوا يحطوه هنا و اتلخبطوا ॥ و لا هو الخوف من فكرة انه موازي للرصيف بعد عمل البرلمان الموازي فجالهم فوبيا الموازي فشالوا الرصيف !! الله اعلم

من الحاجات بردو اللي بتنقطني لما بنت تعمل ريلاشن ستاتس على الفيسبوك

كام واحد على واحده داخلين يطبلوا في الكومنتات " ايه داااااا مبروك يا قمر ، مبرووووك يا جميلة " و الحركات دي ...نفس الكام واحد و الواحده دول لما البونايه الغلبانة تشيل او تغير الريلاشن شب بتاعتها تلاقيهم وش قعدوا يشدوا من ازرها بئا و كلام من قبيل " بكرة تلاقي سيد سيدو و متندميش على حب مش عارف كان عامل ازاي و هو اصلا ميستاهلكيش و بليزززز مقدرش اتخيلك و انت حزينة على واحد مقدركيش " و القرع دا كله ثم إفرض يا اخي ان دي مشكلة بينهم عابرة و أفوروا فيها شوية و هتتحل و يومين و يتصالحوا - كلامي هنا للظيطية - تدخلات ملهاش أي لزمة خصوصا ان افعال الظييطة و المطيباتية و المطبلاتية دول هيشيلها اللي بيتظيطله

في حالة يعني حد منهم لبخ أو قل أدبه على الطرف التاني ... دايما اللي حواليهم سواء قريبين او بعاد نيتهم مش معلومة و اللي على اساسها هيتصرفوا ... يهدوا الجو ولا يشعليلوا الجو يخربوا الدنيا كل واحد و اللي شايفه او باللي عايزة او حسب ولاءه لاي طرف منهم هيتصرف ... و ارجع و اقول الغلط غلط الاتنين اللي يدخلوا الناس بينهم

زلزال النهود

2010-12-23T02:22:00.000-08:00

الفتوى المسخرة للشيخ الإيراني كاظم صديقي بإن ازدياد عدد الزلازل سببه سلوك النساء اللواتي لا يرتدين ملابسهن محتشمة وهو ربط بين كل الكوارث اللي بتحصل على وجه الأرض و بين عمايل الستات و العلاقات الـ استغفر الله العظيم استغفر الله العظيم ॥ و الفتوى دي مش الأولى من نوعها ॥ سبقها كتير بنفس الطريقة

اللذيذ ان طالبة امريكية 22 سنة اسمها جين ماكرايت كانت عملت صفحة على الفيس بوك بإسم

Boobquake

علشان تختبر كلام الراجل دا عمليا و دعت من خلالها كل نساء الأرض للتعري قدر الإمكان علشان يثبتوا للشيخ الجليل ان الستات مش سبب غضب الأرض و اثارة الزلازل
عدد أعضاء الصفحة في زيادة مستمرة و وصل لقرب 100.000 عضو

امن الدولة برا برا خلي الجامعة تبقى حره

2010-10-24T18:25:00.000-07:00

بعد حكم المحكم الادارية باستبدال الحرس الجامعي التابع لوزارة الداخلية بوحدات حرس مدنية تابعه لإدارة الجامعة

اخشى ان ينسب الفضل للحزب الوطني و حكومتة و يرقم من ضمن انجازاتهم و انجازات السيد الرئيس و انه كان من ضمن برنامجه الانتخابي و وعد و اوفى و الحركات دي

و يتم تجاهل نضال كل من ناضل لسنوات من افراد و حركات و مهتمين بملف العمل الطلابي و الحريات الاكاديمية

تنفيذ الحكم انتصار يحسب لنا جميعا

بس انا عندي سؤال ما في حكم صدر السنة اللي فاتت و لم ينفذ لعدم امكانية تنفيذه من قبل الجامعة

ينفع يتكرر الموضوع دا

بيان حملة مدونى مصر ضد الحرس الجامعى

2010-10-20T05:54:00.000-07:00

نعلن مدونى مصر عن إستيائنا الشديد للأحداث الأخيرة التى تسبب فيها الحرس الجامعى من ضرب وإعتقال وإهانات وتزوير إنتخابات الأتحادات الطلابية

خاصة ما حدث مع الفتيات وإليكم بيان ببعض ماحدث :

الاحتجاز غير القانوني للطالبة ماريهان إبراهيم غراب (ماجستير صيدلة – جامعة طنطا ) يوم الأحد 26-9-2010 ، أثناء قيامها بلصق ملصقات ترحيب بالطلاب الجدد داخل الجامعة .

الطالبة منار شكري مصطفي (كلية الآداب جامعة عين شمس) ، فوجئت أثناء تواجدها بحرم كلية الآداب يوم الخميس 30-9-2010،باعتداء أثنين من حرس الجامعة عليها، وقاما بجذبها من ملابسها، وتوجيه السباب لها.
قيام النقيب محمد الحنبولي أحد أفراد وحدة الحرس الجامعي بجامعة الفيوم يوم الأحد 3-10-2010 بالتعدي على الطالبة إسراء أبو الغيط (طالبة بكلية العلوم) لفظيا وجسديا وقيامه باختطاف حقيبتها الخاصة ، وتفتيشها بالمخالفة للقانون .
قيام النقيب عمرو عبد العظيم أحد أفراد وحدة الحرس الجامعي في جامعة الأزهر فرع الزقازيق يوم الأحد 10-10-2010 بالتعدي على الطالبة سمية أشرف (كلية الدراسات الإسلامية – جامعة الأزهر فرع الزقازيق) ، بركلها بقدمه أكثر من مرة ، وهو ما أدى إلى إصابتها بنزيف داخلي ، ثم قيام أفراد وحدة الحرس بمنع سيارة الإسعاف من نقل الطالبة المذكورة إلى المستشفى .
قيام الدكتور خليل عبد العال ، عميد كلية دار العلوم بجامعة الفيوم ، يوم الإثنين 11-10-2010بالاعتداء على إحدى الطالبات بكلية العلوم واختطاف الكارنيه الخاص بها وحقيبتها من يدها .

كل تلك الأحداث وغيرها مما يقوم به الحرس الجامعى من تزوير لإنتخابات الإتحادات الطلابية والتدخل فى شئون الطلاب داخل الجامعه والتدخل فيما تقوم به الأنشطة الطلابية .

ونحن إذ ندين تلك الأفعال نطالب بـ :

فتح باب التحقيق مع افراد الحرس الجامعى الذين قاموا بالتعرض للبنات .
طرد الحرس الجامعى خارج الجامعة وتعيين مشرفى أمن فقط لحراسة المنشاَت الجامعية .
عدم تدخل أفراد الحرس الجامعى فى شئون الطلاب وفى الأنشطة اى كانت نوعها .
وضع حدود لأفعال الحرس الجامعى وقادة .

بدون عنوان

2010-08-30T09:13:00.000-07:00

بدون مقدمات

لقد مرت عليا فترة عصيبة زي الزفت من الزهق و القرف و الملل و الفشل شعرت خلالها بما لم اشعر من قبل .. و نقيض كل تلك الأشياء التي لم اشعر بها
قررت اني اعود
كما كنت
انا
و هتخلص من كل اللي مرتبط بالفترة دي و هدور على كل اللي فقدته الفترة اللي فاتت و هرجعه
و ارجع

انا

الفيتو المصري من جديد

2009-01-11T15:13:00.001-08:00

عودة الحذاء المصري للساحة بعد سرقة الحذاء العراقي الاضواء منه قليلا ... عاد مرتفعا عاليا تحت القبة من جديد .. بعد غياب طويل عن ساحة الأحداث لأكثر من عام
المره دي الحذاء اترفع من النائب اشرف بدر الدين للنائب نشأت القصاص عضو حزب الوطني بردو ... (واقعه العالم قبل الماضي كانت بين طلعت السادات و احمد عز عضو الوطني)

انما ليه اشرف رفع الجزمة ! الراجل طول ماهو قاعد عمال يسمع في كلام من نوعية ان المعارضة عميلة و خاينة , و بتعمل لصالح جهات خارجية و بتشوه صورة النظام و بتزايد على القضية الفلسطينية و ان مصر سباقة و كلام من دا و من مين .. من عضو حزب وطني!!...الراجل مقدرش يستحمل أكتر من كدا و دمه غلي و ملقاش غير الفيتو المصري اللي يعترض بيه – كويس انه معملش حاجة تانية كان زمانها فيها رفع حصانة –

و بيني و بينكم الجزمة هي اسمى رد على امثالهم ... مين بيتهم مين بالعمالة ؟!! ايه البجاحة دي !! و سباقة ايه و مزايدة مين و صورة ايه اللي المعارضة عايزة تشوهها .. ما صورة حسني مبارك بتتحرق مع العلم المصري و الإسرائيلي في بلاد العالم حتى الدول الافريقية و لعت فيه.
سمعه مصر في الحضيض

سابقة لم تحدث في عهد أي من حكام مصر ... حدثت بفضل نظام مبارك ... دول افريقية تحرق علم مصر !
أقل ما يرفع للنظام فعلا هو الحذاء

حماقة نظام و ذكرى مذبحة السودانيين

2008-12-29T23:07:00.000-08:00

يزداد كرهي للنظام يوم بعد يوم حتى اصبح إبليس و اعوانة احب إلى قلبي من حسني و نظامة.

في يوم واحد احداث امامي و اخرى تأتي من الذاكرة.
امامي شعب عربي مسلم على حدودي يتم حصارة و تجويعه و قصفة و نظامي الرسمي ملتزم الصمت .. بل و ُيعتبر احد اطراف الحصار و له يد في ذلك لغباءه و سذاجته و شيخوخته و فساده و موقفة المخز.

و يأتي في ذاكرتي يوم آخر ...
يوم 30/12/2005 يوم مذبحة اللاجئين السودانيين
اليوم هو الذكرى الثالثة للمذبحة .. ذكرى قتل 27 سوداني و جرح عشرات اغلبهم من النساء على يد سفاحين الداخلية تلاميذ حبيب العادلي بلطجي النظام ... فلا هو حبيب ولا عادلي .
ذكرى اقتحام الشرطة المصرية مكان اعتصامهم بميدان مصطفى محمود بالمهندسين الساعه الرابعه فجرا في عز الشتاء و ضربهم و سحلهم حتى تزهق ارواح 27 فرد منهم -طبقا للارقام الرسمية- بأي دين يدن هذا النظام ؟!

حسبنا الله و نعم و الوكيل ... لم تجلبوا لنا سوى العار

كادر يسري التكديري

2008-12-17T02:17:00.000-08:00

قعدت أفكر .. هل ما يحدث في المدارس هذه الأيام أمر طبيعي ام جديد علينا ... سلسلة الحوادث دي حاجة عادي كدا و ظهرت بسبب اهتمام الإعلام بها ولا زادت و تنوعت فعلا ... في شهور قليلة تحديدا منذ بداية العام الدراسي الجديد و ظهرت لنا اخبار جميع ابطالها من المعلمين .. مدرس يعاقب طالب بالضرب حتى الموت لعدم آداء الواجب و آخر ينظر لتميذه شزرا فتفارق الحياة من شده الخوف و آخر يعتدي على تلاميذ جنسيا و آخر يعاقبهم بالوقوف عرايا و مدرس يفقع عين طالب و مُدرسة تسرق وزة من بياعه في الشارع و تطلع تجري و هي خارجة من المدرسة !! و غيره و غيره.
كل الاحداث المأساويه دي و لم ينتهي النصف الاول من العام الدراسي...
ايه السبب في دا كله ..أكيد السبب هي سياسات فاشلة تطبق من اشخاص فاشلين .. اخذوا على القص و اللصق من نظم اخرى ... حتى صار الامر ترقيع للتعليم و ليس تطوير للتعليم.
تخيل المنظر .. تقويم تراكمي و أعمال سنه و غيرها من الأساليب الجديدة تطبق لتجبر الطالب على التواجد في فصلة طوال اليوم الدراسي . شيء جميل و لكن ... اصبح عندك 60 - 70 طالب مفعوصين فوق بعض .. و استاذ مطحون زي اي مواطن و غير كدا قد يعايره تلميذ او ولي امر التلميذ ولا استاذ زميل برسوبه في امتحانات الكادر -يا فاشل يا فاشل و كدا- , ذهنه مشتت بين متطلبات البيت و العيال و امتحانات الاكاديمية و الحصة دي و اللي بعدها و مش هيخلص اليوم دا كله و يروح يرتاح .. لا. لسه فيه الدروس لغاية بالليل , هيجيب فلوس منين يعني!! و متواجد في نفس المكان مع الـ60 - 70 طالب اللي محشورين فوق بعض في فصل واحد .. ايه اللي ممكن يحصل غير الكوارث دي !!
نجح يسري الجمل في تأزيم الموضوع اكثر ... وضع المعلم موضع سخرية من الجميع .. من الطلبة قبل زملاءه المعلمين ... و طبعا لما تاخد درس عند مدرس ناجح غير المدرس الساقط .. و مش هتدفع هنا زي هنا أكيد .. و في ستين داهية كرامة المعلم.
و المصيبة ان كل يومين يخرج علينا بتصريحات بيتفاخر بيها بالكادر على انه إنجاز محصلش و المدرسيين طايرين من الفرحة بسبب الكادر ... حتى الآن لم اجد مدرس و لو مدرس تدبير منزلي مبسوط بموضوع الكادر دا.
صدق اللي سماه كادر .. يكدر فعلا.

موضوع تاني بيحرق دمي و ليه علاقة بالأولاني ... و هو أكثر ما يستفزني الإصرار اللي ملوش اي معنى على وضع صورة حسني مبارك في كل فصل من فصول اي مدرسة و صورة كبيرة في غرفة المدير طبعا ... ليييه.. معرفش !.
هل في اي نص دستوري بيوجب و يحتم علينا لطع صورة سعادته على الحائط ..
و ايام الدراسة و خصوصا فيه لجنه من الادارة التعليمية ولا الوزراة كانو يهتموا جدا بوجود العلم و القسم و صورة سعادته .. طيب العلم و القسم ماشي .. انما صورة سعادته ليه .. علشان تهل البركة ولا هتطرد الارواح الشريرة .
طب دا انا شاكك و بنسبه كبيره ان وجود صورتة في الفصول هي السبب الرئيسي في المهازل اللي بتحصل كل يوم دي ... العيال مخنوقة و اهاليهم مخنوقة و المدرس مخنوق و اللي خانقهم صورتة فوقهم على الحيطة و باصص لهم كده ..ناقص يطلع لسانه.. ما لازم يعملوا كدا في بعض ...
عمر التعليم في مصر ما هينصلح حاله الا لما تتشال صورته

ندالة أهلها

2008-12-17T01:46:00.000-08:00

ميت ألف فرصه عشان أسيب مصر
ولا عمري سبتها
علشان هى بلادي اللي بجد بحبها
بحبها بكدبها وصدقها
بحب فيها أصالة وندالة أهلها
بحب فيها السهر بحب
زيفها وأصلها
بحب فيها طلعة الشمس
تنور وشها
بحب فيها القمر طالع
يغازل حسنها
بحب فيها المشي علي شط
نيلها وبحرها
بحب فيها بناتها
راسمين ملامح شعبها
دي بنت مايصه وحاطه
ورده فـ شعرها
ودي بنت جد ونازله
جري لشغلها
هتلاقي فين بلد
فيها الكنايس والجوامع
بتحضن بعضها
مسلم مسيحي إخوات
راضعين طيبة من صدرها
نبع الحنان ويناموا حاضنين
أرضها
هتلاقي فين تاني بلد
كل حاجه فيها
تخليك تحبها
هتقولي ظالمه هقولك
برضو بحبها
هتقولي ضالمه
مهو ده سواد شعرها
هتقولي زحمه هقولك
علشان بنعشق أرضها
هتقولي فيها فساد
هقولك ده من طيبة شعبها
جرب كده تسهر ولو وحدك
علي ضف نيلها وحبها
جرب تشوف بنت حلوه
مع شاب واقف جمبها
بيحبها شايل في قلبه
هموم الدنيا كلها
وبرضو بيحبها
جرب كده تاكل دره وترمس
علي شطها
وتشوف وشوش الناس
واضحك زيها
طب وانت ماشي لوحدك
ووقعت في مشكله
مش بتلاقي ألف واحد
جمبك بيحلها
لا تعرفهم ولا يعرفوك
بس جمعكم حبها
أهي هي دي مصر
زاحمه ظالمه
فاسده ضالمه مش مهم
ده كفايه خفت دمها
هافضل لمصر أقول وأعيد
أنا أصلي عاشق أرضها

وطبعا ده كله كلام في الهوا
أنا لو تجيني نص فرصة هقول لها
بالسلامه يا مصر
ومش عايز أشوف وشها
وهي دي بقى ندالة أهلها

ابراهيم خليل

تهديدات بحل جمعية العون المصرية لحقوق الإنسان

2008-05-31T10:12:00.000-07:00

تهديدات بحل جمعية العون المصرية لحقوق الإنسان بناء على تعليمات أمن الدولة على مدى عام ونصف ومنذ إشهار الجمعية وهى تتعرض للعديد من التهديدات والمضايقات ولكن يبدو أن الأمر هذه المرة قد أخذ طابعاً جاداً وتنفيذياً حيث علمت الجمعية من بعض المصادر أن وكيل وزارة التضامن الاجتماعى بالقليوبية وبناء على طلب من مباحث أمن الدولة قد أصدر أوامره إلى مدير إدارة التضامن الاجتماعى بشبين القناطر بضرورة عمل مذكرة بشأن الجمعية تتيح له حلها والغريب فى الأمر أن وكيل الوزارة طلب عمل مذكرة تقول فيها الإدارة أن الجمعية لا تعمل حتى يسهل صدور قرار الحل ورغم أن أنشطة الجمعية معلومة للكافة فى المحافظة وعلى رأسهم السيد وكيل الوزارة ورغم ما نشر بالجرائد وعلى الانترنت عن تلك الأنشطة ورغم أن لمسة للكيبورد تحيل سيادتهم إلى موقع الجمعية على الشبكة العربية لمعلومات حقوق الإنسان ليروا العديد من أنشطة الجمعية ورغم أن بعض تلك الأنشطة كانت تتبنى بعض شكاوى المواطنين ورفعها للسيد محافظ القليوبية وقد تفاعل سيادته مع بعضها واستجاب لمطالب الجمعية وبالطبع فإن من يحرض على حل الجمعية يعلم أيضاً كل أنشطة الجمعية فهو يرقبها وبالطبع فإن تلك الأنشطة لا ترضيه وتسبب له إزعاجاً عظيماً . فهل لا يعلم الآمر بسرعة حل الجمعية تبنيها لقضية أهالى جمجرة حين فرضت الشرطة عليها حصاراً فيما يشبه العقاب الجماعى ؟ هل لا يعلم سيادته تبنى الجمعية لقضية سيدة المنشأة الكبرى مركز كفر شكر حين هتك عرضها بالطريق العام ؟ وهل لا يعلم سيادته عن تصعيد الجمعية لواقعة الاعتداء على صحفى الدستور فى محطة كلية الزراعة بشبرا ؟ وهل لا يعلم سيادته فضح الجمعية للتزوير بالصور أثناء الاستفتاء على التعديلات الدستورية ؟ وهل لم يقرأ سيادته البيانات التى أصدرتها الجمعية فى واقعة اعتصام العاملين بشركة إيجوث ؟ وهل لا يعلم عن الندوتين اللتين أقامتهما الجمعية بشأن التعديلات الدستورية ؟ وهل لا يعلم أن الجمعية قد تضامنت مع معتقلى 6 أبريل وأصدرت بياناً حذرت فيه الداخلية من المساس بالمتظاهرين .إن من أمر بسرعة الخلاص من الجمعية ومن تلقى الأمر يعلمون تماماً أن الجمعية لم تتلق أى تمويل وتؤدى رسالتها عن طريق أعضائها ومتطوعيها وبالتالى فإن الإيرادات والمصروفات لديها محدودة وتتلخص فى اشتراك الأعضاء فلماذا لا تحل بحجة إنها لا تعمل لعدم وجود أموال لديها ؟ لقد فكروا فى الخلاص من الجمعية بحلها لأن أنشطة الجمعية أزعجتهم فى محيطها الاقليمى فقالوا نقول إنها لا تعمل كعادة الحكومة دائماً حينما تعلق الفقراء على مشانق الغلاء فإنها تقول لا مساس بمحدودى الدخل . إن الجمعية إذ تنتظر صدور قرار الحل بمعلومات يقينية فإنها قد بدأت فى الترتيب للمرحلة القادمة فكل قوى القمع والقهر لن تثنينا أبداً عن الدفاع عن حقوق الإنسان ومقاومة الظلم أينما وجد .جمعية العون المصرية لحقوق الإنسان

نجحت قطر و فشلت حكمته

2008-05-31T09:16:00.000-07:00

كنت مستمتع جدا و انا أتابع البث الحي لجلسة انتخاب رئيس لبنان ... مبتهج كدا و قلبي بيخفق -زي ما بيقولو- ... على الرغم من ان اي شخص قاعد بيتفرج او معدي من بعيد اعتقد انه سيشعر بالملل ... طول الجلسة .. ميشيل سليمان .. ميشيل سليمان .. ميشيل سليمان .. ميشيل سليمان ..

مشهد لا نشاهده كثيرا .. او بالادق لم نشاهده اصلا من قبل .
مزيج من الفرحة الشديده للبنان و الحزن الاشد على حال وطننا و اهلنا و ما يحدث فيه و فيهم و فينا .. كدت اصفق و النواب يصفقون بشده لانتصار العداله و الديقراطية ...

لكن المشهد لا يمت للواقع العربي بأي صله ..
لا يوجد سوى وجه شبه وحيد .... ان النتيجه قاربت على 99%

كنت اتمنى ان اعرف شعور فخامة رئيسنا بحكمته و هو يشاهد تلك المشاهد ..و هو ليس له اي دور في عمليه الصلح ... نجحت الشقيقه الكبرى الجديدة -قطر- في ذلك و فشلت مصر بحكمة رئيسها المزعومة

هل كان يشاهد الجلسة على قناة الجزيرة .. ام النيل للاخبار ام انتظرها على سبيس تون ..ام انتظر التقرير ..
ربما لم يشاهد اساسا ..فاعتقد ان مثل تلك المشاهد تعكر صفو سعادته .. و قد يتسبب فالعديد من الزيارات لدورة المياة

كامل التفاصيل ليوم اختطاف و تعذيب أحمد ماهر طبقا لروايه

2008-05-19T08:34:00.000-07:00

عن الاربعاء العجيب اتحدث .. الكرنك 2008

استيقظت صباح ذلك اليوم متعبا بعد يومين من العمل الشاق المتواصل .. فقد كاد عملى يضيع بسبب 4 مايو الذى لم يؤتى بثماره
ذهبت الى عملى مبكرا .. فاليوم لابد من اجراء بعض الحسابات الهامه و طباعة لوحات فى غاية الاهميه و تسليمها للمكتب
لا اعرف لماذا لم اكن متفائلا ذلك اليوم .. اتصلت بكثير من الاصدقاء .. و كنت لاول مره منذ اكثر من شهر اذكر مكانى فى التليفون بصراحه
*ايوه يا زميلى .. انا انهارده فى التجمع الخامس .. فى شارع التسعين .. ايوه فى المعرض ..هامشى على الساعه واحده
*ايوه يا بشمهندس طبعت كل اللوحات و الاستشارى مضى عليها ووافق .. جاى دلوقتى على المكتب
كان بعض العمال قد اعدوا طعام الغذاء و لكنى فضلت التحرك لان هذا اليوم كان مليئا بكثير من المواعيد الهامه
ركبت سيارتى المتهالكه و بدات فى التحرك و لمحت فى المرأه اليتيمه سياره بيجو مسرعه تتوقف فجاه امام الموقع الذى اشرف عليه
جاء خاطر فجأه بداخلى انها قد يكون بها بعض ظباط امن الدوله
ههههههه .. طب كويس انى مشيت
تعانى سيارتى من بعض الامراض المستعصيه التى تجعل تحركها بطيئا و تحتاج لأموال كثيره لكى تشفى و تعود سياره مره اخرى .. زقزوقه حبيبتى اكيد هاصلحها فى يوم من الايام ..دى ياما شاليتنى و انقذتنى من اخطار كتير .. ايه يعنى الكبالن مكسره و علبة الدركسيون بتزيق و لا المقص مكسور و ملحوم اى كلام
ايه المشكله ان مافيش استبن و مافيش كوريك وواخده كام خبطه ..اول الشهر هاجيبلك بطاريه جديده يا زقزوقه..انا مسميكى زقزوقه علشان الناس بيزقوكى كتير
ابتسم فى خاطرى الى ان فوجئت بسياره ميكروباص اجره سوهاج تقطع الطريق
ايه ابن الهبله ده ..الشارع فاضى و الدنيا صحرا و مش عارف يسوق .. حبكت يركن قدامى
احاول التحرك .. فأجده مصمم على الغلاسه ..ايه ياد يابن ال**** .. اقطع الشتيمه لاننى لمحت ان كل من فى الميكروباص ينظرون إلى بتحفز واضح .. الشرر يتطاير بوضوح من اعينهم .. اول مره المح الشرر ينطلق من العيون ... اجسام ضخمه .. حلاقه زيرو .. نضارات شمس .. يانهار اسود .. انتوا جيتو
اعود بالسياره للخلف سريعا .. لا اعرف لماذا
ثمانية بغال ينزلون دفعه واحده من الميكروباص و يحاولون اللحاق بى .. يشيرون لشخص ما فى الخلف
انظر خلفى فأجد ثلاث سيارات ملاكى يسدون الطريق مره واحده ..ارتطم بواحده .. اتحرك للامام مره اخرى و يبدأ قذف الطوب و الحجاره على السياره .. هى بقى فيها طوب كمان؟؟
سائق الميكروباص الصعيدى الغلبان يسد الطرق و يصدمنى بظهر سيارته .. ليه كده بس ياسطى احنا غلابه زى بعض .. عملتيها يا زقزوقه .. اخص عليكى
افاجىء بأياد كثيره تمتد الى ملابسى و تفتح الباب و تبدأ حفلة اللكمات و السباب.. مباراه
- محدش ليه دعوه .. كله يمشى .. احنا امن دوله .. ياللا من هنا يا ** انت و هو
اجد نفسى فجأه بداخل الميكروباص ..
- مانت وقعت أهوه يا **** فيه حد يهرب من امن الدوله يابن ال***
- احنا هانعرفك احنا مين يابن ال****
- كسروله العربيه ... كسروا عضم امه ابن ال*** ده .... مش عايزه يبطل صويت
هكذا هتف كبيرهم .. و الجميع عنده ضمير شديد فى تنفيذ الأوامر ... ضرب شديد من جميع الاتجاهات .. و بجميع اطرافهم .. إيد و رجل
آآآآآآآآآآآه هكذا هتفت انا رغم محاولتى للتحمل .. لكن الضرب كان فعلا شديد و متواصل .. و من يتعب منهم الباقى يكمل .. و لكن هل اشترك معهم السائق الصعيدى الغلبان أم اكتفى بقيادة السياره؟؟
قبل الضرب تبرع احدهم بوضع التيشيرت فوق وجهى .. و تبرع اخر بتقطيع الفانله الداخليه لنصفين .. و تبرع ثالث بربط النصف فوق عينى و تبرع اخر بربط يدى خلف ظهرى بالنصف الاخر .. و تبارى الاخرون فى تكتيفى و ضربى ... منتهى التعاون فعلا
يتوقف الميكروباص بعد رحله قصيره جدا امام احد المبانى .. احد الشوارع المجاوره .. لابد انه احد فيلات احد الباشوات ..او مقر خفى لامن الدوله
يجرجرونى على السلالم و انا معصب العينين وسط ركلات و صفعات و سب لجميع اهلى .. الكبير و الصغير
يلقون بى على بلاط احدى الغرف .. البلاط بارد رغم حرارة الجو ..يا سلااااام
ياتى احدهم و يستبدل الفانله الداخليه بكلابشات حديديه حول يدى وراء ظهرى و يغلقها على اخرها
*يا ريت تخف الكلابشات شويه ...
- إخرس ياد يابن ال***** ... انت بتتكلم ليه
- قوم اقف ياد ..انت بقى المناضل؟؟ .. انت بقى اللى هاتعمل اللى محدش عمله؟؟؟ ... انت يابنى هتسافر دلوقتى
- ابقى تعالى *** على قبرى لو شوفت الشارع تانى .. يابن ال*****
- حضروا الكهربا .. الواد ده مش متربى و مش عارف ازاى يعامل اسياده
- احنا ياد اسيادكوا و اسياد كل البلد دى .. هنعرفك دلوقتى احنا مين
- مابتردش علينا ليه
* يعنى اتكلم و لا اخرس ..؟؟؟؟
- ... يا جماعه قولت مش عايزه يبطل صويت .. احنا هانطلع دين امك
* آآآآآآآآآآه
فجأه انفتح مره اخرى دش كبير من الضربات و الصفعات و الركلات من جميع الإتجاهات .. انهم بلا شك لا يقلون عن 15 جثه و أحجام اياديهم و ارجلهم مختلفه فى المقاس و القوه
لا اعلم كيف يحفظون هذا الكم الهائل من السباب .. رغم انى كنت اعتقد ان لسانى طويل لكنى سمعت شتائم لم اكن اتخيل انها موجوده ... قاموس لغوى عظيم
استمر دش الضرب و السب اكثر من 30 دقيقه .. تبعه بعد ذلك بعض التوابع القليله لبعض راغبى التسليه
- انت بقى اللى عاملى فيها راجل؟؟؟
- قول انا مره
تذكر فلتلتزم بسلاح الصمت
- قول انا مره
- قول انا مره
و تنهال الصفعات و الركلات مره اخرى كم كنت اود ان اقول له انت مره و لكننى وجدت نفسى اردد
* حسبى الله و نعم الوكيل
- و كمان بتحسبن علينا؟؟؟ دا انت هايطلع دين امك
خلاص سيبه هو لما يركب الزحليقه هايقول كل حاجه
فجأه يختفى الجميع ...
تمر الدقائق كالسنين ... إلى ان اسمع اصوات كثيره .. نساء و أطفال و شيوخ و رجال ... زعيق و خناق و شتيمه
مين دول .. هو انا فين ... بس اكيد انا فى القسم
* لو سمحت
- عايز ايه
* هو انا فى قسم القاهره الجديده؟؟؟
- مش قالولك ماتفتحش بوقك ياض
*خلاص انا عرفت .. طب ممكن تفك الكلابشات شويه .. مش هما مشيو برضه .. انت من القسم ولا تبعهم؟؟؟
*خلاص يا عم مش هاسأل تانى .. بس يا ريت تخف الكلابشات شويه
- حاضر المفتاح تحت و هانزل اجيبه
إنه بالتاكيد احد عساكر القسم .. إنه لا يسبنى كما فعل الاخرون .. و لكن اين هم .. و لماذا اختفوا فجاه؟؟؟
- اخف الكلابشات عن كده كمان؟؟
* لا كده قشطه .. شكرا يا ذوق .. ممكن بقى شوية ميه علشان عطشان و الجو حر
- حاضر .. انت طلباتك كترت قوى ماتتعودش على كده
يأتى لى بزجاجة مياه و يشربنى
* جزاك الله كل خير .. طلب اخير بقى
- لأ
* طب خلاص
و تمر الدقائق مره اخرى و الذباب يقف على ظهرى و جروحى
* لو سمحت
- ايه تانى .. انت مش بتبطل طلبات
* عايز سيجاره
- نعم؟؟؟
* سيجاره .. انا كان معايا علبة سجاير فى العربيه .. هات واحده و خدها كلها
- طب و هاتشربها ازاى و انت متكلبش
* فكنى او شربهالى
- يا عم سيبك منه انت هاتسمعله كمان .. دا عيل ابن **** انت بتتكلم معاه ليه مش كفايه شرب
* ربنا يسامحك
- انت بتشتغل ايه
* مهندس
- مهندس ؟؟؟؟ طب و هما جابوك هنا ليه
* اصلى معترض على زيادة الاسعار و البهدله اللى عايشينها .. تسمع عن الفيس بوك
- لأ
* طب ممكن سيجاره؟؟
- طيب لما الظابط ينزل بس
أخيرا وجدت بعض البنى ادمين فى وزارة الداخليه
- هاولعهالك و هاشربهالك فى السريع .. بسرعه قبل ما الظابط يرجع
* قشطه
- خلاص يا عم شربت السيجاره ... عايز حاجه تانى ... ياريت تتكتم بقى
* حاجه اخيره .. معلش اصل عنيا اصلا تعبانه و اللى رابطها رابط بضمير شويه و عاملالى صداع .. يا ريت تخفها شويه
- طب كمان شويه علشان فيه حد جاى
* انتوا بتتكلموا معاه ليه يا ولاد ال*****
هات ضهرك ياد ... ارفعله التيشيرت علشان ادهنله المرهم
مرهم؟؟؟ ... كريم ؟؟؟؟ غريبه
ياللا انزل معانا ..حاسب السلمه لف يمين يابنى اتحرك متخشب ليه كده
اركب الميكروباص مره اخرى و معى اتنين عساكر او مندوبين غلابه من القسم يرافقهم ضابط امن الدوله ابو مرهم
اجلس على الكرسى الخفى نائم مختفى عن انظار الماره ... و يستمر صديقى الذى لا اعرف اسمه فى امدادى بكام نفس كل ما اطلب منه
اساله ... * هو الظابط اللى راكب العربيه معنا اسمه ايه؟؟
- و الله ماعرف .. بس هو ابن *****
* طب تعرف اسم اى ظابط من اللى جابونى القسم ؟؟؟؟
- لأ ... و اسكت احسن لك
* احنا رايحين لاظوغلى طبعا
- مش عارف
* بس انا عارف
- و عرفت منين و انت متغمى .. انت شايف ولا ايه
* لا يا عم .. من الاتجاهات .. انا مهندس .. دماغى جواها خريطه
- ماشى يا خفيف .. بس انا اخرى معاك على الباب .. هناك مش هاعرف اعملك اى حاجه
تمر على الافكار مجتمعه تاره و متفرقه تاره ... ترى هل علم احد الزملاء بذلك .. ترى هل تحرك أحد .. لو تم سجنى ..من سيدفع عنى اقساطى و ديونى الكثيره ... و من و كيف و هل ... ياللا بقى .. كله بيطلع فى الغسيل
- ياللا علشان نازلين ..وطى علشان الباب
اتذكر تلك رائحة فى هذا المكان ...رائحة التعذيب و الموتى... حضرت الى هنا منذ عامين بعد خروجى من سجن طره .. و لكن وقتها كنت ارى كل شىء و لم يغمينى احد
اتذكر شكل تلك البلاطات التى امشى عليها الان .. و تلك العتبه التى تفصل بين العالم العلوى و السفلى
اتذكر رائحة دورات المياه التى فى الممر الذى تحت الارض بجوار زنازين الاسلاميين .. لابد اننا مررنا عليها .. هل سيضعوننى فى تلك الزنزانه الى كنت اسمع من بداخلها يطلبون الرحمه من الله و يصرخون
اتذكر ذلك السلم الحديدى الذى اصعد عليه الان .. رأيته منذ عامين و كنت اجلس امامه منتظر انهاء اجراءات الافراج و كان المعتقلين الاسلاميين و الشباب الملتحين يصعدون عليه على ارجلهم و ينزلون عليه محمولين و فاقدى الوعى ... و لكن.. لماذا انا صاعد عليه الان.
. ينتهى السلم و الكعبله.. ثم ادخل فى طرقه ثم مصعد
يرافقنى ثلاث على ما اعتقد .. ضاط امن الدوله و الاثنين الغلابه من القسم
- هاتودوه لمين
- عمرو بيه
- مش عارف هو فين .. اطلع بيه الاداره على طول ...هو احزاب ؟؟؟ انت تبع حزب ايه؟؟؟
* كله زى بعضه
- انت ردودك مستفزه على فكره .. خف شويه
- اقف هنا
تمر الدقائق و استمع لحوار العساكر و المخبرين و ضحكهم و كلامهم عن البنات و الحشيش و الدنيا و الحياه
اضحك و اشترك فى الحوار .. و اهو كله يفيد التانى بخبراته
فجأه يصمتون .. و اسمع اقدام ثقيله تقترب ... و يصيح بصوت رهيب
- انت بقى اللى عمال تسخن الناس
و تنهال الضربات و الصفعات و اللكمات.. و فجاه يتركنى و يكمل طريقه
- معلش يا أحمد مفيش فى ايدى حاجه اعملهالك هنا
* ............
اسمع الكثير من الاقدام التى تقترب .. شكلها هاتبقى حفله .. استر يا رب
- انت بقى اللى عاملى فيها زعيم و مش هامك امن الدوله .... هاتولى ابن ال**** ده على جوه
كثير من الايادى تسرع لتلبية النداء .. مع بعض المجامالات بكام ضربه على كام شلوت ... و لزياده فى المجامله يتم جرى على الارض .. إلى أن أدخل مكتب واسع مكيف به موكيت على الارضيه تنبعث منه رائحة الفخامه .. ده شكله مكتب حد من البشاوات الكبار قوى
- بص يا باشا .. احنا نطلعله أمر إعتقال و نخلص منه
- وليه ... هو هايخر بكل حاجه دلوقتى
- يا باشا دا صنف ابن **** .. الاشكال دى لازم تتربى علشان يعرفوا احنا مين ... يابنى انت حشره .. ولا حاجه..و اى حد بتتحمى فيه ولا هايعرف يعمل لك حاجه... الاحزاب بنت ال**** و شوية ال**** اللى عاملين مراكز حقوق انسان دول نلمهم فى عربيتين
بالطبع لم ينسى هذا الضابط الطيب ان يدعم أقواله ببعض السباب لجميع الشخصيات السياسيه فردا فردا من جميع التيارات من اقصى اليمين لأقصى اليسار ايمن نور, جميله اسماعيل , امير سالم , اسامه الغزالى حرب , مجدى احمد حسين , محمد عبد القدوس , جورج اسحق ... بالاضافه الى اهلى اللى ماعرفوش يربونى
و جلس الباشا الكبير على مكتبه .. و سمعت ازيز الكرسى و جلس حوالى 4 او 5 ضباط اخرين بإختلاف اصواتهم.. بخلاف بعض المخبرين عند الحاجه لأى مساعده
- قوللى بقى يا بتاع الفيس بوك انت ... ازاى يجيلك استدعاء من 10 ايام و ماتجيش
* انا مجاليش اى استدعاءات
- رد على الباشا عدل .....
و تبدأ مسابقة الضرب و الركلات
* آآآآآآآآه
- هاسألك السؤال تانى .. ازاى يجيلك استدعاء بك..... و ماتجيش يابن ال****
* دا كان مجرد تليفون اللى جالى ... ماكانش استدعاء رسمى ..و كان الكلام عن دردشه مش استجواب
- لأ .. ده اسمه استدعاء ... انت بقى ماجيتش لييييه؟
- يا باشا سيبنى عليه شويه دا عيل لبط .. سيبنى اعدلهولك شويه
* ماكنتش شايف أى فايده أو هدف من حضورى هنا
- احنا بس اللى نحدد ايه المفيد و ايه غير المفيد ... مش انت
- يا باشا دا عيل مش متربى يا باشا ... سيبنى اظبطه شويه ... الكهربا جوا جاهزه
- و ليه الكهربا ... هاتتكلم عدل ياد ولا نخليك تخر بكل حاجه لوحدك؟؟
و تبدأ مسابقة الضرب و الركلات كأنى كره فى ملعب واسع
* أآآآآآآآآآآآآآآآآه .... آآآآآآآآآآآآآآآآآآآآآآآآآآه ...
- ايه بقى باسوورد الجروب
* مش فاكر اصلى كنت كاتبه فى ورقه و ناسيها (صفعه قويه)..... آآآآآآآه
- يا جماعه انتوا إزاى تجيبوهولى مش متظبط ... ظبطوه الاول قبل ما يدخلى ... هاتوهولى جاهز علشان الوقت و تعب القلب
انقض على الجنود و الضباط الاشاوس المغاوير حماة الوطن .. حماة الامن و الامان فى مسابقه جديده للركل و الصفع و السب ... و بدأ البعض فى تقشير ملابسى .. و تطوع احد الضباط المحققين بسحبى على وجهى و صدرى على الارض و خرج بى خارج المكتب ابو موكيت الى الطرقات ام بلاط وسخ .. مسحولا على وجهى يجرنى هو و يساعده أخرون عندما يتعب
اتذكر اننى فى المرحله الابتدائيه كنت اسمع احدى المدرسات تهدد الفصل .... إللى هايتكلم هامسح بيه البلاط .... و كنت اتعجب وقتها .. كيف يكون ذلك ... و اخيرا جائنى الجواب بعد عشرين عاما ... هذا هو مسح البلاط .. اديك جربت ازاى يتمسح بيك البلاط .. مبسوط؟؟
و لكن ماذا اقول للباشا الذى يتتظر الباسوورد
- افتكرت ياد يا ***** ولا نجيب العصايه ... هاتولى اتخن عصايه عندكوا
* افتكرت ... اعتقد كان مكتوب كمان فى رساله على الموبايل.. مش فاكر مسحتها ولا لأ
- استنى كده ... موجوده .. دى مبعوتالك من رقم اسراء ... هى لسه بتدخل؟؟؟
* لا يا باشا مابتدخلش على الجروب
- احنا عارفين من غير ما تقول
يا رب محدش منهم يجرب الباسوورد .. بس الغريبه ان كمان محدش سألنى عن الايميل ... شكل الظباط اللى بيفهموا فى النت لسه ماجوش
- مين بقى مشيره؟؟
* مشيره؟؟
- انت هاتستعبط ... يا جماعه قولنا ظبطوه
تعود مره اخرى لمباراة الصفع و التنكيل .. لم اكن اعرف من اى اتجاه تاتى الضربات.و اللكمات .. و لكنى متأكد اننى لو كنت حر اليدين و ارى وجوههم ما استطاع احد او جرؤ على ذلك
* آآآآآآآآه ... ايوه ايوه عارفها ... مالها؟؟؟
- اسمها ايه بالكامل و ساكنه فين؟؟؟
* ماعرفش
- لا تعرف
* هاعرف منين ... ماعرفش ....(ضرب) آآآآآآه ... ماعرفش ....(ضرب) أأأأأأأأأه
- طب و فاطمه
* هاعرف منين ... ماعرفش .... آآآآآآه ... ماعرفش .... أأأأأأأأأه
- طب و ايناس
* هاعرف منين ... ماعرفش .... آآآآآآه ... ماعرفش .... أأأأأأأأأه
- طب و عمر
* هاعرف منين ... ماعرفش .... آآآآآآه ... ماعرفش .... أأأأأأأأأه... محدش يعرف حد ... كله من على النت
- طب و ...... طب و .......
- ايه علاقتك بجميله اسماعيل .. و ليه بتبعتلك رسايل
* ماهى بتبعت للناس كلها ... كل الاحزاب و القوى ايه المشكله لما تبعت لى
- نجلاء بدير .. احمد محسن .. فهمى هويدى ...اسئله .. اسئله .. اسئله
* اجوبه متناثره يتخللها اصوات ضرب و صراخ
يكتفى الباشا بهذه الاسئله و اجوبتى التى تشبه المهلبيه ..و يصمت لفتره و انهض لأقف مره اخرى .. و اسمع وقع خطوات تاتى من بعيد تقترب منى .. ثم قجاه اتلقى صفعه على اذنى اليمنى فأرى نورا مبهرا رغم الظلام الدامس .. و فجاه اسمع تصفير غريب .. كأنهم جميعا ابتدئوا فى الصفير .. و لاول مره فى حياتى اتأكد من صحة ما كنت اراه فى كارتون توم و جيرى من عصافير و نجوم تدور حول من يتم ضربه على رأسه .... لقد رأيت تلك العصافير الصغيره و النجوم بالفعل.. ... هل زار مخرجوا تلك الافلام مبنى امن الدوله فى مصر من قبل؟؟؟

- خلاص خدوه .. و إحمد " ربنا" انك وقعت فى ايد حد حنين .. ممكن بعد كده تقع فى ايد حد ما بيرحمش
ما هذا .. لقد نطق الباشا كلمة " ربنا" ... هل يقصد " ربنا"؟؟ هل " ربنا" هو " ربه" ام يقصد "رب" اخر
و لكن على اية حال واضح من كلامه انه له "رب" و قد كنت اعتقد ان هؤلاء البشاوات يعتقدون انهم هم الالهه .. لابد انهم مقتنعون انهم ارباب متفرقون يجمعهم " رب" كبير فى وزارة الداخليه او فى رئاسة الجمهوريه
و لكن ربنا نحن يأمرنا بالرحمه و سوف يحاسبنا على ما نفعله .. بالتاكيد لم يأمرهم ربهم بذلك و بالتاكيد هم مقتنعون انه لن يحاسبهم
يا ربى حمدا لك انى اعبدك انت وحدك .. لا شريك لك .. و لا اعبد رب هذا الباشا و من معه . فانت الرحيم . و انت المنتقم
يقتادنى العساكر و الامناء للادوار السفليه ... انزل على نفس السلم الحديد لا تقوى رجلى على حملى.. اتذكر شكل ذلك الشاب الملتحى من سنتين
يتم استبدال الكلابشات باخرى قديمه مؤلمه و يتم ربطى فى باب حديد .. تمر الدقائق و ادخل فى النوم
- انت يا ابنى ياللى نايم و انت متكلبش .. انت ازاى نايم كده؟؟ .. انت تبع ايه؟ ... شكلك كده عيل روش و جاى غلط
* فيس بوك
- مين؟؟؟
* مش مهم ... ممكن بس تفك الكلابش من الباب او تربطنى عدل علشان عايز انام شويه
تمر الساعات و انا نائم بالكلابشات و الغمامه على عينى و ملقى على الارض
اتذكر محمد الشرقاوى منذ سنتين .عندما كان يتعجب قائلا يابنى انت ازاى بتعرف تنام كده فى اى حته و اى زنزانه و اى وقت
- مش انت اللى الظابط كلمك فى التليفون من عشرتيام
* اه
- طب هو اجازه انهارده .... انا كلمته و جاى دلوقتى و اكيد مش هيوافق على اللى حصل
* يا رااااااجل ههههههههههه
- بتضحك على ايه ... انا غلطان ... خليك كده مرمى لحد ما يبان لك صاحب
اصعد معه بعد قليل للضابط الذى يقولون انه قطع اجازته لإنقاذى ... يؤنبنى بسبب دماغى الناشفه ثم يصطحبنى للمدير و تبدأ النصائح الابويه الحنونه
- احنا مش ضدكوا .و لا سفاحين زى ما جرايد المعارضه ما بتصورلكوا ... و البلد قطعت شوط كبير فى طريق الديمقراطيه ... بس الشعب المصرى هو اللى مش مهيأ للديمقراطيه
* امال ايه اللى حصلى انهارده ... يعنى كل الضرب ده و كان مثلا بيتهيألى؟؟
- معلش .. اعتبرنا زى والدك
* *********
- احنا و الله مش بننجح الفاسدين فى مجلس الشعب ولا بنساعد الحزب الوطنى .. بس هى البلد كده .. و احنا برضه بنكشف قضايا فساد كتير
* *********
- فكر فى حزب او جمعيه اهليه او مركز دراسات ... لكن الفيس بوك لأ لأ لأ
بالطبع لم يكن النقاش مثمر او مفيد و لا اعرف ما الذى دفعنى للنقاش معهم ... استعنت بسلاح الصمت مره اخرى و جلست استمع مع هز رأسى بين كل فتره و اخرى كدليل على الاقتناع التام .. رغم ان رقبتى كانت قد تسمرت على اتجاه واحد و رفضت اى حركه يمينا او يسارا
تزداد الالام فى جسمى بمرور الوقت ... تزحف ببطء و ثقه تامه من الوصول لجميع انحاء جسدى .. يدى اليمنى لا استطيع تحريكها .. اذنى اليمنى ايضا و ياللصدفه لا استطيع ان اسمع بها .. أحس و ياللغرابه ان هناك من ضربنى ضربا مبرحا منذ قليل
- حاجاتك كامله؟؟؟
· لا فيه كاميرا فيديو ديجيتال ناقصه .. دى غاليه و كمان جايبها بالقسط .. لسه مشتريها من شهرين .. كان مقدمها 500 و قسطها 150 فى الشهر
- هاندور عليها ... سلام يا احمد و فكر كويس
*الو
* الو
* انت كويس؟؟
* كويس
* عملوا فيك ايه؟؟
*حاجات كتير عملوها و حاجات كتير ماعملوهاش
*كنت خايفه قوى عليك
* من ايه ؟؟ .. ماتخافيش
* ........
* بطلى عياط و متخافيش
* احمد انا حجخعبيتنبمرؤالساكنسسجخصخ
* ايه؟؟؟ .. بطلى عياط مش فاهم منك حاجه

عفوا ... لقد نفذ رصيدكم يرجى اعادة شحن البطاقه

أحمد ماهرمايو 2008

جروب شباب 6 ابريل على الفيس بوك

تغطية الموضوع من الوعي المصري

احمد ماهر

2008-05-08T16:52:00.000-07:00

حقك في رقبتنا ... مش هنسكت .. مش هنخاف.

و كل كلب دولة هيعرف مقامة قريب

قام افراد من امن الدولة باعتقاله اثناء توجهه لعمله و قاموا باحتجازه و استجوابه و التعدي عيه بالضرب لاكثر من 12 ساعة

تغطية الموضوع من مدونة وائل عباس

http://hmlc.katib.org/node/494

Billal vs Nazif

2008-04-21T12:53:00.000-07:00

دا نظيف .. و دا بلال .. و في جامعه القاهرة

تحديث

قام الطالب بلال دياب احد الطلاب الليبراليين بمداخلة رائعة اثناء كلمة احمد نظيف بجامعه القاهرة بمناسبة الاحتفال بمئوية الجامعه.
بعد انتهاء بلال من كلماتة العفوية .. تباهى نظيف بالحرية و الديمقراطية المتواجدة و التي سمحت له بالحديث. و على الرغم من ذلك و قبل خروجنا من القاعه بدأت مضايقات الامن . بل وصل الامر الى حد الاختطاف.. في ساحة كلية اللآداب اتى بعض الحرس و معهم شخص ادعى انه دكتور بالجامعه مطالب بانفعال بلال بما يثبت انه طالب بالجامعه و لم يعطه حتى الفرصة للحديث او يثبت على الاقل انه هو دكتور كما يدعي و من معه انهم حرس بالجامعه و اصطحبوه بطريقة مهينة جدا اشبه بالاختطاف او القاء القبض على مسجل خطر وسط اندهاش الطلبة من الموقف الحادث امامهم .. و نعم الحرية!
و بعد عده اتصالات و بمرور الوقت هدأ الموضوع .. و في مكتب قائد الحرس المحتجز به بلال لا ادري باي تهمه استدعانا قائد الحرس ليطمئنا على سلامته خشية من تصعيد الحدث .. نظرا للاهتمام الاعلامي بالامر ..
اثناء الحديث سألت قائد الحرس ..كيف يعامل طالب بهذه الطريقة المهينة داخل الجامعه و امام زملاءه من الطلبة و كأنة -حرامي غسيل- .. فقالي "صلي على النبي ... انت مصري ولا تركي ؟! " رديت مصري طبعا .. قالي " مش تركي يعني .. طب خلاص" اللي يتفهم انه عادي يعني متتحمقش اوي كدا ..مصري فياخد بالجزمة عادي ميقولش لأ
هو دا منطق و فكر الامن في التعامل في اي موضوع .. لا احترام لحق انساني او قانون او حرية اي فرد في البلد .. عادي
لا مجال للحديث عن اي ترتيبات مسبقة لليوم او ما كان المفترض ان يحدث لان شيء لم يحدث .. سواء بسبب التواجد الامني المكثف و المشدد جدا او لتجاهل البعض و التقليل من امكانية استغلال الحدث و توظيفة بطريقة جيدة لصالحنا .. المهم ان الرسالة و صلت من خلال كلمات بلال العفوية العالية الصوت و التي غيرت مسار كلمة نظيف من الحديث عن ذكرياتة في الجامعه الى قضايا و هموم البلد .
ماذا لو فرضنا ان بلال التزم كما قال نظيف و انتظر وقت المداخلات ليسمح له بالحديث ؟
اساسا عند فتح باب المداخلات و التحدث المباشر لم يلتفت احد اطلاقا للطابق العلوي و هو المكان المتواجدين فيه .. اما بالاسفل الاعلام و دكاترة الجامعه و طلاب اتحاد الطلبة و التربية العسكرية-تم جمعهم لملئ القاعه و السلام- و هم من اتيحت لهم فرصة التحدث.
و بالطبع كانت الاسئلة من نوعية " ما دور سيادتكم في تنمية دور المرأه ؟ او مطالبة بوجود تعليم بمقايل مادي بجانب المجاني بالجامعات الحكومية .. مع العلم انه موجود بالفعل تحت مسمى التعليم المتميز و جلب العديد من المشاكل.. فكانت الاسئلة ما بين التافهه و الساذجة او تروج و تلمع لفكر او سياسة بعينها عدا مداخلة د/ابو الغار.
كنت اتمنى استغلال الفرصة افضل من ذلك بكثير ..لكن اهه اللي حصل
تحيه لبلال و جرأته

تعديل حتمي لقانون الطوارئ .. و الارهاب من بعده

2008-04-16T12:08:00.000-07:00

اعتقد انه بعد اضراب 6 ابريل و علم الجهات الامنية ان التحرك الاول و الرئيسي للدعوه للاضراب تم عن طريق النت و الايميلات و جروب الفيس بوك .. ربما تفكر السلطات باجراء تعديل بسيط بالمرة على قانون الطوارئ لحين الموافقة على قانون الارهاب و الذي اعتقد ان هذا التعديل سيوضع في الحسبان في قانون الارهاب ايضا.

اقترح عليهم باضافتها للماده الخاصة بوضع قيد على حرية الاشخاص .. خصوصا في الاجتماعات ..

حيث ينص التعديل على انه ..

من حق رئيس الجمهورية متى اعلن الطوارئ ان يتخذ التدابير الآتية

اولا :

في حالة تجمع اكثر من 5 افراد اونلين على اي وسيلة الكترونية سواء على الماسنجر او ياهو جروب او فيس بوك جروب يعتبر تجمهر .. و من حق السلطات اغلاق الجروب و اعتقال اعضاءه و تحويلهم لنيابة امن الدولة للتحقيق في سبب التجمهر على الشبكة العنكبوتية .. و اعتبار الادمينز محرضين على التجمهر و مخالفة القوانين و تعريض حياة المواطنين للخطر .. و عليه يحولو لمحاكمة عسكرية لخطورتهم على الامن العام و لشق وحده صف الشعب و ذلك دون التقيد بأحكام قانون الاجراءات الجنائية.

ثانيا:

الأمر بمراقبة الايميلز و الـرسائل سواء بالماسنجر او sms و مراقبة الديسبلاي بيكتشر بالماسنجرو منع ظهورها و ضبطها و مصادرة الموبايل او جهاز الكمبيوتر .

ثالثا:

تحديد مواعيد الساين ان و الساين اوت و كذلك الامر بعمل بلوك او اغلاق بعض المحادثات او كلها .

رابعا:

اخلاء بعض المناطق من خدمة الـDSL او عزلها و تنظيم وسائل الاتصالات .. و تحديد بعض المناطق التي يجوز فيها الدخول للانترنت ,

خامسا:

سحب وصلات الانترنت و السوتشات و الروترات و مصادرتها و تسليمها للجهات المعنية.

سادسا:
يجوز لرئيس الجمهورية توسيع دائرة الفصل و العزل و مراقبة كافة وسائل الاتصالات على ان يعرض هذا القرار على امن الدولة خلال ساعات.

و شكرا

الله .. الوطن .. ابو علاء

2008-04-16T11:13:00.000-07:00

عندما اعلنت منى الشاذلي ان برنامجها (العاشرة مساء) سيدخل في اجازة لمدة اسبوع , كما قالت -عشان نستريح و نريح - . لم يطمئن قلبي .. فمنى الشاذلي تكاد تكون الوحيدة التي تملصت الى حد ما -على ما يبدو- من توجيهات و اموامر عليا بالتعتيم بعدم مناقشة و تجاهل اي شيء عن دعوة اضراب 6 ابريل او متابعه احداثة.. و تذكرت هياج الموالسين من ابواق الحكومة الثلاث منددين بما فعلته من عرض لاحداث الاضراب و ما حدث في المحلة على الرأي العام على اعتبار ان عرض تلك الاحداث ترويج للقله المنحرفة المندسة -اللي هو احنا-

كان من ابرز المنددين بفعله منى الشاذلي الشنعاء و -اللي هي عرض الحقائق و الاحداث للجمهور- هو محمد على ابراهيم بالجمهورية و الذي اعتبر ذلك ترويج للفوضى و حرق البلاد -على اساس اننا متفطمناش- بل و الاكثر انه تقليد لاسلوب قناة الجزيرة .. التي على ما يبدو من وجهة نظرة انها حاجة عيب.

و رأي محمد على ابراهيم في استضافة سعد الحسيني النائب الاخواني تحيز لوجهة نظر واحده و هي الداعمة لاشعال الفوضى .. و يبدو انه ليس على دراية ان الاخوان اعلنوا عدم مشاركتهم في الاضراب لحجج واهيه و لأغراض خاصة بهم , فقد اظهروا قدر كاف من الندالة و التي يتضح منها انه لا هم لهم سوى مصالح محدده خاصة بهم .. لا علاقة لها بشعب او معارضة او وطن ... تماما كقيادات الحزب الوطني .

محمد على ابراهيم ابدى اندهاشه كيف لقيادات الوطني دعم مثل تلك البرامج بالاعلانات , ففواصل البرنامج تعج باعلانات الحديد و السيراميك و القرى السياحية و غيرها و التي يمتلكها او يحتكرها اعضاء لجنة السياسات و قيادات الحزب الوطني.

فرضا ان هذه البرامج فعلا تضر بالبلاد و خطر عليها كما يدعي هو و من في الحزب ... فهؤلاء المسمون بالقيادات لا يهمهم البلاد اصلا .. فهم سواء قي السلطة او الحزب من اجل مصلحة شخصية لا بلد ولا وطن ولا شعب و بالتالي طبيعي جدا تواجدهم في اي مكان .. من اجل المصلحة و البيزنيس فقط و اولا.

المهم ان محمد على ابراهيم رأى ذلك دعم للبرامج الخطيرة و المحرضة من وجهة نظره .. و تسائل (انا ليه مزعل نفسي ... ما اتنيل على عين اهلى و اسكت ) و انا اشيد بهذه الفكره الرائعه و هي خير ما كتب و يا ريت فعلا يتنيل على عين اهله و يسكت.

المهم هنا الا تكون هذه الحملة ستؤثر على سياسة البرنامج تجاه تناول القضايا فيما بعد .. فهو من المنافذ القليلة في الشاشات العربية التي تنعم ببصيص الحرية المتاح حاليا

اضراب عام لشعب مصر

2008-04-05T00:10:00.000-07:00

يوم 6 إبريليوم إضراب عام في مصر

يوم 6 إبريل خليك قاعد في البيت أو شاركنا فى الميادين العامة

أوعي تنـــــــــزل لكن شاركنا

ماتروحشي الشغل

ماتروحشي الجامعه

ماتروحشي المدرسة

ماتفتحشي المحل

ماتفتحشي الصيدليه

ماتروحشي القسم

ماتروحشي المعسكر

عايزين مرتبات تعيشنا

عايزين نشتغل

عايزين تعليم لأولدنا

عايزين مواصلات أدمية

عايزين مستشفيات تعالجنا

عايزين دواء لأطفالنا

عايزين قضاء منصف

عايزين أمن وأمان

عايزين حرية وكرامه

عايزين شقق للعرسان

مش عايزين رفع أسعار

مش عايزين محسوبيه

مش عايزين ظباط بلطجية

مش عايزين تعذيب في الإقسام

مش عايزين أتاوات

مش عايزين فساد

مش عايزين رشاوي

مش عايزين إعتقالات

مش عايزين تلفيق قضايا

قول لأصاحبك مايروحوش الشغل همه كمان وخليهم يدخلوا الإضراب

أضراب عام في مصر سلمي

بيكوا وبينا البلد دي حتتغير إن شاء الله

البيان الأول لـ 6 إبريل المرتقب

أولاً : تعريف وأهداف 6 إبريل

1. ما هو 6 إبريل : 6بدأت الدعوة ليوم 6 إبريل كيوم للإضراب العام في مصر مع إعلان عمال غزل المحلة إضرابهم الثالث على التوالي وبدعوة منهم لكل فئات الشعب للوقوف سويا لإعلان يو 6 إبريل يوماً رسميا لإضراب عام بالقطر المصري نظراً لما أصبح يواجه الشعب من ظروف حياتية سيئة لاتلبث أن تزداد سوءاً يوما بعد يوم حتى أصبح وحش الجوع يواجه الكثيرين ممن أصبحوا معدزمي الدخل والذين هم في تزايد مخيف.
6 إبريل يوم شعبي- نابع من حركة شعبية تامة- يشارك فيه كل أفراد الشعب دون أى إنتماءات حزبية أو سياسية أو دينية بعينها بل هو يوم لكل من يحمل لقب مصري.

2. لماذا 6 إبريل : إعتراضاً على كل ما هو مرهق للشعب من أحوال إقتصادية وإجتماعية متدنية وبكل سوء لتهدر كرامة وكيان المواطن المصري، فلي رأس القائمة يأتي الغلاء الفاحش والغير مسبب في مقابل دخل ثابت ومعدلات تنمية ماهى إلا أرقام تهيم بالفضاء دون محاولات ومساعي جدية من أيا كان من يستطيع تحسين ولو بعض الأوضاع. ولا ينصب الإعتراض على الحكومة – وإن كانت محوراً رئيسياً لهذه الأحوال بصفتها الجهة المنظمة لأحوال الشعب – بل يتسع ليشمل اعتراضاً على الفساد والسلبية المجتمعية والإستغلال " واللذان أصبحتا آفة مجتمعية تقضي على جذور شعبنا " والترخي والفوضوية.

3. من القائم على 6 إبريل : لايقوم أحد بعينه على 6إبريل ولا أية أحزاب أو جماعات أو تيارات معينة بكافة أبعادها بل هي فكرة يصوغها الشعب بنفسه على شبكة الإنترنت وينقحها مجموعة من المنظمين ويتم ذلك بتصويت من كل المشاركين بالحدث على موقع الface book على الرابط http://www.facebook.com/group.php?gid=9973986703
بصفته أكبر وأوسع تجمع وأيسر وسيلة يومية للتحاور والربط بين المواطنين ، كما يقوم كل المشاركين - الذين هم في تزايد مستمر- بتجهيز الدعاية والمنهجية المتبعة في ذلك اليوم من خلال الحوار المفتوح أيضاً ، لتتم صياغة هذه المنهجية في بيانات وتنويهات متتابعة لتسهيل الإلمام بكافة النقاط التي تم طرحها وبالتبعية النتائج المتفق عليها. ويتفرع منه المدونة الرئيسية للإضراب على الرابط http://edraab.blogspot.com/ فالقائم على يوم 6 إبريل هو شعب مصر.

4. المشاركون في 6 إبريل : من يشارك في 6 إبريل! كل مصر لنواجه كل هذه السلبية بمجتمعنا نشارك في 6 إبريل - بالإضراب والإمتناع عن الشراء، او بالإعتصام في الميادين العامة – لرجال ونساء وشباب زاد احتياجهم الشديد لوطن كانت ظروفه المجتمعية أقوى من طموحاتهم وآمالهم تلك التي تضاءلت ومازالت تتضاءل ، حتي تقلصت في حق البقاء – في قوت اليوم.

5. هدف 6 إبريل : رئيسياً الوقوف أمام غلاء الأسعار التزايد إلى جانب ذلك تنبيه باقي الشعب والحكومة أن بمصر مواطنون تجلى صبرهم حتى نفذ، مواطنون انتموا لمصر وكان هدفهم مصر أفضل.
وقد كانت أهم أهداف ومساعي الإضراب كما أعلن عنها كالتالي :

أ‌. مطالب ودعوة من عمال غزل المحلة

ندعو كل الشعب المصري للاضراب عن العمل و الدراسة يوم 6 ابريل ولمن يستطيع التظاهر سلميا ورفع مطالبنا لحل الأزمة ومطالبنا هي :

- فك ربط الجنيه بالدولار (حيث أثر انخفاض سعر الدولار سلبيا على الجنيه فارتفعت الاسعار شكليا بسبب انخفاض القيمة الشرائية للجنيه)
- منع تصدير المنتجات الزراعية الغذائية إلا ما يفيض عن الاستهلاك المحلي
- فك احتكار التجارة الداخلية و الخارجية للمنتجات الزراعية الغذائية
- تأسيس شركات عامة للتسويق المباشر من الفلاحين للمستهلكين
- تنظيم الزراعة لتوفير الاحتياجات المحلية

وقد أضيف إلى ذلك:
- وضع قانون رادع وتغليظ العقوبة لمنع الفساد بالمؤسسات الحكومية وإعادة تحري كل كوادر الهياكل الإدارية
- الرقابة على الأسعار من الدولة وتفعيل قانون منع الممارسات الإحتكارية
- إعادة رسم العملية التعليمية ورفع جودة التعليم في مصر وتنظيم مجانية التعليم - ولذلك أولى أولويات الإصلاح-
- ترميم نظام التأمين الصحي على المواطنين وتطوير المنظومة الطبية - ولذلك أولى أولويات الإصلاح-
- إلغاء الرسوم الجمركية على السلع الإستراتيجية
- إعادة هيكلة دعم المشروعات الصغيرة والمكملة وتيسير القروض لتوفير فرص عمل

المشاركة في 6 ابريل

1. كيف تشارك في 6 إبريل : تبدأ المشاركة بمقاطعة شراء أى سلعة فى هذا اليوم ثم تشمل البقاء بالبيت ومحاولة الإنقطاع عن التليفونات وتخفيض إستهلاك الكهرباء قدر المستطاع إلا في الحالات القصوى أو لمتابعة الأخبار، في حالة النزول للشارع محاولة تجنب ركوب وسائل المواصلات قدر الإمكان.
ويمكن أن تزيد المشاركة بالإنضمام للمسيرات والإعتصامات المحلية بالميادين الرئيسية بشتى أنحاء مصر

2. مظاهر ومبادئ المشاركة في 6 إبريل :

تم الإتفاق على توحيد هذه المظاهر قدر المستطاع

• الاجماع على تعليق علم مصر فى البلكونات والسيارات.

• الاجماع على ارتداء ملابس سوداء و يفضل مطبوع عليها اى شعار للإضراب لو
امكن مع حمل شاره او اى اعلان عن "إنى مضرب إحتجاجا على الأسعار" ، أو شريطة سوداء في حالة عدم توافر الملابس.

• الإضراب عن شراء أى سلعه لتمثل وسيلة تهديد للحكومه التى لا تعيرنا اى انتباه و لا تحترم وجودنا ولا تحس بمعاناتنا و كذلك الاضراب عن شراء السلع يعتبر تهديد لاى تاجر يرفع الاسعار اننا يمكن ان نتحد لمواجهته "عند حدوث حالة شلل فى هذا اليوم سيفكر الجشعون الاف المرات امام هذا الشعب الواعى".

• الاضراب عن العمل و الغياب عن العمل هذا اليوم و اعلان ذلك قبلها و اعلان الاضراب.

• اجمع جميع الطلبه على الاضراب عن الدراسه فى ذلك اليوم و اعلان ذلك مسبقا.

• لإصحاب المهن الحرجه كالطبيب مثلا أو ما شابه و كذلك لمن لن يستطيع ابدا ابدا ان يمتنع عن العمل و كذلك بالنسبه للطلبه الذى يتوافق 6 ابريل مع امتحاناتهم فإنهم سيضطرون للذهاب لمصالحهم مع اعلان الاضراب لبعض أو كل الوقت و كذلك الاعتصام السلمى فى مجموعات إن امكن.

• على من يستطيع النزول للتظاهرات التى ستكون فى الميادين الرئيسيه بالمحافظات يمكنه ذلك و لكن بعد الاتفاق مع القوى السياسيه و منظمات المجتمع المدنى على ميعاد و مكان التظاهرات .. و حتى الان تم الاتفاق على
(ميدان التحرير فى القاهره .. و ميدان الحقانيه بالاسكندريه ... و ميدان الساعه بدمنهور.... و ميدان المحطه بالشرقيه ... و امام مبنى المحافظه بالمنصوره )
و ستبدا الوقفات الإحتجاجيه الساعه الحاديه عشر و تستمر طوال اليوم فى اسلوب متحضر محترم بدون أى سلوك او الفاظ غير لائقين ، و خيار التظاهر مفتوح لمن يريد .. و من لا يريد عليه عليه إلتزام كل ما يستطيع من الاختيارات السابق ذكرها.

• على الجميع العمل بجد منذ اليوم حتى يوم 6 ابريل على نشر كل تلك الافكار بين الشعب المصرى و هم اهلنا و اصحابنا و اقاربنا و زملائنا فى العمل مستخدمين فى ذلك كل الوسائل المشروعه من دعوات صريحه عامه او فرديه او ارسال رسائل محمول او مكالمات هاتفيه او البريد الالكترونى و المنتديات و المدونات و المواقع الاعلانيه و الجرائد و الصحف و المجلات و الاتصال بالفضائيات .. و كذلك تعليق الالافتات و ارتداء تى شيرت أو شاره يحمل الدعوه للإضراب من الان حتى ميعاد الاضراب و على طلاب الجامعه نشر كل تلك الافكار بين اصدقائهم و زملائهم و محاولة النشر بكل الوسائل السلمية.

• التأكيد علي سلمية الإضراب والإعتصامات بالشوارع، وعدم الإحتكاك بقوى الأمن بأى وسيلة كانت فلا يمكن للأمن التدخل إلا فى حالات الشغب والحالات القصوى طبقاً للدستور ونظراً لتواجد الحشود الإعلامية المحلية وأيضاً الدولية بمواقع الإعتصامات (ذلك حيث حرصنا على تبليغ منظمات حقوق الإنسان الدولية والعديد من وكالات الأنباء العالمية لضمان التغطية الإعلامية).

• مساعدة قوى الأمن في حبط الشغب والإحتكاكات المتوقعة وتقليص محاولات الإندساس ضمن الصفوف وذلك بأن يسمك كل المشاركين بأي من المندسين الذين يحاولون إثارة الشغب وتقديمهم للعناصر الأمنية وذلك لضمان إستمرار الإعتصام بنجاح، وسيتم إبلاغ كل ضباط الأمن المتواجدين بالمواقع بذلك في بداية اليوم شخصياً أو بواسطة مكبرات الصوت.

• إحضار ورود قدر المستطاع وتقديمها لضباط الأمن ومن ثم العساكر رغم غرابة الفكرة على مجتمعنا إلا أنها ستؤكد تأكيداً حتمياً على سلمية الإضراب وتحضر المتظاهرين.

• طبقا للمناقشات اجمع معظم اعضاء الجروب و ايضا خارج الجروب على أن يوم 6 ابريل هو البدايه و ليس النهايه .. و أننا سنستمر فى الاضرابات و كافة صور الإحتجاجات بعد يوم 6 ابريل نستطيع نشر الفكره لأكبر عدد و إجبار الحكومه و صانعى القرار فى مصر على الانصياع لرغبة الشعب.

3. المبادئ وتعليمات عامة لتنظيم المسيرات في 6 إبريل :

- التجمع صباح يوم 6 ابريل بالميادين العامة بجميع احياء القاهرة (العباسية - الجيزة - المطرية - الخ( أو بالأماكن المشار إليها بالمحافظات الأخرى

- السير على الاقدام فى اتجاه ميدان التحرير - التجمع الرئيسى للأضراب

- التحرك عندما يصل عدد الناس المجمعة أكثر من 50 فرد لنحمى بعض من تدخل الشرطة.

- عدم التحرك فى اعداد صغيرة - وفى عدم التمكن من ايجاد مجموعة فى المنطقة التى تسكن فيها للأنضمام اليها محاولة الوصول الى ميدان التحرير منفردا.

- خلال المسيرة سوف يزداد عدد المشاركين لتزايد الاعداد و زوال الرهبة من المشاركة من البعض بسبب زيادة الاعداد الى الآلاف وأطمأنان الناس بعدم إيقاف قوى الامن للمسيرة.

- من المعروف ان المسافة من بعض الميادين الرئيسية (العباسية - الجيزة - المطرية - الخ) سيرا على الاقدام سوف تستغرق حوالى ساعتين - وكل مواطن سوف يرى الحشد الهائل من الناس سوف ينضم و بذلك سوف يصل الى ميدان التحرير عدد هائل لن تستطيع قوى الأمن تشتيتها.

- أحضار زجاجة مياه لتفادى الحر و بعض الطعام أو الحلوى لطول فترة الاضراب

- عدم أستخدام وسائل النقل العامة و مترو الانفاق على الأخص بسبب احتمال ان تقوم الحكومة بغلق بوابات محطة السادات ومبارك و المحطات القريبة لوقف الاضراب.

- لبس كاب أو طاقية للحماية من الشمس.

- بالنسبة للنساء لبس ملابس تساعدهم على التحرك و محتشمة.

- ايقاف السيارات الخاصة بعيدا عن اماكن التجمع و السير على الأقدام.

- على أصحاب المحلات القريبة من التجمعات الاغلاق فى هذا اليوم لتأمين ممتلكاتهم .
- إستخدام لافتات مطبوعة بطريقة محترفة وتقليل الهتافات بقدر الامكان و ان يساهم من له القدرة على ذلك فى توفيرها للجموع المعتصمة، والمحافظة على المظهر الحضاري وتجنب أية أعمال فوضوية والبعد هنا وتركها للأمن للتعامل معها إن لم يمكن تسليم فاعليها لهم بأيدينا.

- عدم أستخدام العنف أو السب أو التحرش نهائياً ضد افراد الأمن لأنهم اخواننا المصريين و ينفذون التعليمات رغماً عنهم
- عدم الخوف أو الرهبة من قوات الأمن بل التعامل معهم بصورة أخوية فما هم هنا إلا للمحافظة على سلامة الممتلكات العامة
- عدم الإنخراط فى أي أعمال شغب أو حماس زائد ومحاولة لزوم المكان قدر المستطاع لتفادي تدخل قوات الأمن

- ندعوا الله ان يوفقنا من اجل شعب مصر.
الله ... الوطن ... شعب مصر

الله يرحمهم

2007-12-11T03:50:00.000-08:00

كارثة حصلت من كام يوم ربما تلفت الانتباه لما يحدث في الجامعات بصفه خاصة و مواجه الكوارث عامة
ملخص الموضوع ان في كلية الدراسات الاسلامسة - جامعه الازهر بالزقازيق و في احد المدرجات المكدسة بالطالبات طبعا , كان فب طالبة كانت سرحانة باين و بتنظر لسقف المدرج فوجدت مصباح كهربائي بيطلع شرارة و دخان و حاجات كدا .. البنت شافت المنظر دا و برد فعل تلقائي قامت راقعه بالصوت و كعاده البنات تضامنوا معاها بالصويت و الكل طلع يجري و ياروح ما بعدك روح و اللي يقع الله يرحمة و اسيب لخيالك تجسيد هذا المشهد المهيب مع خلفية من الصويت المتواصل
للاسف التدافع دا بسببه ماتت 4 طالبات و اصيب عدد لا بأس به منهم 6 في حاله حرجة. كارثة طبعا
المصيبة ان في اكثر الجامعات المصرية فيها نفس موضوع تكدس المدرجات بالطلاب و مفيش لا طالب و لا دكتور ولا حتى عامل على علم بكيفية مواجهه الكوارث و لا حتى في تدريب او توعيه بالموضوع دا - حريق , زلزال , انهيار مبنى ,تسرب غاز اي حاجة_
كوارث ايه كفا الله الشر - فال الله ولا فالك يا شيخ - ربنا ما يجيب كوارث . عالبركة ... هوا دا اللي تاخده من المصريين , حتى تلاقي طفاية الحريق متعلقة فووووق و ملفوفة فكيس بلاستيك و متعرفش بتتفتح منين اصلا!
في المانيا مثلا و ضمن استعدادها لاستضافة كاس العالم جابت مواطنين و دخلتهم استاد و قال يعني بيشجعوا و كدا و اطلقوا انذار كاذب و قاموا بالتعامل مع الكارثة الوهمية و اخلاء المدرجات في دقائق . شايف الحلاوة .. بيعملوا بروفه لكارثة ولا حد قال عليهم عالم فقر ولا بتقدر البلا قبل وقعوه و الكلام دا
.
لما قريت الخبر تخيلت كدا مدرج بكلية التجارة جامعه القاهرة من المدرجات الصغيرة و في فترة اواخر التيرم في محاضرة محاسبة علشان يكون مليان على آخره و طبعا و كالعاده و بدخول الدكتور تغلق كوالين و اقفال ابوبا المدرج بمنطق ان الفراخ متخرجش من العشة .. المهم الدكتور بيشرح و العيال - الطلبة و الطالبات يعني- فوق بعضيهم و ع الارض و السلم و كل حته في المدرج و مقفول ليهم من برا ... و يحصل ماس كهربي -سبب اغلب الكوارث في مصر هو و موقد الكيروسين_
و وريني الطلبة ولا حتى الدكتور هيخرجوا ازاي .. على ما يستجدوا عم اسماعيل ولا عم فؤاد ولا اي عم اللي هو العامل يعني ,و يستوعب ان في مصيبة و يفتح , و نظام اصلا يكون بيفطر ولا بيعمل ... زي الناس يعني ..و على ما يجي يفتح و المفتاح يعصلج معاه - لما تنحس بئا- .هيكون ربع اللي في المدرج اتشوا و الباقي نص سوا.
و بالفعل السنة اللي فاتت حدث حريق في احد تكييفات مدرج العيوطي بكلية التجارة و ربنا ستر .. و ربنا يستر دايما
بس الاحتياط واجب بردو

اناXبوليس

2007-11-29T07:02:00.000-08:00

لا اعلم ما الفائدة الرهيبة التي سيحصل عليها العرب من قمة انابوليس ..ليهرولوا جميعا و يجتمعوا في قطيع واحد ليحضروا تلك القمة
ما فائدة تواجد ممثل لدولة مثل لبنان رغم كل ما بها من خلافات ولا وجود بها لرئيس حتى ... و سوريا هي الاخرى على اي اساس ذاهبة ولا وجود اي نيه للتحدث بشأن الجولان المحتله
المؤتمر كله من الاساس اعتقد ان لا فائده منه سوى ايجاد حسنة للرئيس بوش قبل نهاية ولايته ..و كأنه راعي للسلام و انتزاع اعتراف بدولة اسرائيل من العرب
اسرائيل نفسها اعلنت انها لن تقوم باي اتفاقات الزامية و لن تقدم اي تنازل و قبل اي شيءالاعتراف بإسرائيل كدولة لليهود فقط .

ما استفذني بشده هو ان بعد كل سنوات الصراع مع الجانب الاسرائيلي لم يتعلم شئ من فن عرض قضيته و مواجهة مسكنه و تباكي اليهود الدائم . فانا ارى انه فشل في استغلال فرصة الكلمة امام العالم
فكان حديثة عرض لمطالبة و شكر و ثناء لبوش و كنداليزا رايس و صديقة اولمرت.

بينما اولمرت و بمجرد صعوده للكلمة .. اخذ يتحدث عن الارهابيين الفلسطينين و الذعر المصاب به المواطن الاسرائيلي دوما فيخشى ركوب اتوبيس او الذهاب لملهى لانهم يفجرونة .. حتى المشي فالشارع يهدد حياه المواطن الاسرائيلي الغلبان .لان السماء تمطر صواريخ قسام التي يطلقها الارهابيين الفلسطينين
و بمنتهى البساطة اي فرد في العالم عندما يشاهد الحديثين سيتعاطف مع الشعب الاسرائيلي المقهور المذعور من عمايل الفلسطينيين
على الرغم من ان في نفس ذات اليوم كان ثلاث فلسطينيين لقوا مصرعهم في قطاع غزه نتيجة قصف اسرائيلي .. لم يلتفت لهم ابو مازن و لو بكلمة في حديثة و كأن غزه ليست تابعه لفلسطين و من بها ليسوا فلسطينيين

back

2007-11-29T05:55:00.000-08:00

نظرا لظروف انقطاع الانترنت من البيت مكنتش بعتب هنا خالص و حتى مش عارف ليه محاولتش ابئا ادخل من برا
المهم لما جيت داخل دلوقتي .. حسيت زي ميكون كدا واحد داخل حوش مدرستة الابتدائي
قعدت اقرا فالبوستات و الكومنتات و استرجع الذكريات .. وحشني التدوين , و الناس اللي بتدون و ان شاء الله ارجع ادون كدا بانتظام و اهي حاجة الواحد بيعملها يملا بيها كام خانة من جدول اعمالة
و دمتم

سنة أولى تدوين

2007-05-20T08:11:00.000-07:00

مر اكتر من عام على تجربة التدوين بالنسبة لي ... حاجات كتير عايز اقولها بس كالعادة مش مترتبة و متلخبطة فدماغي فبيضيع نصها و اكتر

اهم حاجة عايز اقولها اني عرفت ناس جميلة جدا و فضلت على اتصال مع ناس بحبهم بسبب البلوج .. اللي شجعني على اني اعمله محمد الطاهر اللي من احسن الناس اللي اعرفها

بالنسبة للتدوين بئا ... بيكون نفسي اكتب حاجات كتير ... بس الانشغال و الكسل و ذاكرتي بنت الحلال بيقللو من دا

الفترة دي مثلا فترة امتحانات وقرف ... و التدوين فيها يكاد ينعدم ...

هتذكر معاكم كدا حاجات من التدوينات السنة اللي فاتت

بداية التدوين مرتبطة معايا باحداث و اعصامات القضاه و اعتقال اخويا

فالاول مكانش حد بيعتب البلوج تقريبا .. دلوقتي في رجل شويه ...

كتب حاجات زي لا يسمع و خليفة خلف و العصا و الجزرة و عليك الجزمة و المريخ معاك .. و حاجات تانية كدا

و هيست و كتبت بالروح بالدم نفديكي يا سعاد و تحقيق

و كان في نيتي اعدل الدستور في دستور فساكونيا و طلبت انه يتعدل من قبل ما الريس يفكرعشان محدش يقولي انجازاته و بتاع...الريس بيخش المدونة عندي ;)

و عن حاجات لفتت نظري ايام ما كنت بحضر محاضرات في الكلية .... و ظواهر رمضانية مبتتغيرش تقريبا

و عن ترقيع الدستور ... و لما فضفضت لقيت ناس زي العسل جنبي ... و رايي و حاجات كتير تانية... خش في الارشيف و دعبس في القديم .زي ما قلت الفترة الحالية دي شبه مفيهاش تدوين ... ادخل اقرا القديم

من اكتر الحاجات اللي بتسعدني لما الاقي عدد الزوار بيزيد او حد يقولي انه عجبته حاجة كتبتها او الاقي رد من حد

فعلا كل واحد بيسيب كمنت او بيزور المدونة عموما ليه الشكر لأنه بيسعدني جدا

اتمنى ان التدوينات تكون بتلاقي القبول او بتفيد فأي حاجة

و ياريت لو اي حد عنده اي تقييم او تعليق يقول ميتكسفش

هي ام الدنيا رصم

2007-05-14T08:58:00.000-07:00

منذ فترة قاموا بتعديلات في القناة الفضائية المصرية .... و لفت نظري لوجو القناة ... الذي كان قبل ذلك هرم مكتوب اسفلة المصرية .. قال يعني فراعنة و كدا
تحول هذه المرة ليصبح عبارة عن مربع احمر لامؤاخذه ..به كلمة اكتشفت بعد التدقيق انها مصر بحروف لكنا مكتوبة من اليسار ... ر ص م استغربت و استفزتني الفكرة ! فما يدل المشاهد على ان هذه الفضائية المصرية و ليست قناة رصم ... و لكن وجدت كلمة المصرية تظهر و تختفي سريعا و كأنها ظهرت بالخطأ على اللوجو

كنت هكتب عن الموضوع دا ... لكن تراجعت قلت اكيد الراجل بتاع اللوجوهات اللي عندهم بشمهندس اد الدنيا و بياخد فلوس اد كدا و مش انا اللي هعدل عليه يعني

لكني امس اثناء مشاهدتي لمباراة الاهلي و طلائع الجيش التي حسم بها الاهلي بطولة الدوري لصالحة

كنت بمر سريعا على القنوات التي تذيع المباراة ... فتوقفت عند الفضائية المصرية اتابع .. ناظرا للوجو كي اسخر منه شوية في عقل بالي .. منتظرا الهروب السريع لكلمة المصرية من اللوجو ... و لكنها تصدمني و تعاند و تتوقف فترة اطول ! بتغيظني دي ولا ايه ! و انتظر ظهور حروف كلمة رص م .. لتخدعني هي الاخرى و تظهر حروف كلمة مصر عادية !

الله!!
ماهو يا كان بيتهيألي او هي اتعدلت

يبقى انا وجهه نظري في اللوجو القديم كانت صحيحة ... و الدليل قيامهم تعديلة
شكيت للحظة بأن كل ذلك تهيؤات و ان كل حاجة مظبوطة من الاول و انا بشتغل نفسي

و لكن يبعث لي المخرج بفاصل يطمأنني على نفسي و يؤكد ما كنت اقول ...

لانة يحمل اللوجو القديم -اللي هو الجديد قبل تعديلة- بحروف كلمة - ر ص م - ايوا كدا يا عم قلقتني

بالذمة مش عيب لما البلد التي تمتلك 3 اقمار صناعية تستضيف و تبث مئات القنوات

تفشل في اختيار لوجو مبتكر و معبر عن قناتها الفضائية ! حتى لوجو القناة الارضية يذكرني بلوجو قناة سبيس تون او قناة رياضية .. سباق السيارات كما ذكرت في بوست سابق

الناس دي مبتتفرجش على تلفزيون ولا ايه ! ... يشوفو لوجو دريم , المحور , روتانا ولا حتى ام بي سي 3 ولا حتى مزيكا و ميلودي ... دايما فاضحنا كدا

عن ايمن نور

2007-05-09T09:55:00.000-07:00

22/مايو القادم الحكم في العفو الصحي عن د / ايمن نور
هذا الرجل احترمه جدا جدا و أتعاطف معه كثيرا .. و في قمة افتقادي له ...
أتذكر في يوم الوقفة الاحتجاجية الخاصة بيوم الأربعاء الأسود الذي تم فيه الاعتداء و التحرش بالناشطات و الصحافيات بعد تعديل الماده 76 ... كانت أول مره أراه فيها وجها لوجه ... و توجهت إليه أريد أن أحدثه في أي شيء و السلام .. و الصراحة الراجل وجدته مهتم بما أقول و يرد على .. رغم وجود صحفيين و مراسلين

معروف عنه طيلة 10 أعوام من العمل السياسي بالنزاهة و الشرف و النشاط و الفاعلية و فكرة الجيد... بالإضافة لامتلاكه كاريزما و شخصية تجذب الناس حوله
اعتبره من الأسباب الرئيسية في الوعي و شبة الحراك السياسي الذي نعيشه الآن ...
قد تتفق معي أو تختلف .. قد تحبه أو تكرهه أو لا تعرف عنه الكثير ... تسمع عنه أخبار

و لمن لا يعلم كتبت في بعض الأمور التي قد تود معرفتها .. عن حزب الغد و ايمن نور

ايمن من مواليد الإسكندرية عام 1964
تخرج في كلية الحقوق جامعة المنصورة
نال درجة الماجستير في فلسفة التاريخ السياسي
نال درجة الدكتوراه بتقدير امتياز عن الحركة الإسلامية في مصر خلال الفترة من 1980 حتى 1990
عمل بالصحافة و تميز به منذ صور العدد الأول من جريدة الوفد عام 1984 ..
تقلد منصب رئيس القسم السياسي بالجريدة . ثم مساعد مدير التحرير و مدير مركز الدراسات السياسية و الاستراتيجية ثم مساعد لرئيس التحرير
ثم رئيس تحرير و رئيس مجلس إدارة جريدة الغد من بعد الوفد
كان من اصغر الأعضاء سنا و نشاطا سواء فالعمل الصحفي أو السياسي

حصل على عضوية مجلس الشعب لدورتين انتخابيتين عن دائرة باب الشعرية 1995/2000 و 2000/2005
حصل عام 1999 على جائزة أفضل أداء برلماني لدول شرق البحر المتوسط
و نائب لزعيم المعارضة بمجلس الشعب

انتخب سكرتير للهيئة الوفدية العليا و عضو هيئة مكتب ثم عضو بالهيئة العليا لحزب الوفد
تولى رئاسة مجلس إدارة جمعية نور الخيرية بوسط القاهرة منذ عام 1994

عضو المنظمة المصرية لحقوق الإنسان بالانتخاب لأكثر من دورة

أصدر له العديد من الكتب ( الحرية السياسية في الإسلام ) و( الليبرالية هي الحل ) و( يوميات صحفي مشاغب ) و( العسكري الأسود زكي بدر ) و( أزمة الخليج اغتيال الكويت ) و غيرهم

أسس حزب الغد الليبرالي المصري

بداية الحزب

قام د/ايمن نور بالإعداد لحزب ليبرالي بداية من 2001 حتى 2004
تقدم الآلاف من الراغبين في المشاركة في تأسيس الحزب بتقديم التوكيلات
قدم برنامج الحزب للجنة شئون الأحزاب ثلاث مرات كان يتم رفضه في كل مرة ...و في المرة الرابعة تم قبوله و أصبح حزب رسمي باسم حزب الغد الليبرالي و خرج للنور في أكتوبر 2004

انتخب ايمن نور رئيسا للحزب ..
أصبح الحزب في فترة قصيرة جدا من انشط بل انشط الأحزاب المصرية و وطرح العديد من الأفكار و المشروعات كمشروعا لدستور جديد لمصر وتصورا للحوار الوطني و رفع حالة الطوارئ وغيرهم

طاف ايمن نور المحافظات المصرية مقيما للندوات و النشاطات الأخرى .. ليصبح حزب الغد حزب سياسي حقيقي نشط بخلاف الأحزاب الديكورية الأخرى

قام أيضا حزب الغد بتقديم تجربة ديموقراطية للحياة السياسية المصرية ...بعمل انتخابات حقيقية و نزيهه لرئاسة الحزب ..و تقدم عده مرشحين ابرزهم مهندس/وائل نوارة و ا/ايهاب الخولي

فاز فيها ا/ايهاب الخولي ليكون ثالث رئيس لحزب الغد بعد السفير/ناجي الغضريفي و د/ايمن نور من قبله

التوكيلات المزورة

يبدو أن نشاط ايمن نور و تحمسه و قيامه بحزب حقيقي لم يرق للبعض ... فبعد 3 اشهر من بدأ ممارسة الحزب نشاطه, اكتشفوا فجأة أن بعض التوكيلات التي قدمت لتأسيس الحزب مزورة !
التوكيلات التي كانت بحوزتهم و قدمت لهم 4 مرات اكتشف أنها مزورة !
الخبر يثير الدهشة ! كيف يزور رجل قانون توكيلات لتأسيس حزب !
هل يعقل انه بحاجة لتزوير توكيلات أقاربه و زوجته و والده كما قيل !
ثم لماذا يلجأ للتزوير علما بأن المطلوب لإعلان تأسيس حزب 50 توكيل ... و قد قدم د ايمن نور أكثر من 2000 توكيل .

تم رفع الحصانة عن ايمن نور النائب البرلماني في سابقة لم تحدث من قبل ... فتم رفع الحصانة عنة في 5 دقائق و أدارج أسمة على قوائم الممنوعين من السفر و تفتيش مسكنة و مكتبة في نفس الوقت –قبل رفع الحصانة- و تم إلقاء القبض عليه أثناء خروجه من المجلس
و لو قارنت بينه و تهمته بالتزوير و الإجراءات المتخذة ضده و بين ممدوح إسماعيل مثلا و تهمته بقتل أكثر من 2000 مواطن مصري أو هاني سرور و قضية الدم الملوث أو حتى تامر حسني و تزويره لمؤهله و شهادة الخدمة العسكرية.. لعلمت النية المبيتة له

تم إطلاق سراحه بكفالة 10 آلاف جنية ..

ايمن نور وصيف رئيس الجمهورية

كان أول من أعلن ترشيحه للانتخابات الرئاسية بعد تعديل المادة 76
و منذ الوهلة الأولى كان واضح للجميع انه أكثر المرشحين جدية ...
و بدأ هجوم قذر علية من كل جانب يهدف لتشويه سمعته و تقليص شعبيته التي تزداد يوم بعد يوم

فتم اتهامه بالعمالة للخارج ... و هو الاتهام الأسهل لدى النظام و أول ما يلقى به على معارضيه .. ليقلب الرأي العام عليهم
و لكن من يتهم من بالعمالة !
كان ايمن نور رافضا لاتفاقية الكويز مع إسرائيل رغم سعي النظام بكل الطرق لإبرامها مع الجانب الإسرائيلي و تصدير الغاز لهم بأقل من سعره بكثير و تنفيذ الأوامر و السياسات الأمريكية ..
.النظام الذي أفرج عن الجاسوس الإسرائيلي عزام عزام ... و الذي سمح للقوات الأمريكية بالعبور من أراضينا لضرب العراق..ثم يرفض خروج القوات الأمريكية من العراق ...و يعلن انه متفهم لموقف القوات الإثيوبية لغزو الصومال البلد العربي الإسلامي !

و اتهم أيضا بتلقي التمويل من الخارج ... رغم أنة نائب برلماني يقدم تقرير ذمة مالية كل فترة للمجلس ! فكيف سيحصل على الملايين دون أن يشعر احد ...و لم يلتفت احد ليسأل أين مليارات المعونة الأمريكية التي يتسلمها النظام سنويا !

و تم التشكيك في الدكتوراه الحاصل عليها ... و أسمة ! و وصل الأمر للتشكيك في عقد زواجه ! ... و رفعت عشرات القضايا ضده لأسباب واهية و لا أساس لها ...

معركة الانتخابات و الحكم بـ 5 سنوات

و خاض معركة الانتخابات الرئاسية و رغم التزوير و المضايقات و كل ما تعرض له حصل على 30% من الأصوات بشهادة المراقبين و المحللين للانتخابات ... و لكن تم الإعلان عنها على أساس أنها 5 % و في كلا الحالتين فهو في مركز الوصيف متفوقا على كل الأحزاب العتيقة ... و للعلم انه كان يكتسح في أي استفتاء عن مرشحين الرئاسة سواء في جرائد مستقلة أو على الانترنت

أصبح ايمن مصدر للقلق و الإزعاج للنظام ... فهو من اشهر و ابرز و انشط السياسيين على الساحة ..و وجوده قد يجعل خطة تلميع أمين لجنة السياسات بلى جدوى ... و يصعب من توريث الحكم

فتزداد درجة اضطهاده ... و يتم إسقاطه في انتخابات مجلس الشعب بطريقة ساذجة ... فالرجل الثاني بعد رئيس الجمهورية و الذي تعرفه مصر كلها .. يصعب عليه الفوز في دائرته التي تعشقه اهلها و ممثلها من 1995 حتى 2005 أمام مرشح يكتسحه من الجولة الأولى دائما
و بعدها بأيام يدخل السجن و يحكم علية في قضية التوكيلات الهزلية بالسجن المشدد 5 سنوات
و بهذا الحكم ينجح النظام في أن يفقده حقه في الترشيح لأي انتخابات رئاسية قادمة ...

مؤامرة المنشقين عن الحزب

طبعا بعدما أصبح حزب الغد من انشط الأحزاب السياسة ... قامت عليه مؤامرة دنيئة ... شارك فيها النظام بإعلامه القذر المرئي و المقروء و المسموع

يتلخص الموضوع في فصل 4 أعضاء من الهيئة العليا للحزب .. موسى مصطفى موسى و رجب هلال حميدة ومرسي الشيخ و آخرون ... فساندهم النظام و تم نصب مؤتمر لهم و أطلقوا على أنفسهم جبهة شرفاء الغد و لم يريد النظام قول الحقيقة و صورها في كل وسائل إعلامه بأنهم منشقين عن الحزب و ليس مفصولين من الحزب ... المهم قاموا بالمؤتمر الوهمي و أصدروا قرارات وهمية و فصلوا ايمن نور و وزعوا المناصب عليهم .. رغم أنهم لا يمتون للحزب بصله بعد فصلهم .. كل هذا تحت رعاية وسائل الإعلام الحكومية التابعة للنظام و في غضون أيام قاموا بإصدار جريدة لحزبهم الوهمي في نفس شكل و اسم جريدة الغد .. و ظل النظام راعي رسمي للمشكلة بمساندته للمفصولين فمن أين أتوا بالمال و الدعاية لهم و إجراءات و تصاريح إصدار الجريدة!
و الذي يفضح كل هذه الأمور رجوع مرسي الشيخ لحزب الغد و اعتراف و فضح ما حدث .

ايمن نور الآن

دعت 23 منظمة حقوقية مصرية للافراج الصحي عن ايمن نور لما يعاني منه داخل السجن بالاضافة لاكثر من 100 نائب برلماني..تقارير الطبيب الشرعي يحذر من موته الفجائي
ايمن نور يعيش أسوأ أيام حياته داخل السجن .. فهناك محاولات مستمرة لتصفيته و إصابته بعجز دائم
فيتم التعنت في استقبال الأدوية من خارج السجن و يفرض عليه أدوية قد تضر به ... لم يسمح له بعمل عملية توسيع لشرايين القلب و رفض طلب سفرة لعمل عملية تغير مفصل الركبة ... حيث لا تجرى هذه العملية في مصر سوى في مستشفى واحد خاص و تستعين بخبراء أجانب
و من فترة لأخرى تحدث له مضاعفات هذا الإهمال المقصود الذي أدى لبتر إصبع قدمه نتيجة مضاعفات مرض السكر ... فقد أصيب بانفجار في الشعيرات الدموية في عينة و امتنع طبيب السجن و مدير مصلحة السجون عن تنفيذ قرار المحامي العام بنقله إلى وحدة الرعاية الحرجة. ... و بعدها بأسبوع قام بإجراء عملية قسطرة على القلب و عاد في نفس اليوم للسجن دون الحصول على الرعاية الصحية أو أن يفيق من غيبوبته ... بالإضافة إصرار إدارة السجن على ترحيلة داخل سيارة ترحيلات و المصرح له طبقا لقوانين السجون بسيارة إسعاف نظرا لحالته الصحية
و حتى الأسبوع الماضي أصروا على ترحيلة لمحكمة جنح عابدين في سيارة الترحيلات

تعامل النظام مع ايمن نور بهذه الطريقة يظهر جبن و ضعف و هشاشة هذا النظام ...
ايمن نور يرهبهم جميعا لأنه خطر على مناصبهم و كراسيهم و فسادهم و على مخططهم للتوريث ... فيخشون قلمه فيمنع من الكتابة ..يخشون حب الناس له فتخفى أخباره و يسلط الضوء على ما يسئ إليه ... يعزلوه عن من حوله و العالم كي لا يتحدث لأحد .. حتى وقت الزيارات بمجرد خروجه يختفي البشر من كل مكان يذهب إليه يحرصون على عدم مقابلته لأي فرد

وفقك الله العادل الذي لا يرضى بالظلم و أعانك على ما تعانيه ... و قريب أو بعيد ستنال حريتك المسلوبة و يعود الحق لصاحبه ... و يعلم الجميع ... ستظل في أذهاننا و سيسجلك التاريخ بطل .. مناضل .. صاحب حق ... و هم تحت الأقدام يصاحب ذكر أسمائهم السباب و اللعنات

و يمر عام من ايامك السودة

2007-05-04T08:10:00.000-07:00

لا اجد كلمات تعبر عما بداخلي من كمية الكراهيه و السباب و اللعنات التي أكنها لك ...عام اسود آخر مضى و سجل في تاريخك الاسود .. لعنك الله دنيا و آخره و اسكنك ادنى دركات جهنم

سنوات عمرك تمر حتى تصل لآخرها و بعدها الحساب ... اعتقد ان اي شخص مؤمن يضع الف حساب لذلك اليوم

لم تنتهي الايام السودة التي بشرتنا بها منذ مجيئك حتى الآن ...فالكل على يقين بالارتباط الوثيق بينك و بين تلك الايام عديمة الملاح

و التي لن تنقشع ظلامها الا بزوالك

لعنة الله عليك انت و كل حاشيتك و موالسيك

خلي ايميلك مقبرة للرسايل الخنيقة

2007-04-22T03:46:00.000-07:00

الواحد اول ما يفتح الماسنجر .. بيصطبح بشوية ايميلات تفقع ..

انا مش عارف شعور اللي بيبعتها بيكون ايه ... بس اكيد هو مقتنع او خايف ميبعتهاش لتصيبة لعنه من اللعنات اللي بيستحلفوا بيها للميبعتش الرسالة هو كمان.

المهم انها حاجات كلها من خيال كاتبها و الباقي شغال فورورد و اهو ثواب ... و ابو بلاش كتر منه

موضوع الايميلات دا بيحصل لينا كلنا اكيد طبعا ..

المهم انك تلاقي صياغات كتير لموضوع واحد و دا يبين ان في ناس عجباها الفكرة و بتطلع عليها نسخ

.. انا هذكر امثلة لاكثر الايميلات اللي فقعتني .. مش كلها طبعا عشان ملهاش حصر
اشهرها على الاطلاق ... عاده هيذكر ان عمك محمد ابو اسماعيل من فلسطين مثلا كان نايم و خير الله ما اجعله خير حلم و شاف الرسول بعينة و بلغه سلامة و - و يقول حبه حاجات كدا- و اوصاه يبلغ الرسالة للكل .. و اللي يقراها هيجيله الفرج ولا يفرح في خلال 4 ايام ... و اللي مش هيبعتها ولا هيستهتر بيها هيموتلة ميت ولا هيزعل ... و امانة فعنقي ليوم الدين انشرها لـ 25 واحد .. يا هيحصل كذا

و كذا و كذا !!

طبعا الشخص و المكان و الاحكام و عدد الايام و الايميلات .. بيختلف من واحد للتاني ... هو و مزاجه بئا المهم حد يلبس و يبع و تفضل تلف على خلق الله

طيب لو واحد معندوش 25 ايميل يعمل ايه ! مش عارف ايه الرؤيات الموديرن دي اللي بيتطلب فيها بعت ايميلات

lego

ايميل تاني بردو فيه صورة استهزاء بالرسول معمولة بالمكعبات و مكتوب عليها ميد ان دينيمارك بئا و متلفقه لشركو ليجو بتاعة لعب الاطفال المكعبات دي lego

و الايميل مليان دعا على الدينيمركيين و غيرهم و لعنات و خطب و طلبات مقاطعة ... و طبعا المطلوب منك انك تفوت الايميل دا لكل اللي متضافين عندك عشان تنصر الاسلام و نبيك !
لما دخلت على موقف ليجو لقيتهم كاتبين تنويه عن الموضوع دا هـــنـــا

يعني مفيش موضوع اصلا و الايميل دا ما هو الا ترويج للصورة مش اكتر

apple

و ايميل بردو خنقني موت فالاول ... كان عبارة عن ايه .. ان شركة ابل بتاعة الكمبيوتر و الالكترونيات عامة.. عاملة ديسكو و بار على شكل الكعبة في ولاية منهاتن اسمها تفاحة مكة!و جايبلك صور بئاا .. و لازم تبعتها لكل اللي تعرفو و تدعي عليهم و تعمل و تسوي ... الصراحة حاجة تضايق ان بار على شكل العكبة ... بس تيجي ازاي يعني شركة ابل تسيب الكمبيوترات و الآي بود و تفتح خمارة !.. و ازاي اصلا شركة ابل العملاقة تعمل حاجة تخسرها سوق استهلاكي من الدرجة الاولى و هي المنطقة العربية كلها ! غباء هو !

الرسالة جاتلي اكتر من مره .. مرة يقولو خمارة 24 ساعه و مرة ديسكو .. كان في فرسالة منهم لينك للموضوع الاصلي .. دعبست حوالين الموضوع .. لقيت ان دا يادوبك منفذ بيع .. مبنى شركة ابيل عملاه على شكل مكعب زجاجي و هو لسه بيتعمل كان الزجاج مغطي بطبقة بلاستيك سودا ... فكان شبه الكعبه ... الظاهر ان الصورة عجبت واحد و خياله سرح عليها فعملنا الرسالة اللي قعد اتبعتت لآلاف

و طبعا في آخر الرسالة نفس الطلب العقيم بارسالها لخمس اشخاص على الاقل .. و دا مش هيفيد غير بترويج شائعه و يضحك الناس علينا .. ولا نصرة اسلام و لا يحزنون ... و الجديد كان في الرسالة دي طلعوا زي شعار كدا "من لم يهمه أمر المسلمين فليس منهم " و يسموها رسائل دينية

ولا الادعية اللي تقرأها تدخلك الجنة .. و لو مسحت الرسالة هيجيلك مصيبة

كفاية بئا فضحتونا

لم تقتصر الرسايل الخنيقة على الامور الدينية و ان كان الشق الاكبر لها

عندك مثلا ايميل الابرة اللي بتكون في الكرسي لامؤاخذه يعني فلما بتقعد تشكك تلاقي فيها ورقة مكتوب مرحبا بك في عالم مرضى الايدز

و ان مش عارف مين في باريس حصلها كدا في سينيما و واحده في لبنان و تالت في هومولولو و يعيش بئا .. و اللي نطلع بيه من ايميل زي دا .انك تاخد بالك قبل ما تقعد ...مع ان معرفش الصراحة قدرة شكة الدبوس على نقل الايدز بس اعتقد لو كان موضوع زي دا مكانش الاعلام سكت عليه خالص يعني .. مش واحد قاعد في بيتهم هو اللي هيكتشفة

موضوع الشائعات و الهرتلة وصل للمظاهرات كمان ... زي دعوه لمظاهره امام قصر عابدين .. الدعوه حلوه و كل حاجة ..بس عامة اوي .. فيها كل حاجة تقرف في البلد...انما مين اللي منظمينها ولا بيدعوا ليها متعرفش ! ذاكرين حركة كفاية و احزاب على انهم مشاركين فيها .. بس لا كفاية ذاكرة عنها حاجة ولا احزاب..واضح انه اجتهاد شخصي من حد

الموضوع طول و مهما اجيب ايميلات مش هنخلص

عايز اقول .. خلي ايميلك مقبرة للرسايل الخنيقة .. تيجي لغاية عندك و تقف

بدل ما تخنق على صحابك او تضر دينك او تروج هرتلة حد .. متمررهاش لحد .. لو في دعاء بيدخل الجنة مكانش حد غلب و محدش يعرف الغيب عشان مسح الرسالة يعملك مصيبة او يأذيك

حاجات اسبوع

2007-04-01T06:04:00.000-07:00

حبه حاجات حصلت الاسبوع دا

اولا يوم الاتنين اللي فات في المصري اليوم اتنشر موضوع في صفحة 14 عن المدونين و موقفهم من الاستفتاء و كدا .. و ضمن المقال اتنشر لوجوهين بتوع مقاطعة و رفض الاستفتاء كنت انا عاملهم .. بس مجابوش سيره اي حاجة لا عني .. ولا حتى البلوج ... دا تقريبا جايب مواقف كل اللي بيخشوا نت معادا انا
هو مش في ملكية فكرية بردو!

تاني حاجة

ادام النادي الاهلي واحد بيبيع الحاجات اللي بتتعلق في العربيات دي .. لقيت علم مصر قلت فل اجيبة .. بلااهلي بلا ارسنال ولا منشيستر.
ألاقي مكتوب عليه
المصدر:اكيس اتشينا
المستورد:يونيتدكراون
المنشأ: الصين
الصنف:FLAG
MADE IN CHINA

علم مصر صيني ... احيه

تالت حاجة
لاحظت مش عارف دا مره واحده ولا من بدري الكلام دا .. مشروبات و شكولاتات و خلافة كلها بئت بتجيب طاقة
حسيت انهم طلعوا مرة واحده كدا كلو عمال يشحن ... و الاعانات كلها بتتك على النقطة دي اوي

من ماونتن ديو .. و بويزون .. و مشروب العقيم باعلانة الاكثر عقما بوم بوم -بغض النظر عن موديل الاعلان- و باور هورس .. و شكولاتة مورو و سنيكرس و ميكسمام و غيرهم و غيرهم ... صباحو طاقة يعني . تقريبا عارفين ان الشعب كله مأنتخ و بيلعبوا على النقطة دي ... ربنا يوفقنا و يوفقهم و يزنجفونا كمان و كمان

من زمان و الواحد مشتراش ترماي و الله

تزوير عيني عينك

2007-03-27T19:17:00.000-07:00

لقد قال الشعب كلمته
كل مسئول يطلع يقولك الجملة دي حتى الريس..

هو دا الشعب اللي قال كلمته

يصوت نيابة عن بلد بأكملها
هي دي الشفافية

حشد طالبات و امرهم بالتصويت بنعم

الاخ عنده ضمير ..صوت و بيمضي بدالهم كمان

منتهى النزاهة و الشفافية

اتفو على دا نظام

لجنة كاملة يتم فيها التزوير لساعات

من مدونة العريش

مدونة العريش

تحريض بين

الفيديو من اخوان الدقهلية .. و الصور من جريدة الشعب و الجزيرة توك

مفيش فايدة

2007-03-26T16:26:00.000-07:00

بعد يوم زبالة و نكد و انباء تحرق الدم عن الاعتقالات و السحل و الضرب رغم عدم مشاركتي في هذا اليوم و لكن الاخبار السيئة و منظر الامن وحده كافي لحرق الدم.

صحيت اليوم عالاستفتاء الصبح تابعت من خلال التلفزيون .. عمال اتنطط ما بين الجزيرة و العربية و الحره ..و لما اعوز احرق في دمي ولا احفز نفسي اجيب قناة النيل

على الساعة 4 و نصف كدا توجهت للجنة للادلاء بصوتي ... الوقت في منتصف اليوم .. اللي فالشغل جهه و اللي صحي صحي
يعني المفروض الاقي بشر هناك
اللجنه كانت في مدرسة الخبيري الاعدادية.. امامها يفط تأييد التعديلات الدستورية و بوسترات الحزب الوطني المحرضة على التصويت بنعم
اللجنة تقريبا مافيهاش غيري و كام واحد معرفش بيعملوا ايه اصلا .. بس مش بيصوتو
دخلت .تلاتة قاعدين على دكة كدا موظفين عاديين ومفيش في اللجنه قاضي و لا بتاع .. مكسل يدور على اسمي ... بعد ما اتشاوروا استقروا انهم يقيدوني ..حوارات كدا .. اداني البطاقة .. مفيش لا بروفة لا ستارة ولا اي حاجة
يلا و ايه اللي هيحصل روحت معلم و خلاص و هما باظين عنيهم في الورقة
طبقتها و حطيتها فالصندوق - البطايق اللي فيه لا تتعدي ال20 بطاقة -و مضيت و سلامو عليكو و مشيت
ولا حبر فسفوري ولا يحزنون ولا حد عزم بيه عزومة حتى
حاولت اقف اتابع الموقف اشوف ايه الاخبار بس ملقتش حاجة تتابع غير عساكر الامن اللي بيودو و يجيبو في ميه و شاي

انا لآخر لحظة كنت متردد ما بين المقاطعة و المشاركة بس يلا هي جت كدا وانا كنت ميال للمشاركة
لما نزلت وسط البلد و شفت كميات الامن تاني و البلطجية كل كام متر مرصوصين .اتخنقت جدا .. هو كدا خلاص مفيش حاجة اسمها تظاهر في مصر
هنفضل طول عمرنا كبيرنا سلم نقابة الصحفيين! و متكردننين كمان
طيب هو ايه البلد دي و ايه الناس دي
طيب مش دا دستور بلدنا بردو و حاجة مهمة و المفروض الناس تعمل حاجة يعني!
الواحد من كتر ما بيلاقي استغراب من اللي بيحصل ابتديت اشك ان الاعتراض غلط و المفروض ندخل معاعهم القطيع .. القطيع هو الصح
بس ازاي ... مفيش كرامة .. طيب ما اكرملي اسيب البلد دي .. و اهو الواحد لما يكون في بلد غريب لا هيهتم بحاجة ولا يحرق دمه عشان حاجة ما ياكش تولع البلد .! الله طيب ما تلت اربع الشعب كدا اصلا في بلدهم
اغراب في بلدهم
هو ايه اللي فاضل يتخاف عليه ! .. عشان نقعد في بيوتنا كافيين خيرنا شرنا

ماهو حاجة من تلاتة ... يا تسيبلهم البلد و تمشي و ياكش تولع .. يا تقعد فيها و رجليهم فوق رقبتك انسان منزع الكرامة و تفضل مصر زي ما هي ... يا يكون عندك دم و تدافع عن كرامتك و حريتك و ترتقي بمصر و اللي فيها

ما بين المقاطعة و الرفض

2007-03-22T02:11:00.000-07:00

التعديلات الدستورية ستمرر و هتقبل هتقبل .. لكن هل هناك سيناريو معين سينفذه النظام ! سنرى .. غالبا ما ستظهر النتيجة ما بين الـ 80 و الـ 90% و يا خبر النهاردة بفلوس .

يفرسني موقف المعارضة و التأرجح بين المقاطعة و الرفض .. ثم اخيرا الاستقرار على المفاطعة

ارى ان الدعوة للمقاطعة دعوة للسلبيه ... الدعوه للمقاطعه تكون لمواطنين عارفين في ايه ... لكن تقول لشعب لا يفقه شئ في امور بلده قاطع ... طيب دي جت له عالطبطاب .. لا هيحاول يفهم في ايه و لا هيكون فاهم في ايه و حشود الحزب الوطني من موظفين و فلاحين و عمال و موظفين شركات رجال اعمال الحزب سيتم شحنهم في الاوتوبيسات ليذهبوا و يقولوا نعم

أرى انه كان من الافضل و الأجدر التوعيه و عمل حملة ضخمة للتوعية و توضيح التعديلات الدستورية و ما بها من مساوئ . و دعوه المواطين لرفض التعديلات و يروح يقول لأ

لو حدث ذلك لعاد علينا بفائدتين ... اولا كسر رهبه المواطن العادي من المشاركة السياسية و التوعية مما سيثير فضولة لمواضيع اخرى و الايجابيه.. و نتائجهم ستظهر في المستقبل .

او من الممكن الدعوه لإبطال الاصوات .. تروح تشخبط ولا تعلم على نعم ولا و يصبح الصوت باطل... منها ايجابية الى حد ما و مقاطعة في نفس الوقت

و تقريبا هذا ما سأفعله .. هروح ارسملهم وزه في بطاقة الاستفتاء:D

التعديلات ستمرر بالطول بالعرض ستمرر... يجب استغلال الموقف بطريقة افضل

موضوع مستفزني ... ازاي الاستفتاء يكون على الـ 34 ماده كتله واحده ... يعني يا توافق عليهم كلهم او ترفضهم كلهم ... اسلوب لا يوجد به اي مرونة ..يلا آال يعني دي تعديلات و دا استفتاء

المهم انا عن نفسي متذبذب ما بين المقاطعة و الرفض لكني اميل اكثر للرفض ... و الظاهر اني ساتوجه لأبطل صوتي

نهر الحقيقة .. اشرب يا معلم

2007-03-18T02:19:00.000-07:00

تحدثت في بوست سابق عن قناة النيل للأخبار ... و بعديها بفترة جرى لها ما جرى و تحولت للنيل "قناة مصر الاخبارية" .. لكن كل ما جرى لها تغيير فالشكل لا المضمون ... تغير استديوهات و تقنيات و ديكورات و جرافيكس ... و لكن ما فائده كل ما يتم صرفة من الملايين ..و الفكر ذاته لازال موجود ... لا شفافية و لا حيادية مع استمرار سياسة التعتيم ... لما قناة اخبار تخبي الاخبار تبقى ايه دي!

و في هذه الايام بمثابه موسم .. فالنظام يستخدمها كأداه لعرض و نشر و تلميع افكارة و رأيه الاوحد ... و الحمد لله انها لن تستطيع باي حال من الاحوال ان ترقى لقنوات اخباريه اخرى فتجذب مشاهد او تحقق نسب مشاهده عاليه ...

و لن يحدث ذلك ابدا طالما يد الدولة مسيطرة عليها و متخذه الطابع الحكومي و تحت الرقابة بطريقة مباشرة او غير مباشرة.

في هذه الايام و من خلال عرضها و مناقشاتها و تغطيتها لما يجري بخصوص التعديلات الدستورية .. تشعر و كأنها قناة الحزب الوطني ..و يقولك نهر الحقيقة .. و المطلوب مننا نشرب بئا

هو النيل ناقص لما تلفقوا قناه ملهاش لزمة باسمه

من الآخر التعديل يجب ان يكون في المضمون و ليس الشكل .. و مش تعديل بل تغيير كمان .. و كل ما حدث اهدار اموال بدون سبب

ثم فين عنصر الجذب اللي يشد اي مشاهد او يجذبني كي اترك آلاف القنوات و اذهب لاتابع هلاوس و تخاريف و نفاق و تدليس... ولا يمكن عشان خاطر عيون تامر بسيوني .. و على رأي بلال فضل دا مش مذيع .. دا امين شرطة

التطوير اللي بيحاولو جاهدين انهم يعملوه في اعلام الرياده -زي ما بيحبوا يطلقوا عليه- لا يناسب اعلام السودان الشقيق حتى -مع خالص التهاني لنادي الهلال السوداني الشقيق-..

دا لوجو القنوات غريب جدا و ملوش اي علاقة بالقناة .. لوجو القناتين الاولى و التانية تحس انه لوجو قناة رياضية متخصصه في السباقات . و ليست القناة الاولى المحلية للتليفزيون المصري

خسارة الملايين اللي بتوضع تحت تصرف عقول غبيه , متحجرة , موالسه .. و بتذهب هباء

الامن يتعاطى حبوب الشجاعة و يتصدى للمظاهره بغباء كالعادة

2007-03-15T12:30:00.000-07:00

لم ألحق بميعاد المظاهرة اليوم و عند وصولي لم اجد اي اثر لأي متظاهر.. لكني توقعت ما حدث مما رأيت
كميات الامن رهيبة و موزعه بحيث تمنع اي تجمعات في مناطق ظاهره جميع الحدائق و الارصفه مكردنة.. تعامل الشرطة مع المواطنين يوحي بالطريقة التي تعامل بها مع المتظاهرين .. فيبدوا انهم خدولهم حبايتين شجاعه و ان الموضوع مصيري بالنسبه لهم و حبو يظهرو مدى رجولتهم و التعليمات شديده المره دي
توجهت لميدان طلعت حرب .. فوجدت بقايا متظاهرين و من الواضح انهم من نجو من كلاب الداخلية و احتموا في مقرات احزاب الغد و التجمع و استكملوا من الشرفات يهتفون بصوت عالي ضد التعديلات الدستورية و مقترحها

و الامن بالاسفل يفعل كل ما بوسعه لتفريق المواطنين في الشارع ..لا انتظار ولا حتى تبص .. و لو سألت يتجاوب عليك بكلام فاضي

و يتضح من التعامل مع التظاهرات السلمية غباء الدولة و كذب كبيرهم و صغيرهم .. و ان اي كلام عن الحريات في هذا البلد سيظل كسابقه مجرد كلام

اين مبارك المنادي بالحرية .. اين منافقي الحزب الحاكم المطبلين وراءه من كلامهم عن حقوق الانسان ...
اي كلمة عن الحريات من فم اي حكومي في هذا البلد كذب كذب كذب و لا يمكن ان تصدق في يوم من الايام
و لا يستطيع اي فرد من افراد النظام ان يتحمل كلمة معارضة او رأي غير رأيه ..فهو غير مقبول تماما

...
لماذا يرتعد النظام من تظاهرة سلمية ..النظام لم يستطيع ان يستحمل مظاهره واحده و ارسل لها بجحافل الامن ..

سحقا لهذا النظام

انا لا استطيع ان اتخيل ان اثناء سيري في شوارع بلدي من يمنعني من استكمال طريقي ... انا دمي بيتحرق ..و يقولك دي التعليمات اللي عندي . تعليمات مين يا زباله ... قول لسيدك ان بكره هيتردم عليه تراب .. و مش بعيد كلب بلدي معفن معدي يصرف نفسه عليه

كل اللي بيحصل فينا دا بسبب السكوت و الخضوع اللي احنا فيه .. و ذنب الناس اللي تم اعتقالهم في رقبه كل واحد ساكت

سواء ساكت و على درايه بالامور .. او ساكت و ليس له علم بأي شيئ ... -زي اللي بيقول لزميلة ان المظاهرات دي عشان باعوا برج القاهرة :@

و لتعيش في مصر وسط المصريين.. يجب ان تنسى تماما كلمات مثل الحرية .ديموقراطية .حقوق انسان . احترام الآخر او ما شبه ... و ان تكون انسان منزوع الكرامة

قول لا للتعديلات الدستورية يوم الخميس القادم

2007-03-14T02:01:00.000-07:00

بمنتهى البساطة .. لما جهات كتير تقترح تعديل مواد من الدستور و لا يبالي احد و يعطيها اهتمام .. و عندما يقترح السيد الرئيس تقوم الدنيا و متقعدش ... و لما يدعي ان التعديلات نتيجة نقاش و حوار و ليست آراء من طرف واحد و مفيش اي حوار او نقاش دار... و لما يدعي تاني انه هيناقش التعديلات الدستورية المقترحة و اللي محدش يعرف حاجة عن صياغتها غيره

و لما يقترح احد بتعديل ماده معينة او صيغه معينة ولا كأنه بيتكلم و كلام الريس و الحزب الوطني هو اللي ماشي من اول لآخر الموضوع

و تجاهل تااااام لجميع الجهات و المطالب الشعبية مثل تعديل المادة 77 و صياغات مواد اخرى

يبقى لازم نقول لأ للتعيلات الدستورية

مش اعتراض من اجل الاعتراض .. لكن التعديلات الدستورية عرضت بنظام "هو دا اللي موجود"

مادام الدستور اللي بيحكم الدولة سيتم تعديله .. لازم ان يكون تعديل حقيقي ليس ترقيع ..تقضية واجب و خلاص و اهو كله تعديل

عيب جدا لما يكون 80 مليون مصري ليس لهم اي صوت.. و كلمة من شخص مسن هي اللي تمشي

بئا موريتانيا يرشح لانتخابات الرئاسة 19 مرشح ! و يتنافسوا في انتخابات حقيقية و نزيهه بجد و كمان جولة الاولى و جولة تانية ..مش يكسب بـ6 مليون صوت من اصل ملايين الاصوات الصامتة و كمان بالتزوير و خلاص على كدا

حد عندهم طلع الشعب كله بهايم و المرشحين دول خونة و مبيفهموش و الريس بس هو اللي يصلح لقيادة البلد لغاية ما يموت و محدش ينفع للبلد من بعده غير ابنه ؟حد غنى اخترناه اخترناه!

مع كامل احترامي للشعب الموريتاني المحترم جدا... بئا الموريتانيين بهذا القدر من الوعي و الخوف على بلدهم .. و احنا المصريين بهذا القدر من البلادة ..للدرجة دي ميهمناش مين يحكمنا ولا يعمل فينا ايه ولا ازاي !!

لازم يكون لينا وقفه مع تمرير التعديلات الدستورية بهذه الطريقة .. و اللي كل هدفها سهولة توريث الحكم

لازم كل المعترضين على تعديل الدستور بهذه الطريقة يقول رأية و يتكلم

في مظاهرة لحركة كفاية و لكل القوى الوطنية يوم الخميس 15/3/2007 بميدان التحرير الساعة 5 مساء

لو الكل شارك صوتنا هيكون مسموع .. هيكون لينا تأثير بدل ما الكل ساكت و اللي بيحصل بيحصل

فليتزندق تزندقا وليصير زنديقا مزندقا كزنديق الزناديق

2007-02-24T11:41:00.000-08:00

تصوير محمود البنهاوي من مدونة جار القمر

تحذير شديد اللهجة لجميع المدونين و كل من صدق و خد راحته او بحبح بالكلام شويتين .

أهه .. 4 سنين حبس عشان اتكلم . بغض النظر عن اتكلم قال ايه .. بس اهو يكون عبره و ضرب عصفورين بحجر واحد و منها انه اساء لدين فيتحاسب و بقى هو الكافر احسن ما تكون الحكومة هي اللي كافرة ... و سب الريس و يلا بالمره عشان يبقى ليها عقوبة ردع بعد ذلك..

بس كدا لو كل واحد شتم الريس يتسجن سنة ..البلد كلها هتعيش فالسجن .. بيتهيألي يتعمل سور حوالين مصر كإنجاز..

انا مش فاهم ريس ايه دا اللي يتحبس اللي يجب سيرته بحاجة وحشة .. ماهو طول ماهو في الحكم و كل حاجة وحشة موجوده .. ليه هو ميتحاسبش على اللي بيحصل لنا.

و صباح التناقد بين المناداه بالحرية و سجن من يعبر عن رأيه .. اكيد هيكون في اختلاف حول موضوع التعبير دا .. بس اكيد برده ان فيه معالجة للموضوع بطريقة افضل من الحبس

موضوع سجن كريم عامر-عبد الكريم نبيل سليمان- مثله مثل الحكم الصادر في قضية البهائية ... و انا ارى لا يوجد اي مشكلة باضافة خانه اخرى للديانة بالبطاقة .

و مش عارف ايه المشكله مع انها من وجهة نظري افضل بكثير من ان اللاديني يتحامى في الاسلام او المسيحية او اليهودية و يأخذ حقوقة كمسلم او مسيحي و يطبق عيه اشياء لا يعترف بها او تقيده احكام لا مانع عنده من اجتيازها و كله في صورة الدين .

الحكم في قضية البهائية و كريم كإشارة لتكوين اسراب من الزنادقه تعبث فالخفاء .. في الظاهر مؤمن و في الخفاء افعل ما شئت .. تزوج مسلمة .. احصل على مساعدات من كنيسة مثلا .. ادخل الازهر و قف على منبر و اخطب في المسلمين . تكلم عن الاسلام كما تشاء فانت مسلم مثلهم , حرف, أسئ ... كن زنديق .. و ما اسهلها

ماذا كان سيحدث لو تبرأ كريم مما كتب و شهد الشهادتين و صلى على النبي و اعلن خطأه و اسفه و ندمة و الله اعلم بما في قلبه بئا..الأمور كانت ستتغير 180 درجة و مش بعيد ان يصبح داعية بعد ذلك في احدى قنوات البيزنيس الدينية ...و المشكلة ساعتها ستكون في سب الريس .. فالله يقبل التوبة لكن حسني لا يقبلها

يوم الطالب العالمي

2007-02-21T08:34:00.000-08:00

لحظة فتح باب جامعة القاهرة في يوم الطالب العام الماضي

في ذكرى يوم الطاب العالمي- 21 فبراير- تتحسر على حال جيل بأكمله عندما تتذكر ما كانت الجامعه عليه من كام يوم - 14 تحديدا- حيث الفلانتين و الثورة الحمراء لكنها للحبيبه .. فلا توجد ادنى صله بينها و بين الاشتراكيين.

معنديش اي اعتراض طبعا على الاحتفل بعيد الحب لكن ما فرسني ان يكون يوم الطالب العالمي مهمل بهذه الدرجة و لا يعطية احد قدر من الاهتمام و لو مقدرا ضئيل من الاهتمام بالفلانتين

المهم.. اليوم لا يقارن بنفس اليوم من العام الماضي . يوم الطالب العالمي العام الماضي كان حكاية .. اخوان مع جهة بالمسيرات و اسكتشات و معارض .. والاشتراكيين و الناصريين و الغد من جهة اخرى قاموا بدور جيد جدا بالاضافه لعمل بطولي و تحدي الامن و كردنته و فتح الباب الرئيسي للجامعه رغم انف الأمن .. و حركة كفاية من خارج الجامعه .. و حركة 9 مارس .. يعني كان يوم ملحمه

للاسف اليوم - اللي هو النهارده- لم يكن على المستوى المطلوب لكن .. هه خير و بركة و احسن من مفيش ...اكيد الظروف اتغيرت .. حالة الترقب لاي فعل يصدر من حركة الاخوان جعلته ياخذ حذره و يحافظ على طلابه, فلم ارى احد منهم اليوم بأي نشاط ملحوظ .. كذلك حركة كفاية لم تتواجد .

فمن قام بالمشاركة الطلاب الاشتراكيين و بعض طلاب الغد .. ستجد اليوم باهت اذا قارنته بالعام الماضي ..

اكتفى الطلاب بمعرض من اللوحات و توزيع البيانات في كلية الحقوق و الآداب و التجارة ... و كالعاده بفضل خفه دم بعض الطلاب و بلاهة البعض ايضا ..كان من الضروري ان تقع على مسامعك جمل زي "دول بتوع اتحاد الطلبة" " دا عشان المسجد الاقصى " " هو انتو بئا بتوع ايمن نور !!" " ايه يوم الطالب دا .. آآه زي عيد الطفولة كدا !! " "الله .. هما مش هيشيلوا الاشتراكية من الدستور " نظام امال انتو بتعملوا ايه يعني هنا! او من يلقي برأيه ان مفيش احسن من الحزب الوطني ... و في كتر خيرهم كتير بيفرحوا الواحد بالاسئله المنطقيه او الدخول في نقاش و حوارات تحس من خلالها ان لسه في أمل . بس للأسف النسبة معكوسة .. الاغلبية ساكتة سلبيه كسلانة تجد في عيونهم لا مبالاه و كأن الأمر لا يعنيهم ..هو احنا بنطالب بحقوقنا اللي هي حقوقهم ولا بنطالب بحقوق ناس تانيه !مادام اتحاد الطلبة و اللائحة الطلابية و الفساد و سرقة حقوقهم و الفقر و البطالة والمرض و غلا الاسعار ميهمش .. أمال ايه اللي يهم

التقشف الإخواني

2007-02-12T18:03:00.000-08:00

مع اول يوم نزولي للجامعه النهاردة .. التمست حالة التقشف اللي فيها الاخوان.
الاقي الجداول اللي بيوزعوها اول كل تيرم بئت معمولة على ورق تصوير اخضر غريب كدا و الشعار بتاعه على ضهر الورقة معمول بالايد كدا ..زمان كان طباعة محترمة مرتبط بحملة و لوجو تلاقي الجامعة متغرقة بيها.. وبعد ما كانت يافطة الترحيب بتتعمل بتصميم و على خامات عالية ... الاقيها الترم دا قماش و معمولة عند خطاط ولا واحد فيهم اللي كاتبها.
اللهم لا شماتة يعني .. ربنا يكون في عونهم
لكن الضربة المرة دي جت في مقتل بعد تجميد اموال الـ29 قيادي في الجماعة .. اكيد منابع لتمويل نشاطات الجماعة
و اعتقد ان السبب في التصعيد دا.. او حجته , الحركة الغبية اللي قام بيها طلاب الاخوان في جامعة الازهر ..الاستعراض الرياضي او القتالي ولا الميليشيات الاخوانية زي ما يحبوا يقولو عليه .. محدش يقتنع ابدا انها حركة جت غلط من طلاب تصرفوا من تلقاء نفسهم... لا يمكن ان استعراض منظم زي دا يحدث بطريقة منظمة من اعضاء جماعة الاخوان المنظمة جدا و يقولو عمل غير مقصود ..لا كان مقصود و بهدف و من قيادات كبيرة .. بس مكانش ليها اي لزمة و لم تجلب لهم سوى الاعتقالات و التشهير بهم في كل الوسائل سواء الحكومية او خصومهم و تشويه السمعه و و.. اطرفها زي ان سفاح المعادي من جماعة الاخوان ... و الأطرف منه ان "جماعة الإخوان خطر على أمن مصر" .. بغض النظر عن هو فين أمن مصر دا اساسا !! يا ريت اللي قالها حد عدل اصلا
بس هل كل الاجراءات اللي بتتخذ ضد الجماعة وقياداتها و أفرادها هيؤدي لتصفيتها؟! ... اعتقد بعيد جدا .. مينفعش اصلا ان جماعة الاخوان تتلاشى او ميكونش ليها وجود.. بس اكيد هتتأثر تأثر شديد و دا اللي وضح و هيوضح اكتر من خلال نشاط الجماعة.

2007-01-23T13:51:00.000-08:00

زي دلوقتي كنت نايم ... زي قبل دلوقتي مكنتش قادر افتح عيني .. زي قبل قبل دلوقتي كنت سرحان ... زي قبل قبل قبل دلوقتي كانت فدماغي مئة فكرة و فكرة و عشرات الحاجات اللي عايز اعملها و الناس اللي اكلمها.

بس قاعد مفنجل دلوقتي و مفيش اي حاجة من دي ... فين راحت .. نسيت اقول ان زي دلوقتي امبارح او قبله.... بكون قاعد بذاكر لامتحان مادة ما.

كل سنة نفس الموقف كل ترم نفس الكلام قبل كل ماده نفس المشاهد .. انا مش عارف انا ايه الصراحة!.

و نبتدي من جديد في الشحن و رفع المعنويات و التحفز و الاستحلاف لكل ما هو قادم ... و شكلها هترسي زي السنين اللي قبلها بردو ...

يا ريت حد يبقى يفكرني من اول الترم الجاي

يا اهلا بالحزب و اللي جايبين الحزب و ***** الحزب و ابن رئيس الحزب

2007-01-06T06:37:00.000-08:00

من المثير للدهشة ان يجتمع الجهل مع الحكمة فبدلا من ان تسعى الى ان تكون مع مصر وتعبربها الى المستقبل ,نراك انت و امثالك تغوصون بها فى عقليات الماضى
رسالة ارسلها لي واحد غير محترم اسمه- احـمـد قـرة - عنوان الرسالة سب و استهزاء و مضمونها اعلاه.. لا اعلم تحديدا قالها على اي اساس او ردا على اي موضوع
لكن من الواضح انه رد فعل لآخر موضوعين في المدونه التي وصل لها عن طريق ردي في مدونه جمال مبارك الوهمي التي اعتقد انه من قام بإنشائها..

ان الاستاذ احمد قلة .. احم -عفوا .. اقصد احمد قرة ..مدير مركز المصداقية للشفافية السياسية .. من اشد المؤيدين لتوريث الحكم لجمال مبارك لدرجة انه قام بتأسيس مركز المصداقية للشفافية السياسية و عمل بلوج كله تأييد في تائيد للرئيس الصغير
.و اعتقد انه على الارجح من قام بعمل بلوج جمال مبارك المثير للجدل .

من المؤكد ان هناك سر ما لتلك الحمله ....على اي حال .. فالرجل استعرض خبراته في مجال السياحة و العمل التطوعي ليوحي لك انه شخصية محترمة و كدا ... و الله اعلم
و لكن رائحة المنفعه تفوح من الموضوع ... موالسه مدفوعه الاجر ..مقابل لعرض الاكاذيب و الفكر مسموم..و تجميل للصورة ..
ثم من هذا الجمال لذي تجمع التأييد له و لماذا ؟!
ربما يعود ذلك عليك بمنفعه تخفى عنا .فهنيئا لك بتلك المنفعه

فبما انك تابع لهم كالذيل ... فمن المؤكد انك تعلم مدى ارتباط الذيل بالمؤخرة ...
فهنيئا بما تخلفه لك من فضلات.. ارى انك مستمع بها
لو لم يكن الامر كذلك ...فما ارتباط مركز المصداقية هذا بجمال مبارك و بالعبور للمستقبل الكلمة التي تكررت عشرات المرات في كلامك .ما يعبر للمستقبل و هو كان حد ماسكه !

و انا بتجول في مستنقع النفاق بتاعك وجدت ذلك
V
"نظرا لكثرة الرسائل الالكترونية الراغبة فى التوقيع على مبادرة التاييد للسيد جمال مبارك فقداضفنا العناوبن الاتية التى يمكن التوقيع من خلالها"
مسخرة اوي الموضوع دا ..فلم اجد سوى توقيعك... ارجوا ان تتأكد من محتوى الرسائل و ان تستطيع ان تفرق بين السباب و التأييد و المدح و الذم.. يا قله

عك و تدليس و نفاق و يقولك اصلاح

2007-01-05T06:59:00.000-08:00

اللذين عميت ابصارهم و صمت آذنهم و خرست ألسنتهم ..ثم عادت لهم جميع الحواس عندما ملس عليهم الرئيس ببعض الكلمات فهبوا يطبلون و يزمرون و يتراقصون بهذه الكلمات لان الرجل كتر خيره تولى امرهم و فكر و اقترح و ألف و ناقش و وافق و قرر و سينفذ كل ما كانوا يحلمون به.
عندما قدم الرئيس مبارك رؤيته للتعديلات الدستورية تلقفتها الحكومة والاعلام و مجلس شعب و خلافه .. بالاحضان و القبلات ثم بثت سريعا في الابواق الحكومية المختلفه لتلميعها و وضعها بفتارين مزينة لعرضها على الناس ..-موسم انس الفقي-
الرئيس وحده هو الذي يُؤخذ بكلامة و بمقترحاته فلا يُلتفت لكونه رجل تعدى الحاجة و السبعين من عمره
لا تنظر و لا تسمع ولا تلتفت ايضا لأي مبادره حزب سياسي -غير الوطني- او اي من منظمات المجتمع المدني في تقديم اقتراحاتها منذ زمن بعيد لتعديل فقرات و مواد من الدستور ... فهم ولاد *** ولا بيفهموا حاجة... و الريس مش ابن *** و بيفهم .
و كما رأيت .. مشروع تعديل اللائحه الطلابيه ... وجدت ان هناك العديد من مشاريع تعديل اللائحة الطلابية و مقترحات مختلفه ابتداءً من اعضاء هيئة التدريس و منظمات المجتمع المدني و بعض الطلاب انفسهم ... فلا احد يلتفت لهذا الكلام الفارغ .. لكن انظر عندما يقوم احد من الحزب الوطني او الريس نفسه او نجله بطرح الفكره و ما يلاقيها من تهليل و تطبيل و كأنه فاتح مغوار..و فكر فيما لم يفكر فيه احد
و لكن , على اي اساس ضربت في نافوخ سيادته فكره التعديلات ... لا تقنعني انه جلس يفكر و يفكر و يعصر في دماغة ليقفز قائلا وجدتها انا هعدل الدستور و فضل سهران يفكر في كيفيه و صيغ التعديلات ! لن ابحث ايضا هل املاه عليه احد ام هو من افتكاسته ..و سواء هذا او ذاك فالتعديلات من وجهه نظر واحده فقط .. وجهه نظر الرئيس و حزبة و نجله و التي تصب في مصلحة رجال الحزب -ان وجد- و مصلحه نجله و مجموعه تريد فرض رأيها و السيطره على مجريات الامور.
ما ينقطني و يحرق دمي جمل تردد سواء من اتباع الحزب الوطني او الاعلام -التابع للحزب- او المستكينين.. مثل : المعارضة بتتبطر على النعمة , هما كانوا طايلين حاجة , مش يحمدوا ربنا
و كأن ولي النعم ورب العباد اشفق على عباده و انزل عليهم تشريع جديد لييسر عليهم حياتهم ... و من يرى ذلك فهو انسان جبان منافق .. فهذا الدستور كان لابد ان يعدل سواء في عصر هذا الرجل او في غيره ... و لكن بما ان الفرصة سنحت للتعديل ... فليكن تعديل و ليس تهريج و ترقيع لان هذا دستور دولة و له احترامه و ليس مجلد ميكي ولا كتاب نصوص للصف الثالث الاعدادي.
تعديل الدستور حق قديم.. و ليس للرئيس جميل علينا و تكرم منه لتقديم فكره تعديل مواده ... و انما يأخذ عليه ان يظل كل هذا -25عام- دون تفكير في تعديله او الأاخذ بالرأي الآخر

موضوع الاستفتاء لا احد يعلم هل سيتم الاستفتاء على الـ34 ماده حته واحده ام كل ماده على حدة ؟! و هل كل ماده لها عدة صيغ يتم الاختيار من بينهم .. ام صيغة واحده و الاختيار بـ نعم او لا ؟!
طبعا انا افضل وجود اختيارات متعدده لكل ماده ..و لو ان لا ينفع اي استفتاء في ذلك الوقت.
فكيف تقول استفتاء و ديموقراطية في ظل قانون الطوارئ و اعتقالات و ارهاب و تزوير و تدليس و كشوف ناخبين من ايام المماليك و حالة نفور المواطنين من المشاركة السياسية... كيف تطلب من المواطن الصالح الذي تريد فعلا ان تعرف رأيه بان ينزل للادلاء بصوته و هو يعلم انه ستهان كرامته إما بالبلطجة او التزوير ... كيف تطلب من فرد تمارس الدولة قمعها عليه طيلة الـ25 سنه ان يصبح مواطن حر مره واحده و هو يرى بعينه التنكيل و التعذيب و التزوير و البلطجة و التلفيق.
كيف لنظام فاسد لعشرات السنين يصبح مره واحده يحارب الفساد خلال كام شهر .. هل عندما يدعي مجرم انه يحارب الاجرام و يستنكر ما اقترفه من جرائم خلال سنوات ينصب زعيم للصالحين !
لابد من ازاحه هذا النظام كله بتزويرة و تلفيقه و كذبه و تنكيله و فساده و محسوبيته و رشوته و و و و

بالروح بالدم نفديكي يا سعاد .. لولولولولوللييي

2006-12-26T08:45:00.000-08:00

دخل صاحبنا القهوه و قعد يدندن و يتغنى ...
" يا حضرة العمدة ابنك عليوه حدفني بالسفنديه ...
إهييي << العمده

وقعت على صدري ضحكوا عليا صحابه اللافنديه ....

إهيييي << العمده بردو

يرضيك يا عمده

لا لا لا لا لع << العمده

عشان ابن عمده

لا لا لا لا لع << نفس العمده

يعمل كده كده كدا فيا

" *السفنديه للي مش عارف هي اليوستفنديايه .. مفرد يوسفى ..ابن عم البرتئان -البرتقال يعني- المهم ..

ميل صاحبنا على اللي جنبه و قال : اصل انت مش فاهم ... الواد عليوه كان معدي هو و اصحابه الافندية و شكلة كان ماسك يوستفنديايه فـ ايده و حدفها على البت - زليخة غالبا- فجت في صدرها .. و زمايله ضحكوا فؤحرجت و كدا.

قامت رايحة الدوار تشتكيه لابا العمده .. و قعدت تحكيله و تشهده و هو مخلصوش و قعد يرد بـ إهيييي إمتعاضا لما وقع على اذنه من كلمات ... و لا لا لا لا لع كإستنكار لما وقع على صدرها من يوستفندي ..زي ما سمعت كدا

اتعدل صاحبنا زي ما كان ...

و قعد يدندن تاني : يا حضرة الريس ابنك جمال خد مني الصفقة ديه

يا حالوليي << الريس ;)

مال على اللي جنب تاني ليخبره انها مش لايقه ... فلم يجده ! ..

انت جريت ...

يلا و قعد يكلم في نفسه ... ماهو لما كان ابن العمده ضحكت ولما بئا ابن الريس جريت ...

طيب ما ابن العمده هيطلع ايه يعني ... ماهو عمده بردو بس صغير ..

و ابن الريس ريس صغير و حفيد ابن الريس ابن الريس الصغير ... يعني ريس بردو.

و اهو كام سنه و الواد عليوه يبقى عمده ...و يجيب البت زليخة و يقعد يزئلها -يحدفها- باليوستفندي براحته .. عمده بئا

و كام سنه كمان و جمال يبقى الريس و يعمل فينا اللي هو عايزه.

يميل على شخص آخر ... انت تعرف طول ماحنا مخرسين كدا ممكن نفضل كدا لأبد الأبدين ...

و يمسكنا جمال و بعديه ابنه جميل و بعديه عبد الحميد

اهو عبد الحميد دا بئا ان شاء الله خلفته كلها هتبئا بنات ... بس بردو ... هنفضل خرفان زي ماحنا و انت فكرك هنتعدل ابدا

و تمسكنا بئا بنته الكبيره سعاد ... تبقى السيده الريسة سعاد مبارك رئيسة جمهورية مصر العربية. الله يرحمك يا رجولة

و يا فرحتهم و هناهم بتوع المرأه و حقوقها و المساواه ... و حركات نينا سوزان -مع مرور الزمن و كدا- يالهوي داحنا هنتظبط ساعتها .. هيطلع علينا كل الجديد و القديم.

تطلع بئا المظاهرات النسائية هاتك يا زغاريط و رقص بئا..و بالروح بالدم نفديكي يا سعاد

و تحول مصر لدولة عنصرية تمارس التميز ضد الرجال .... الستات تسيطر على كل حاجة في البلد ... و تلاقي الاضطهاد فـ الشغل و المصالح و كل حته

يبقى الراجل مننا ميعرفش ينزل من بيته بعد الساعة 9 ... تلاقي الراجل من دول بئا ماشي فالشارع مقلق على نفسه و الستات ماشيين ذئاب بشرية .. عمالين يبصولو بصات غير بريئة

و التحرشات تشتغل بئا ... و كل عيد يظبطوا الرجاله في وسط البلد و هيصة

انا عن نفسي هقعد فالبيت ... مش طالبه وجع دماغ اللي عايزة تتحرش انا فالبيت مش طالبة لخمه فالشوارع

الواحد منا يا عيني يسمع صوت بدال عجله يستخبى فاي شارع جانبي لحسن تكون سيقاها ست ولا حاجة

و يجي حبه بولجر يعملوا حركة الشارع لنا مطالبين بحقوق الرجل و المساواه مع المرأه

ولا البوليس... موجود ولا مش موجود ولا هاممهم .. ماهم في حماية سعاد مبارك و سهى العادلي -وزيرة الداخلية-

و الظابطاية من دول يعذبوا الناس بئا فاقسام الشرطة ... كلاكيع بئا بعيد عنك و هتطلع
و احنا غلابة منكسرين مش لاقين اللي ياخدلنا حقنا !
و الراجل يكون حشم و لابس واسع و كل حاجة و برده ميعتقهوش يا جدع...
قله حيا
احم
دا لسه بئا المطربين الستات ... يطلعوا وراهم موديلز رجاله .
دا اذا كان دلوقتي و اضعاف اضعافنا و مشاركنا فكل حاجة و واخدين حقهم تالت و متلت ... امال فعصر سعاد مبارك هيبقو اد ايه

كل ده بسبب السفنديه
لا يا عم انا مش هاكل استفاندي تاني ..

دا حتى بيعمل اسهال... سمعليكوو

هو كان قائد .. انا مال اهلي!

2006-12-24T16:53:00.000-08:00

اسامة ابن زيد اسامة ابن زيد .. كل واحد فاكر انه كدا هيحمسك يقولك اسامة ابن زيد و كان قائد جيوش المسلمين و هو 18 سنه ..طيب وانا ايه دخلي بالموضوع دا؟! كان بياخد معايا درس و هو طلع قائد وانا دخلت كلية تجارة!

طيب و هو 18 كان قائد .. يا ترا و هو عنده 16 سنه كان ادبي ولا علمي ؟

مفيش وجه مقارنة خالص .. اسامة دا اتسحل فابتدائي و اعدادي و اتعصر فالثانوية العامة و جاب مجموع مش اد كدا و حول ادبي في تالتة .. و رسيت على كلية تجارة فالآخر .. كان مضطر يدرس في كلية هو ملوش اي علاقه بيها غير عشان اخد بكالريوس و اهي شهاده عالية تقدم عند الطلب... لزوم رضا المجتمع عنك .. و لما خلص اسامة الكلية شوف بعد كام سنه .. كان الجيش مستنيه . و لبس ظابط فـ3 سنين ولا عسكري

بعد ما خلص دا كله عمل ايه عشان يلاقي شغل .. كان يقدر يتجوز من غير ما يعدي على كل النقط العقيمة اللي فاتت دي؟!! لقى شغل اسامة .. اتقدم لواحده طلبوا منه ايه يا ترا

اعتقد لو اسامه ابن زيد كان في نفس زمنا و نفس مجتمعنا الغبي المتخلف بكلاكيعة و عقده ومشاكلة و نظرتة المتدنيه للشباب على انهم مجرد ناس عايشة لمتابعة الكليبات و الهيافه و اللي هما اصلا اللي خلوه يبئا كده رغم ان مش كله كدا..ابئا قابلني لو كان عرف يطلع ســبــاك ... مع كامل احترامي للاخوه السباكين

تك تك تك تك

2006-12-21T03:29:00.000-08:00

تستطيع تمييز بعض الأصوات ليلا بعيدا عن صخب النهار .. تجد اشياء لا تلتفت لوجودها نهارا هي ونيسك طوال الليل بسكونة و صمتة.

تك تك تك تك صوت بندول الساعة .. تستطيع سماعة و كأنه ضربات مطرقة ليلا .. يكاد يكون الصوت الوحيد معك هو وصوت الاوراق وانت تقلب صفحة ما .. لكن الـ تك تك تك تك تشعرك بقيمة الوقت الذي يمر بسهولة كحبات الرمل الناعمة بين اصابع يدك.

تخيل الـ تك دي و انت تعاصرها ... فكانت حاضر و اصبحت ماضي في نفس الوقت . كل تك تأتي تجعل من سبقها ماضي لا يرجع .. ليتهم يعودوا .. ليتها تنتظر حتى ادرك.

تمر و تمر حتى يأتي صخب النهار من جديد ... تمر علينا 172800 تك ..فالـ تك الواحده نص ثانية.

يمروا جميعا سريعا و يلقي بي الزمن في يوم تالي.. لأجد نفسي في نفس اللحظة و لكن في يوم آخر .. و جميع التكات اصبحت في الماضي .. تكوٌن ساعات و تلقي بها فالماضي و تكوٌن منها الايام و ترميها فالماضي ...و السنين و العمركله حتى اكون انا نفسي في الماضي

الامتحانات عامله شغل :D.

هل اصبح الدين لحية و نقاب !

2006-12-16T07:01:00.000-08:00

واحد زميلي اطلق لحيته .. و دا فتح باب النقاش عن اللحية و النقاب و كدا .. و كان النقاش ماشي زي الفل لغاية ما واحد طلع مره واحده كدا و اعلن ان إطلاق اللحية فرض و النقاب كمان فرض ... و طبعا لازم الالتزام بالزي كله .. جلبيه بيضا و قصيرة بئا و الكلام دا ... و بالمرة نلبس خف و احنا مسافرين!! يا جدعان ارحمونا بئا ..

زي مرة وانا في الثانوية العامة بعض الناس العجيبة اللي كانوا معانا في الفصل وزع ورق يحتوي كلام عجيب من قبيل اللي ثوبة يلامس كعبة ملعون و فالنار و ان حلق اللحية ذنب عظيم و تشبه بالنساء ! - هي النساء بتحلق دقنها- و التاني يقولي ما اه صح ! يعني حد يخش النار عشان رجل البنطلون بتلامس كعب الكوتشي!

و افتكرت واحد زميلي عادي مش متدين و كدا و هو بينصح واحد زميلي تاني على تسريحة شعره عشان حرام و اللي كان بيعملها زمان كانو بيقيموا عليه الحد و تقطع اطراف اصابعة :$ .. مش عارف الكلام دا صح ولا لأ

و بعدين معظم الأمور دي كانت لها حجج و بحكم المجتمع ساعتها.

بس سيبك انت يطلق ولا ميطلقش لحيتة ... اللي يفرس ان لما يطلق لحيته ميعتبرش نفسه ولي من اولياء الله و يعطي لنفسه الحق في محاسبة الآخرين .

و دا اللي مدينا صورة الارهابيين .. ما فيه في الديانات التانية ناس مربية دقنها و محجبين كمان ... مانت عندك في المسيحية البابا بتاعهم مربي دقنة و الراهبات بيكونو مغطيين شعرهم و الحاخامات في اليهودية ليهم زيهم و مربيين دقنهم بردو ... طيب ليه متقالش عليهم ارهابيين !! دا اللوجو بتاع الارهابي بئا واحد مربي دقنة ,لابس جلباب ابيض و قصير ... جايز الاعلام هو اللي صور كدا سواء المحلي او العالمي و هما جابو الصورة دي منين! اكيد من اللي الفزالكة-اللي بيتفزلكوا يعني- و المنافقين .هما اللي شوهو صورة الاسلام و جعلوا منه الارهاب و التخلف.

طبعا مع كامل الاحترام و الحرية المطلقه لاي ملتحي سواء كان مربيها عشان شكله ببيها حلو ولا سنه عن الرسول صلى الله عليه و سلم ولا حتى عشان يبان انه تقي و راجل بتاع ربنا ... و المنتقبات سواء اللي بتستسهله ولا اللي بتختفي وراه او اللي لبساه احتشام بجد ...

و النقاب دا موضوع لوحده بعد ما بتشوف مناظر المنقبات و العمايل اللي بيعملوها .. طبعا مش كلهم .. بس الغالبية منهم شوهوا صوره المنقبات.

و دا طبعا لان الغالبيه بيستسهل و يلجأ للتدين المظهري و متعرفش من جواه عامل ازاي .. و اهو نفاق زي ما المجتمع كله ما بينافق فبعضة ...

اعتقد ان سواء لحية ولا حجاب ولا نقاب ولا بندانا حتى لازم يكون نابع من داخل الفرد عشان يكون ملتزم بيه صح .. مش موضوع يتفرض و خلاص و المظاهر بتتاخد ستار لبلاوي تانية ... فلا يمكن ان يختصر الدين في لحية و ثوب .

مفيش حاجة

2006-12-03T06:56:00.000-08:00

إضافة

" افادتنا هدى ان الست دي شاعرة عامية اسمها ايمان البكري .. و بنشكر هدى كتير اوي "

==================================================

جامدة جدا جدا .. للاسف اول مرة اشوفها و معرفش عنها حاجة
كل اللي واضح انها شاعرة عامية و انها حاجة جت في قناة النيل الثقافية .. شبه اشعار احمد فؤاد نجم
يا ريت لو اي واحد معدي من هنا عنده اي معلومات يقول

مفيش حاجة

مانيش عايز خلاص حاجة ولا محتاج انا لحاجة ولو عايز صحيح حاجة مخليتوليش ولا حاجة

عموماً بصوا فيه حاجة ...... هقولها بس محتاج لعقول تفهم..

ولو حاجة مهيش مفهومة او حاجة ....نفسرها بكام حاجة ..

نوضحها بكام حاجة وأهى حاجة مع حاجة هتظهر وتبان لنا حاجة

وانا ما بخفش من حاجة مانيش مسنودولا حاجة

لكن ما بخفش من حاجة لكن فرضاً لو هقول حاجة هيحصل إيه ... ولا حاجة

هيعملوا إية.... ولا حاجة ولو بعد الشر .. بعد الشر لو واحد من القاعدين من السامعين من الضالين فِهِم حاجة هَيعملوا إيه ؟؟؟؟

اكيد برضُه ولا حاجة ....فنتوكل على الستار لوجه الله نقول حاجة فيه

ناس بتعيش علشان حاجة وناس بتموت علشان حاجة وناس بتموت على الحاجة

وناس تديلك الحاجه وهى ليها محتاجه وناس تديلك الحاجه و تاخد قصادها ميت حاجه

وناس تكبر تكون حاجه و ناس تصغر علشان حاجه

وناس منظر ومش حاجة وتلقاه كبير حرس ونفير عليه منظر... وهو جبان وشيخ منصر ولا يبـنش عليه حاجة

كلامى يا خلق فيه حاجة ... لحد دلوقتى فيه حاجه؟ كلام عادى وبسيط جداً .. ولا فِهشِ ولا حاجة

ما انا ما أقدرش أقول حاجه صحيح نفسى أقول حاجه وميت حاجه لكن مش قادر اقول حاجة

لأنى لو هقول حاجه ..هييجى ناس بتوع حاجه وياخدونى ورا الحاجة وهو لو سمع حاجه هيعملوهالى ميت حاجه

عموما ... بصو لو حد من القاعدين عايزنى أبلغه بحاجة يقول مايخفش من حاجة

نعم ...... فيه إيه؟ ...لالالالالأ مافيش سرقه ولا تهليب ولا تهريب ولا حاجة

وبتقول إيه...مصمصوا إيه.... وخصخصوا إيه....ده كله كلام مفيش حاجه ... قضية إيه ... ياشيخ روح خلاص مافيش حاجه

حرامى إيه ... ولَكّح إيه ... وهرّب إيه؟ شــفـافـيـه مافيش حاجة

وبتقول إيه ... لالالآلأ عـــيب لافيه تدليس ولاترقيص ولا تدبيس ولا حاجه

سمع مع هووووس انا حاسس انه فيه حاجة دقيقة سكات لَتبقى حداد انا حاسس انه فيه حاجه

زمنكوا ياخلق فيه حاجه ولازموا كام وميت حاجه ده لو يعنى إذا كان فيه حاجة انا عن نفسى مش حاسس ولا بحاجة ولا متضايق ولا حاجة

سعادتك برضه مش زَيـىِ مافيش حاجة ؟ ..... أهـه بيقول مافيش حاجة جنابك برضه مش زَيـىِ وعلشان زَيـىِ مافيش حاجة .. أهـه بيضحك بيقول مافيش حاجة

ما أنا قولتلكو من الأول مافيش حاجة عليا النعمه يا اخوانّا مافيه حاجة ورحمة ابويا ويّا أبوك على إللّى جابوك ما فيه حاجه

وعهد الله . وعهد الله. وعهد الله ما خللولنا ولا حاجه

بقولك إيه خـــلاص خلّص وفركش يا اخوانا

صباح الكئابة

2006-11-29T14:12:00.000-08:00

زهقان فحت ...

عامل ميكس من جميع الأحاسيس و المشاعير الفقيعة من خنقة و قرف و زهق و ملل و كئابة و احباط و كل حاجة رخمة و حاسس بيهم كلهم على بعضهم فنفس ذات اللحظة.

تسألني و تقولي و دا من ايه يابني و خانق على نفسك كدا ليه ؟... اقولك معرفش ! بس هو اكيد بسبب حاجة .. انما ايه مش عارف.

لأ أعرف .. يمكن عشان مش حاجة واحده مش عارف احدد ايه اللي مضايقني بالظبط .. او اوزع كل حاجة على احساس من الي عندي.

مثلا الامتحانات قربت اهي دي تجيب كئابة لوحدها... بقعد 4 - 5 ساعات و اطلع بصافي مذاكرة 3 دقائق .. خد عندك احباط و ملل ...اليوم مفيهوش جديد زي اللي قابله مع اختلافات بسيطة .. زهق اهه.

خناقات فالبيت او الكلية ... و الخناقات بتخنق وبتجيب خنقة طبعا .. و القرف اي حاجة تجيبه بئا ما العيشة نفسها تقرف ... من اكتر الحاجات اللي تفقع و تخلي الواحد مش عايز يعرف حد لما يكون بيقدر ناس و يعزهم و ليهم مكانة مش زي اي حد عنده ... و تطلع مواقف كدا تبين انه بالنسبة ليهم عادي او عالاقل مش زي اللي كان فدماغة او زي ما بيعاملهم ... مش عارف دا يمكن عيب فيا انه لما اكن لحد شعور معين و اقدرة و كدا ممكن اشيل منه لو حسيت انه مش مديني المكانة اللي انا حاطة فيها ... مش عارف دا بئا دماغ صغيرة ولا حساسية زيادة ولا انانيه المهم اني بتضايق .. و المشكلة ان ممكن يكون في حد بيعزك مووت و تفضل عليه واحد من الناس اللي مش بيقدروك زي ما بتقدرهم!

و المشكلة الاكبر و اللي بتحز فنفسويتي اوي ... لما حد يكون بيحبك و بيموت عليك و انت مش عارف تعمله ايه !مع اني و الله من جوايا بكون نفسي اعمله اي حاجة تسعده .. بس بتحس انك مقصر من نحيته ... اهو بئا.

كل اللي فات دا بيخلي الواحد مش عايز يعرف حد ... يعيش كدا مع نفسه لا يتضايق من حد ولا يتضايق على حد ولا بسبب اي حد ..

و اي حد جهه فالكلام ذكر او انثى.. كل حد فيهم و ليه مواقفه

اديني مسافر اسكندرية لمهام عائلية يمكن افك شوية ولا حاجة

يلا اهي دنيا و مسيرنا نخلص منها باللي فيها.

ظيطة الحجاب و مزايدة الوطني ع الاخوان

2006-11-24T10:10:00.000-08:00

انا شايف من وجهه نظري يعني .. ان الضجة اللي اثيرت حول تصريح فاروق حسني عن الحجاب .. ماهي الا ظيطة ..

كل واحد ما صدق انه يزايد فيها و اتخذوا من الوزير كبش فداء امام الرأي العام.. اهم يضاربو فالدين شوية عشان يبقوا ناس بتوع ربنا مش الاخوان لوحدهم يعني و بعدين ما الراجل قدم استقالته قبل كدا .. لكن و بما ان محدش عندنا بيخرج اصلا عشان يخرج بمزاجه فلازم العقد و الكلاكيع تطلع عليه ..يعني زي ما جابه ..هو برده اللي يمشيه .. و بالطبع ميقدرش حد يقف جنبه في موضوع زي دا و إلا وضع نفسه امام عجلات الاخوان و بالتالي سخط الرأي العام.

و المواضيع اللي الدين جانب فيها بتكون من الحاجات اللي الحكومة و الحزب الوطني يحبها اوي و ما بيصدق يشبط فيها الايام دي بالذات.. ليؤكدوا مدى تمسكه بالدين و انهم ناس بتخاف ربنا ... طيب ياخوانا ياللي كلمة الوزير عن الحجاب حرقاهم اوي .. مايشوفو حرم رئيس البلد ...ولا يشوفو تليفزيون البلد نفسه و اللي فتليفزيون البلد و شوارع البلد ... ليه مذيعتين القناه الخامسة معرفوش يشتغلوا بعد ما تحجبوا الا بحكم قضائي من المحكمة ؟!!! مش كدا اللي منعهم بيحاب الحجاب برده ؟! ولا ساعتها مكانش فيه اخوان عشان كله يزايد !!

شوية كمان و هتلاقي الريس طلعتله زبيبه صلاه في قورتة .. ماهو لسه كان بيقولك انه .. لا ينحني الا لله ...-طبعا لمشاكل فالغضروف مش اكثر بحكم السن و كده- ... سيبك من اللي بيحصل لرضاء امريكا و اسرائيل دا مش انحناء دا حاجة شبيهه بالانحناء و اسمه حاجة تانيه .و أهو منه تحذير للمعارضة انه -لامؤاخذه- مبيوطيش لاي ضغوط و منه انك تعرف ان الراجل يعرف ربنا و بيخاف منه و بينحنيله .. هو و الحكومة و الحزب كذلك و محدش احسن من حد و كلنا مسلمين يا معلم و كمان يرفض طلب باصدار قرار جمهوري بمنع النقاب ..و اهو كله بيصب في صالحة.

الدين ليه فعل السحر عند الشعوب البسيطة مثل التي تنتمي لهذا البلد ... عندك مثلا علاء مبارك و كل ما حوله من اقاويل ... هب يختفي و ينتشر بين الناس انه استقام و اطلق لحيته ... و عليه.. فامريكا خايفه ليوصل للحكم ولا حاجة فميظهرش للجماهيرعشان ميكونش ليه شعبيه ... و شوف رد فعل كل واحد بعد ما يسمع اشاعة زي دي .. يمكن تلاقي 80% يظهر تعاطفه معاه و يتحول السخط اللي كان نتيجة ما يسمعه عنه من سلوك سئ الى تعاطف و حب و تأييد ...

زي ما السادات عمل شخصية الرئيس المؤمن .. و اهو ياخد شعبيه و الاسلاميين في صفه و يسيبهم يتعاملوا مع قوى اليسار ساعتها. ماهو تربيته صحيح.

و سيظل الدين رايه يلوح بها كل من يريد ان تسير وراءه الشعوب

لأ و يجي زكريا عزمي يقول أن السيدات والفتيات اللائي شاركن في حملة الرئيس مبارك الانتخابية كن من المحجبات وكمان كمال الشاذلي اشار أن زوجته وبناته يرتدين الحجاب .. يا سلام و هم من اهل البيت يعني ... طيب يا اخي اضرب المثل بحد عِدل.

2006-11-10T09:50:00.000-08:00

من كام يوم اثناء عبوري من امام التليفزيون .. لفت نظري احتفال قناة الجزيرة بالسنة العاشرة ليها .. فقعدت اتفرج و انشكحت جدا من منظر المذيعين و هما متجمعين مع بعض بمحاورة احمد منصور و هم يدعبسون في حلقات برامج و نشرات و مواجيز الاخبار بتوع السنوات العشر و ما بها من مواقف لذيذة .. و ما زادني انشكاحا و فخرا بهذه المؤسسة العظيمة حقا .. حاجة زي فيلم تسجيلي كدا عن مواقفها و مواقف الغير تجاهها اثناء حرب افغانستان و العراق و احداث 11 سبتمر و غير ذلك ... و ما حدث لمراسليها و مكاتبها و اتهام جميع اطراف اي مشكلة -من ضارب و مضروب- بالعماله و الخيانة و عدم الحيادية بانحيازها للطرف الآخر و طبعا دعم الارهاب .. فعندما تجد الصحاف و رامسفيلد كلاهما يتهمها بالانحياز للطرف الآخر .. هذا ما جعلني افكر في تصريحات بعض المعارضين مثل " الجزيرة باعتنا او متوصي عليها .. وان مش عارف مين راح فين للاتفاق على تهدئه الموقف" ان هذا الكلام غير صحيح .. لانها فعلا حيادية و تهتم بجديه الخبر و ثقله .فعلا مؤسسة عظيمة افخر بانها عربية فهي شئ شاذ خرج فشذ عن شذوذ كل ما حولنا من اشياء شاذه فالوطن العربي.
و في حديث لاحد إداريها عن مواقف قناة الجزيرة و ردود الافعال الخارجية نتيجة لما تذيعة ..ذكر الدول التي تنتقدها و مثيلاتها من الدول العربية مثل السعودية و مصر ... بس ذكر كلمة مصر .. و هو ما جعلني افكر و وصلت بالفكر بدرجة من الحقد تقريبا .. فلماذا قطر تمتلك قناة بهذا الحجم و مصر صاحبة الريادة الاعلامية ( و خليها في سرك) لا تمتلك سوى يادوبك قناة النيل للاخبار ..

قناة النيل للأخبار .. القناة التي لا يشاهدها سوى اقارب و اصدقاء المذيعين .. و بعض معارف العاملين بها في حاله انتظارهم مرور اسم من يعرفوه بالتتر الاولاني او الاخراني .
طبعا مع كامل احترامي لجميع العاملين بقناة النيل للاخبار ... العيب مش فيهم طبعا .. و الدليل تألقهم لما بيهاجروا لأي القنوات الاخبارية المحترمة زي الجزيرة و العربية و الحرة و قنوات اخرى .
و بما اننا نمتلك كوادر ممتازة و قدرات عالية و افضل الامكانيات الاعلامية من اماكن تدريس و استاذة معلمين و استديوهات و اقمار صناعية ... ما السبب اذا ؟؟ ما السبب ايها المنادون بالريادة الاعلامية .
دانت متلقيش قناة فضائية عربية متألقه تخلى من مذيع او معد او مخرج مصري او كلهم مع بعض ... بئا امارة تقدر تجمع الاعلاميين من الوطن العربي لتخرج علينا بقناة بحجم قناة الجزيرة و مصر اللي بيقولك صاحبة الاعلام الرائد عندها النيل للاخبار !! ***

حاجات تفرس

2006-10-31T16:31:00.000-08:00

في اللقاء الذي جمع بين النادي الاهلي المصري و الصفاقسي التونسي باستاد القاهرة ... فرسني حاجات كتيره غير طبعا نتيجة المباراة و حالة اللعيبة و طريقة اللعب و الحكم..

الحاجات اللي فرستني بتحصل في كل مباراه في اي استاد في مصر تقريبا..
اول ما فرسني هو احد اتباع حبيب العادلي .. و اللي يظهرلك من خلال تعاملاتة مدى الذكاء الذي يتمتع به .. ليثبت ان قبول كلية الشرطة للطلاب الحاصلين على مجموع 50% شئ مقصود الى حد ما .. و لو استطاعوا ان يقللو الحد الادنى لفعلوا .. لانهم ليسو بحاجة لشخص يفكر اكثر من الذي ينفذ .

يقف طابور طوييييل .. و بطبيعة الشعب المصري سرعان ما يتكدس الوقوف و يتحول الطابو الى كتل بشرية باشكال مختلفة بدلا من الخط المستقيم .
و هنا يأتي دور رجل الأمن في تنظيم اللعبكة اللي حصلت دي .. و بمنتهى الذكاء الذي لم اراه من قبل ... يمسك بعصا و يهدد اول واحد واقف فـ الطابور انه لو موقفش عدل هينزل بالعصايه على دماغة ! ... مع العلم ان كل واحد ساند او بيزق اللي ادامة ... يعني اول واحد دا كل ذنبة انه الاول و كووووول اللي وراه ساندين عليه و هو وحده يقاوم.
و للأسف لم يفلح ذلك الشخص المسكين لتوصيل فكرة انه بيتزق من كل اللي وراه و ليس له يد في حركتة للامام .. لتصعد العصا لاعلى و تشوف شغلها بئا .
اما ان الظابط دا في قمة الغباء اللي فـ الدنيا ليظن ان الشخص الاولاني عاوز يزوغ ... او عايز يخليه عبرة للباقين .. او انه صاحب نظرة ضيقة اوي و لا يرى سوى ذلك الشخص امامه و يتجاهل البشر اللي وراه .

و اللي يفرسك برده اصرار الامن على عدم دخول اي مشروبات في زجاجات بلاستيكية او اي حاجة ممكن تتحدف من زجاجات المياه المعدنية و الغازية و الكانزات و خلافه... مع العلم انها تباع بداخل الاستاد .. بس الفرق انها باسعار سياحية يعني اضرب × 3... حتى عصيان الأعلام البلاستيكية بتتصادر .. يمكن خايفين لحد يخزق عين التاني جوا .. و بردو العلم بيتباع بالعصايا جوه المدرجات !!

و كمان عدم تشغيل ماكينات التذاكر الالكترونية و العوده لاسلوب الكمسري بقطع التذكرة و عدي .

و اللي فارسني اكتر الشخص الغريب اللي كان رافع اليافطة بتاعة الحملة الانتخابية للرئيس "الخضرا و فيها صورتة و مكتوب " نعم لمبارك " ! هو التعـ .. احم . اقصد الموالسة وصلت للإستاد كمان :@ و انا اقول الاهلي اتنحس من ايه بس و اليوم كان فقر كدا ليه

و كله كوووم و شماته الزمالكوية من التعادل كوم ..و باعتين للصفاقسي يخبره بمساندتهم له و الوقوف بجانبه و منتهى الوطينة الصراحة ..حقد و غل .
لكن سيظل الاهلي ببطولاتة و ارقامة و القابة العالمية سيد الاندية المصرية و العربية و الافريقية ...

الداخلية فين من دا كله !!

2006-10-26T07:50:00.000-07:00

طبعا كالغالبيه العظمى شفت و سمعت اللي بيحصل من حالات هياج و تعدي و هتك الاعراض فـ الشوارع ... خصوصا وسط البلد .. الوضع زفت خالص و يخلي الواحد مستاء .

و اعتقد اننا مش ممكن نسيب الحرامي او قتال القتلة و اللي سايب الحرامي يسرق و القتال يقتل و نروح نحاسب فالمجتمع الاول.. و نتجاهل دور اداه الردع اللي هي الداخلية .

ازاااااي يكون المواطن مش في مأمن و هو ماشي فـ شوارع بلده !!! فين اجهزة الامن اين رجال الفاشل حبيب الزفت ؟!!

اعتقد انه آن الاوان لإقاله هذا الفاشل ... ماذا يفعل غير التجاوزات و قمع المتظاهرين و هتك عرض الصحفيات و المتظاهرات و تعذيب للنشطاء السياسين .. دا حتى لم يفلح في التصدي او منع عمليات الإرهابية من تفجيرات دهب و طابا و الازهر و غيرها ... دا غير التضليل و التزوير و تلفيق القضايا كما حدث في قضية مذبحة بني مزار و انتهاكات

ابسط حقوق الانسان في اقسام الشرطة و المعاملات الغير آدمية .

حبيب العدلي فاشل في حماية امن مصر الداخلي ... اقيلووووه

يا عادلي و يا كل مسؤل امني ... لو كان هذا أمر عادي و لم يتم التصدي اليه ..فبهذا يكون الامر عادي جدا بالنسبة لك ان تسير في احد الشوارع و تعبث اصابع احد الهائجين بجسد و ملابس المدام بتاعة سيادتك او بنتك او اختك ..

جمال مبارك .. الشاب العادي جدا

2006-10-25T11:05:00.000-07:00

غلباااااان

و تتوالى علينا حلقات مسلسل تلميع جمال مبارك حلقة تلو الاخرى .. و احنا قاعدين ... كل ما عليك هو ان تتفرج وانت ساكت.

ممكن تنفس بكلمتين جوا نفسك ولا مع حد و لكن دون جدى ... فهو كالبلاء يهبط عليك و لا تعرف جايلك منين.

هذا الشاب المصري العادي جدا زي ما بيفهمونا .. الذي يتحرك صاعدا تجاه قمة السلطة بالأسنسير .. وصل حتى الآن لمنصب الأمين العام المساعد و أمين لجنة السياسات بالحزب الوطني و هو شاب عادي. و وصولة لهذه المناصب من اهم حلقات مسلسل التلميع ... فمن خلال تلك المناصب اصبحت كل كلمة تفط من فمه تنطلق لتأخد مكانها كعناوين و منشتات في الصفحات الرئيسية للصحف القومية و الموالسة صباح اليوم اللي بعده و في نشرات الاخبار في نشرات نفس اليوم .

هذا الشاب العادي جدا اللي فرصتة للرئاسة كفرصة اي شاب مصري .. من حق حقه ان يتحدث في ما يعنيه و ما لا يعنيه في نفس الوقت .

فلا تندهش من ذهابة ممثلا لمصر فالخارج ... فهو شاب عادي ... او ان يبدى رأيه و يفتي في علاقات مصر الخارجية .. او ان يقرر او ينفي دخول مصر عصر الطاقة النووية ... يتحدث عن مستقبل مصر في مشروع حساس جدا و دول العالم بتقطع بعض لمجرد ذكره في الحوار و هو وحده يقرر ان النووي داخل البلد ... لا تندهش.. اغلق فمك يا اخي ..فهو شاب عادي.

لا تسأل عن حكومة و مستشارين و وزراء و مجلس شعب ولا حاجة من دي فهناك جمال مبارك

شاب عادي جدا

و في احدى حلقات المسلسل و التي تهدف للتلميع الشخصي ... بس المره دي عن طريق جمعية جيل المستقبل .. ينزل للناس و بالقميص و البنطلون و يفطر مع الناس في منطقة العجوزة اللي وعدهم من قبل بالشقق السكنية .. و بالفعل قدمت جمعية جيل المستقبل عمارتين و لكن بعد هدم ما كانو يسكنون فيه على دماغهم ... و ما تصدق كاميرات التليفزيون و الصحافة لتنطلق كاميراتها و اقلامها لتكتب و تشدو بما فعل جمال مبارك . و تذكر كل ما هو مبهر و عاطفي و تتجاهل عدم حصول احدهم على وحدته و جحافل الامن و تعامل الشرطة غير الآدمي مع سكان المنطقة و كل ما حدث لهم من اضرار.

المهم ان الموضوع اتصور على انه نقله حضارية مهولة لا مثيل لها ولا يقوم بها سوى الابطال امثال جمال مبارك ... و وزير الاسكان طالع زي ما يكون ضيف شرف ولا عابر سبيل...اهو حاجة بيستباركو بيها ..امال هو بيعمل ايه ولا لزمتة ايه اصلا :@ ..

و يجي جيمي يقولك في حواره مع اهالي المنطقة ..: احنا مش جايين نبني عمارة و نمشي ... احنا جايين نقعد و نكمل .!

مش عارف الجملة معدتش كدا كمثيلتها من الجمل ... و فضلت تتردد فمخي مع صدى صوته و وشه محمر و طالعلة قرنين كدا ...

و معتقدش انه كان بيقولها على منطقة العجوزة .. يالهوي ... دا ناوي يقعد و هيكمل ! .. هيقعد و يكمل :-s

رمضان غريب -2

2006-10-18T07:36:00.000-07:00

افتكرت موقف كان فكرني بموقف افتكرته قبل كده .. و كلاهما اثبتولي ان مفيش فايده من المقاومة و ان القعدة بالبيت في رمضان تضمن الحفاظ على الصيام الى حد ما ...

نزولك الشارع يخليك تقابل العوامل المضادة للصيام من زحمة و اخوات فاضلات مش محتشمات و ناس قليلة الذوق ..اول ماتنزل تلاقي الارض منبتة بنى آدمين على الصفين ... واقفين متحفزين مستنيين اي وسيلة مواصلات .. تاكسي - اوتوبيس - ميكروباص - حنطور - كاراتة .... اول ما يظهر اي نوع من الوسائل .. يقومو يحاصروها ثم ينقضوا عليها و ياخدوا السواق أسير عشان يوصلهم عنوه ....

نيجي بئا للاخوات المستفزات ... تحس انهم بيتعمدوا يلبسوا كدا في رمضان ... تقريبا بيكونو عاوزين ياخدوا ثواب افطار صائم ... بس على طريقتهم بئه ..

الموقف اللي افتكرته لما افتكرت الموقف الاولاني كان فالمترو.. الاتنين على السلم .. واحد وانا طالع و التاني و انا نازل ..

مستعجل و و رايح الجامعة نزلت التحرير و رايح اغير لمترو الجيزة .. عمال امشي جاريا و اسحب و اضرب غرز ما بين الناس لغاية ما وصلت للسلم و نازل اهه ... الاقي الناس كلها نازلين و فيه نص دايرة خالية من البنى آدمين محدش متواجد فيها خالص ... قولت اشطة ..اتخللها و اتخطى الفوج دا كله بخطوه واحده ... يادوبك دخلت جوا محيط النص دايره دي لاجد ان مركز هذه النص دايرة انثى !! بس مش اي انثى.. طبعا لقيت نفسي الوحيد جوا المنطقة المهجورة دي الكل بيبص عليك بئا و الموقف كان مش لذيذ خالص ..

تنحيت جانبا حفاظا على صيامي و على الامن العام... و كل شوية تلاقي واحد مستعجل غيري يقع فنفس النص دايرة التي اشك في وجودها لولا شهر رمضان الله يكرمة...

في نفس ذات السلم بس طالع المرة دي بئا فأمان الله تلاقي خير الله ما اجعله خير حاجة بتلمع قدامك ... تبص غصب عنك طبعا تلاقي زخارف اسلامية رائعة بالترتر بئه و أوعى .... تصاحبة حالة من الاندهاش مع فتح البؤ ... لأن الزخارف الرائعة دي موضوعة في مكان استراتيجي ... أعلى الجيب الوراني .... طب الواحد يعمل ايه ... بص فالارض .. بصيت فالارض ... بردو تسمع اصوات لازم تبص عشان تشوف فية ايه .... اخ و بعض الاخوات على ما يبدوا انهم على ديانة اخرى غير الإسلام ... واقفين يهرجوا و هاتك يا ضحك -ضحك مش من العادي دا لأ ... من بتاع التليفزيون - ... انا لقيت حاجة افتكرتها فالاول زعافة .... طلعت شعر الاخت عماله تهرج مع الاخ و يلعبلها فشعرها ... و الواحد واقف عمال يحرق في دمة ... طب نديهم ضهرنا و نرفع الاريال !... الاصوات هتستفذنا ... ايه العمل!

هي القعدة فالبيت .. بلا تعليم بلا اسمه ايه د

كان الله في عون الملك اللي على ايدي الشمال ..

و شياطين ايه دي يا خويا اللي محبوسة ... الواحد ولا حاسس بيهم .. بيهم من غيرهم هي هي نفس كل حاجة بتيجي و تروح ... عالاقل و هما موجودين عاملين منظر كدا و بيونسونا .. واهو نتحجج بيهم

مدونة فساكونيا تتمنى لكم صوما مقبول و افطار شهيا اوي .. و افتكرونا بحاجه ;)

2006-10-08T05:05:00.000-07:00

هل شهر رمضان و مظاهر الشهر الكريم هلت معاه زي كل سنه ... و ان شاء الله يكون شهر خير علينا جميعا و نستفاد منه خير استفادة ..

و كل عام و انتم بالف خير لكل المدونين و لكل معارفي .

و يا ريت كلنا نعرف نستغل رمضان صح و اننا نغير من انفسنا و نتقرب الى الله تعالى .

ولا تنسونا بالدعاء

رمضان غريب

2006-10-08T04:31:00.000-07:00

السنة الماضية اللي هي اللي فاتت يعني .. كان فيها رمضان برده اظن تقريبا.. و كتبت عن حبه مظاهر قد تكون ثوابت بتحصل في رمضان .. بس ساعتها مكنش فيه بلوج ..

المهم نفس ما حدث بالأمس يحدث اليوم .زي مثلا ...

أول ما الراجل اللي فالتليفزيون قال ان رمضان بكرة .... رغم ان الناس المفروض شبه عارفة يعني .. الا و تلاقي حركة كده و انتشار ... و هب مرة واحدة بتوع الفول بئو بالضرب و اللي رايح يجيب زبادي .... تحس انهم صحيوا مرة واحدة ... و القهاوي بقدرة قادر مرصوصة لنص الشارع و الناس امم عليها ... زي ميكون الراجل اللي جه فالتليفزيون قال الليلة خمر و نساء مش الليلة المتممة لشهر شعبان و بكرة رمضان !!

الصبح بئه تاني يوم تلاقي الناس ربعهم مقلضم و الربع التاني قرفان و حبة مندهشين << دول من قبل رمضان على كده .. و تلاقي نسبة المحجبات ارتفعت .. مش لازم حجاب على ايه .. متدققش يا سيدي رمضان كريم .. فالمواصلات الناس اكترهم ماسكين مصاحف و عمالين يقروا ربنا يهديهم ... و اللي مش ماسك مصحف تلاقية دافس وشة فجرنان ..في نسبة من بتوع الجرانين دول عشان يعملوا عبط لو حد عاوز يقعد .و قت خروج المدارس و الشركات ده بيكون ملوش حل ... تلت تربعهم بيفطروا على بعض خناقات و مشادات و اوعى ايدك يا كابتن و أي رجلي يا جدع و كده يعني لحد ميوصلوا بالسلامة ولا حتى من غيرها للبيت .

بالليل بئه -عمار يا مصر- تلاقي كل حاجة مليانة قهاوي مليانة على آخرها و الجوامع مليانة على آخرها .. و تلاقي الشيوخ في الجوامع هيشدوا فشعرهم ... طب يا جدعان ما رب رمضان هو هو رب باقي الشهور .. ولا هي الصلاة فرمضان بحسنات زيادة ! يلا ربنا يهدينا و يهديهم و نكمل كده لبعد رمضان .المهم ان بعد رمضان بيكون العيد ... و اللي مسافر و اللي لسة مصحيش و اللي مش عارف بيعمل ايه .. و بترجع الجوامع زي ماكانت ... و تبقى القهاوي على ما هي عليه .

دا غير بئا ثوابت المصريين ... اللي ابتديت اشوفها فاعلانات الخليجين زي ماتكون بتاعتهم :@

كل من الفوانيس و الكنافة و القطايف و الفوازير و الكاميرا الخفية و الف ليلة و ليلة حاجات مرتبطة برمضان .. انما ليه .. متعرفش!.

طب ممكن الفانوس مرتبط برمضان من ايام الفاطميين ... لما خرج اهالي القاهرة لاستقبال المعز لدين الله الفاطمي بالليل -بس مش عارف كانو بيقولو وحوي يا و حوي ولا لأ !! - و بعد كده تحول من وسيلة للإنارة ليلا لوسيلة ترفيهية حيث كان يرافق الاطفال المسحراتي بالفوانيس ليلا و تحول لعادة بعد كده .

و الكنافة لما مش عارف والي مين ولا سلطان عاوز حاجة تقعد فالمعدة كتير عشان بيجوع بسرعة و الصيام بيتعبة فنصحوة بالكنافة ..... و اهي القطايف بنشتريها من عند نفس الراجل .إنما الفوازير ... تبع مين بالظبط ولا اصلها ايه ؟!!! نيلي و عمو فؤاد ؟! و ايه اللي خلاها شئ مقدس من حياة العرب و المصريين خلال شهر رمضان ... لأ و المضحك المبكي التطور اللي حصل فيها ... يعني مش كفاية انها فوازير و لأ دلوقتي بقت الجوايز السفر عشان تقدي اسبوع فين ؟؟!!! في باريس .. بعد ما كانت الجوايز حج و عمرة اصبح الواحد بيقعد فرمضان و هو صايم يحل فوازير عشان يروح الشانزليزية و يمتع عنية .. و المصيبة السنه دي فوازير فيها دينا ... احيه عليا .. دينا فرمضان !

.و كانت الكاميرا الخفية ... عمالة تتلون و تتنكر في برامج مختلفة .. عشان يشد منك ضحكاية ولا نص ابتسامة على موقف سخيف ... و بهدلة لمواطن محترم او غلبان و محترم برضو .استفذني جدا برنامج بيتسأل فية المواطن العادي عن حاجات ليس على اي دراية بها ... لما يسأل فلاح و باين من ملابسة و شكلة ..يسألة عن نظام P O T ... ولا يعني ايه عولمة ...- أكيد مش هتكون ان فيفي عبدو تنزل الانتخابات البرلمانية الجاية - يعني بهدلة المواطن المصري بتزغزغ البني آدمين !! بس السنه دي اتلموا شويه عن السنه اللي فاتت..

..و كمية الاستظراف اللي في برامج ملهاش اي لزمة غير انها بتقلل من شأن سواء الفن او الاعلام المصري.و مسلسلات كتييييييييير .. و الف ليلة و ليلة دي كانت اساسي و اختفت دلوقتي و حل مكانها المسلسلات الدينية... هما اصلا بيجيبو اي حاجة فيها والي و سلطان و جلاليب و يبقى مسلسل ديني و اقلبة فرمضان .

رمضان كريم

هو في ايه !

2006-10-08T03:22:00.000-07:00

تكون قاعد فأمان الله يا جدع مستني الأستاذ ولا الدكتور اللي جاي و تسمع و تشوف العجب ناس داخلة و ناس طالعة ممكن مش من الجامعه اساسا .. بس اهو داخل يتفرج ... اللي يتكلم و يقوله بؤين و يمشي زي بتاع حكاية الفيل دا ... بس عادة هم اللي بيدخلوا كل مره .. فا وانت قاعد كدا هوب تلاقيهم دخلوا ... و تبدأ قصيده كل يوم

يرمي احدهم السلام ... السلام عليكم و رحمة الله - يرد البعض التحية- .... يتكرر النداء ( السلام عليكم ورحمة الله و بركاتة) محدش يرد المرادي .. يبتدو بئا و محدش عارف هما عايزين ايه بالظبط ! فينده احدهم.." يقول الله تعالى "و اذا قرأ القرأن فاستمعوا له و انصتوا لعلكم ترحمون" كل هذا وسط ضجيج المدرج .. و ما ادراك بضجيج مدرجات كلية التجارة ...اللي بتهزر مع دا و اللي بيشد شعر دي و اللي بيسمع اللي جنبه اغنيه مش عارف مين كدا و اللي بيلعبوا صلح ورا و شغلانه ... فوسط كل دا يتأهب احدهم و يفتح المصحف و يبدأ بصوت يكاد يكون مسموع للمحيطين في دائرة قطرها من 1:2 متر يكون هو مركزها و يبدأ

.. اعوذ بالله من الشيطان الرجيم .. و يسكت شويه و ينظر حوله ليرى من المناظر ما ذكرته اعلاه .. و يعيد الاستعاذة مره اخرى.. يقل الضجيج بعض الشي فيستعيذ زميل له مرة اخرى برده في مكان آخر فالمدرج برده .. و في كل مره يقل الضجيج بعض الشئ . فيعيدها ببسملة مرة دون تلاوة آيات .. و هنا تكون النقطة الفاصلة .. فكل من التفت اليهم لم يجد شئ غير اصوات متفرقه من المدرج عمالين يبسملوا و يستعيذوا ... فيعود الضجيج لمستواه الاصلي و ربما اعلى ... هب شوية و يمشوا!

قبل كل محاضرة تقريبا بيحصل كدا... و محدش عارف ليه .. هل هو غصب ؟ام يعتبرونه جهاد مثلا...

ولكن احيانا ينجحون في تلاوه آيات من القرآن فيدخلون المدرج و يبدأون بالصياح و هنا و على طريقة اللي يحب النبي يصقف .. يقفون من في المدرج من طلاب مسلمين على مسحيين و الطلاب المسحيين البعض يقف احتراما او يقف باسلوب لما نشوف آخرتها .. و الآخر ينفض و يفضل قاعد و يهزر..طبعا و القرآن بيقرأ ..فهو غير مجبر و من فعل هذا الوضع المحرج كام طالب لا اعرف ما سبب اصرارهم على ذلك قبل كل محاضرة ...

اعتقد ممكن بيعملوا كدا كإعلان عن نفسهم و تواجدهم ...بس كفاية اوي ان فكل حته تلاقي اسرة تبعهم و ملصقاتهم مغرقة الجامعة .. وانت ماشي تلاقي مقر طلاب الاخوان المسلمين .. ايه المطلوب تاني .

لكن الموقف دا انا شايف انه بيكون محرج جدا .. دانت بتقعد تقرأ قرآن و لا حد سائل فيك ..طيب و ليه الاحراج دا .. و بعدين هو اصلا مش مكانه ! .

نتائج المؤتمر السنوي

2006-09-21T17:12:00.000-07:00

و قد اكد بسلامتة ان العام القادم يدينا و يديكو و يدليه طولة العمر سيكون عام التلصيمات الدستورية .. و دعا الحكومة للاسراع فبرنامج الخصخصة و بيع البلد عشان نلحق نخلص .. و انه يحرسه من العين سيمضي انه يدخل الطاقة النووية السلمية البلد دون تردد اي كان ما سينتهي الحوار حوله ... مع انه هو نفس الرئيس اللي فركشها منذ عده سنوات بدون تردد برده. .
كما اكد سيادتة ان العام الماضي كان ابن حلال و شهد حاجات بنت حلال اوي مثل مبادرة -لامؤاخذه يعني- المنوفية و ترقيع المادة 76 و خوض انتخابات رئاسية عجبت الكل و خوض الحزب للانتخابات البرلمانية و التي اكدت امتلاكة لقاعدة - حمرا- و كبيرة.
و كل دا ثمرة مجهودات شاقة و متعبة جدا عمالين نعمل فيها من 25 سنة كدا
و اكد اهتمامة بالاصلاح و رعاية الاسر الفقيرة و محدودي الدخل و الكلام اللي من 20 سنة دا و طرح مذيد من الارقام التي لا اساس لمعظمها من الصحة و الباقي قريب للصحة و مع بعض التناقدات .

احنا أصحابها .. مش هنسيبها

2006-09-13T07:40:00.000-07:00

يعقد الحزب الوطني يوم الاثنين القادم المؤتمر السنوي .. و له كل الحق طبعا كحزب في ذلك .. و لكن ليس له الحق ان يكون له الرأي الأوحد و اليد العليا في جميع قرارات البلد .ولا ايضا في مناقشة التعديلات الدستورية و التي طبعا ستعدل على الأهواء لتكون خطوة لتسهيل عملية التوريث كما حدث في تعديل المادة 76 و تجاهل جميع الاعتراضات و الملاحظات ... فليكن لنا وقفة.

تدعو الحركة المصرية من أجل التغيير (كفاية)إلى إعتصام في ميدان التحرير وذلك ردا علي عقد الحزب الوطني مؤتمره العام الذي سيناقش فيه ويقر التعديلات المزمع إجرائها في الدستور المصري على رغم من رفض حركات المعارضة والأحزاب المصرية لتلك التعديلات وذلك يوم الإثنين 18\9\ 2006 الساعة السادسة مساءًا

**************************************************

من مواطن بسيط عادي، سحقه الفقر، وأرقه الظلم، وقهره الاستبداد، يؤمن بأنه لا خلاص من الظلم إلا بالتكتل والمواجهة، ولا قيمة لمواجهة فردية، والقيمة في الجموع، ففي المجموع احتماء، وقدرة على مواصلة النضال.
من أجل ذلك أحتمي بكم، وأدعوكم لمظاهرة في مواجهة نظام مبارك الفاسد تبدأ من الساعة السادسة مساء الاثنين 18/ 9/ 2006 بميدان التحرير وسيعقبها لمن يريد اعتصام في خيام في حديقة الحرية (الحديقة المدورة) بميدان التحرير

نص دعوه دكتور يحي القزاز

يا شورتاتك يا نظيف

2006-09-09T13:42:00.000-07:00

فالمنتزة بسكندرية ... ماشيين كدا و شفتلك واحد كدا ماشي و حوالية البودي جاردات بتوعة و المرسيدس السودا ماشية وراه و جنبة واحده كدا. الغريب انها مش طويلة و ... ولا بلاش لحسن تطلع الحاجة ولا المودام ... المهم طلع مييييييين .. احمد نظيف .. و لابس الشورت بئا و تيشيرت و اوعى, بس الطول مع الشورت و السيقان العارية كان يجنن .. بس راجل شيك اوي الصراحة . كان نفسي اجري علية وافكرة بالشعب و اقولة اتقوا الله .. دا الشورت اللي انت لابسة دا من فلوسنا ..اعمل بالشورت يا اخي ... كفاية سرقة و نهب و اهمال ...الله -متنرفز بئا و كدا-.

ولا حتى اروح اتصور معاه حتى :D بس محدش يضمن مصيرة بعد حاجة زي دي .

بئا مصر فيها اللي فية دا كلة و ليك نفس تتفسح !

المريخ معاك ياسطى!

2006-09-09T12:49:00.000-07:00

ناس تروح المريخ و ترجع بالسلامة و ناس تروح قليوب و مترجعش ولا داعي لذكر السلامة و كلة بأمره.
في خبر كدا من فترة عن السياحة الفضائية كاتبين ان انوشة انصاري الامريكية من اصل ايراني هتكون اول واحده لا مؤاخذة يعني سايحة و تتفسح فالفضاء وبتاع ... و رابع حد يجرب موضوع السياحة الفضائية كدا بعد المقاول الامريكي دنيس تيتو اول سائح فضاء في العالم ابريل - 2001. وبعدية الجنوب افريقي مارك شوتلورث ابريل 2002 ثم الامريكي جريج اولسين اكتوبر -2005 .. و هتتبعهم ست انوشة فـ 14 سبتمبر 2006 الجاي دا يعني.
و الرحلة دي بتتكلف حوالي 20 مليون دولار و دا اللي يخلي الواحد ميستغربش من رجوعهم من غير ولا خدش و كلة بامرة بردة ... انما عشرة ايام يتدفع فيهم 20 مليون دولار !! مش كتير شوية !
دا عندنا فمصر بيقطعوا بعض عشان يدبرو كام مية جنية عشان يروحو المصيف ولا يتفسحوا .. و القطر يولع بيهم و لا السفينة تغرق ولا الاتوبيس ولا الميكروباص يتقلب و جايز كمان قبل ما يوصلوا .. اللهم لا اعتراض يعني... و عادي بئا ما في كتير منهم.
بس اللي يدفع 20 مليون دولار فخروجة .. يبئى معاه كام يا ترا!! دا مش حسد ولا حاجة .. دا أر.
مش عارف ايه شعور ثنية و عبد التواب لما بيشوفو الاخبار دي .. مش عارف مين ثنية و عبد التواب ... بس اكيد عبد التواب دا موظف يعني .. اكيد هيقولها .. شايفة الحريم يا ولية رايحة تتفسح 10 ايام ...و بـ20 مليون دولار(مش متاكد هيذكر موضوع الفلوس دا لا لأ )... مش انت .. مش فالحة غير عايزة ازور امي و هات فلوس ... طبعا ثنية هتتذكر الذكريات الجميلةو دمعتها على خدودها .. لما كانت بتشد حلة المحشي و يروحو يقعدو فالجونينة .
انما بمناسبة ان أنوشة اول حرمة تتفسح فالفضاء ... مش كان واجب تاخد معاها جوزها بردة .. صباح البيعة يعني:( ... و لو مش متجوزة تاخد محرم و تقطعلة مرافق.
و بمناسبة انها امريكية من اصل ايراني يعني احتمال كبير تكون مسلمة ... هتعرف منين القبلة !! ولا مواقيت الصلا بتوقيت المريخ ولا الزهرة! و هتتوضى ازاي من الحاجات اللي ربساها ... لا يا عم دي حوسة .. انا مش رايح .. بيقولو يمكن فترة كدا و السفر -برا خالص- يرخص يبئى 19 - 18 مليون كدا... اهو ساعتها الواحد ممكن يفكر.
تخيلوا الموضوع دا لو وصل عندنا فمصر ...اكيد مش هيحصل قبل سنة 3752 ويوم ما يكونو بيحتفلوا بالثورة بئا يروحو مطلعين اتوبيس و لا اتوبيسين القمر و اكيد هيخبطلة فقمر صناعي ولا نيزك معدي و يتقلب ... ماهو الفقر ورانا و رانا

دستور دولة فساكونيا.. أضحك و ألطم و عيط و زغرت

2006-08-24T17:51:00.000-07:00

طلبت مع الواحد فيوم كدا يشوف ايه الدستور دا ! البتاع دا اللي ممشي الدولة ... و يارتني ما شفتة .. هو دا اللي عمالين يرقعوا فيه و يتناقشوا ساعات لتعديل كلمة فالمادة الفلانية إاللي فالباب العلاني اللي بتنص على هرتلة ولا ليها معنى ... للأسف حاجة ملهاش اي لزمة طول ما فيه طوارئ .. و بما ان الطوارئ متشالتش ربع ساعة من 25 سنة كدا ... يبقى احنا فحته فالعالم بتتحكم بالمزاج العالي

خشي كدا عاللي بيسموه آآل ايه دستور و أول القصيدة كفر

الباب الأول

المادة (1)
جمهورية مصر العربية دولة نظامها اشتراكى ديمقراطى يقوم على تحالف قوى الشعب العاملة.
والشعب المصرى جزء من الأمة العربية يعمل على تحقيق وحدتها الشاملة.

طبعا اشتراكي ديمقراطي فحت ... طبعا الاشتراكية باينة جدا خصوصا فالفترة الاخيرة من بيع للقطاع العام حتى مجمع التحرير ... و قريبا تأجير الأهرامات و معبد فيلة قانون جديد و على رأي واحد صاحبنا هي لا إشتراكية ولا رأس مالية ... هما بيقولو فتحية العلم جمهورية مصر العربية!.و اظن مش محتاج اوضح ازاي هو ديمقراطي .. دا حتى بيحكمنا الحزب الوطني الديمقراطي و رئيسنا الديمقراطي اللي نجح فالانتخابات الديمقراطية اللي كانت نزيهه و شفافة و محزئة و قصيرة .و طبعا زي ما بيقولنا الدستور ان الشعب جزء من الامة العربية .. الامة العربية يا عم ... الأمة العربية اللي طلع اكبر 3 زعماء فيها متنرفزين و محموقين للي بيحصل في لبنان و فلسطين و طالبوا فورا .... بالافراج عن الأسرى الإسرائليليين المساكين.. و يحملوا حزب الله المسؤلية .. طبعا عندهم حق !!حد يصحي حد فوقت زي دا؟!

المادة (2)
الاسلام دين الدولة، واللغة العربية لغتها الرسمية، ومبادئ الشريعة الاسلامية المصدر الرئيسى للتشريع.

طبعا ... و الدليل اعقال المصليين فالجوامع و آلاف الإخوان المسليمن و تهميش التربية الاسلامية من المناهج التعليمية ... لدرجة ان مذيعة القناة الخامسة لم تستطع الاستمرار في وظيفتها بالحجاب غير بحكم من المحكمة و الامثلة كتييير.و موضوع مبادئ التشريع الاسلامية المصدر الرئيسي ..اعتقد ان دي لمجرد وضع هيبة لتلك الفقرات الكوميدية اللي بيسموها دستور .. يشعرك بقدسيتة و بتاع و كدا ... تماحيك يعني.

المادة (4)
الأساس الاقتصادى لجمهورية مصر العربية هو النظام الاشتراكى الديمقراطى القائم على الكفاية والعدل، بما يحول دون الاستغلال ويؤدى إلى تقريب الفوارق بين الدخول، ويحمى الكسب المشروع، ويكفل عدالة توزيع الأعباء والتكاليف العامة.

المادة دي اعتقد انهم نسيوا .. و الله اعلم بقصد ولا سهو .. بعض الكلمات و حروف الجر و خلافة .. يعني مثلا"و يحمي الكسب المشروع" هنا نسيوا "غير" و يحمي الكسب الغير مشروع << كدا صح...يمكن فضلوا استخدام المتضادات كنوع من الجمال اللغوي و لفت الانتباه و تحريك الذهن و حاجات النصوص بتاعة ثانوي دي لما كان قاعد بيكم الصخرة و يشكلها ... ما علينا ما علينا.

المادة (5)
يقوم النظام السياسى فى جمهورية مصر العربية على أساس تعدد الأحزاب وذلك فى اطار المقومات والمبادئ الأساسية للمجتمع المصرى المنصوص عليها فى الدستور.
وينظم القانون الأحزاب السياسية.

هأو حلوه دي :D ... يا نسيوا يذكروا او بيستعبطوا ..-او يمكن مذكورة في احدى المواد الاخرى او المعدلة- ... ان زي ما النظام قام على تعدد الاحزاب ... قام على بعضة و اتنفض لما اتعددوا و اخذ على عاتقة تفكيكها بردو و الأمثلة متعدش :)

الباب الثاني الفصل الثاني.
المادة (23)
ينظم الاقتصاد القومى وفقا لخطة تنمية شاملة تكفل زيادة الدخل القومى، وعدالة التوزيع، ورفع مستوى المعيشة، والقضاء على البطالة، وزيادة فرص العمل، وربط الأجر بالانتاج، وضمان حد أدنى للأجور، ووضع حد أعلى يكفل تقريب الفروق بين الدخول.

هه ؟!! الكلام دا فين ؟!و هو فين الإنتاج دا اللي هيربطوا فية لامؤاخذه الأجر ؟!!

الباب التالت
المادة (41)
الحرية الشخصية حق طبيعى وهى مصونة لا تمس، وفيما عدا حالة التلبس لا يجوز القبض على أحد أو تفتيشه أو حبسه أو تقييد حريته بأى قيد أو منعه من التنقل الا بأمر تستلزمه ضرورة التحقيق وصيانة أمن المجتمع، ويصدر هذا الأمر من القاضى المختص أو النيابة العامة، وذلك وفقا لأحكام القانون.
ويحدد القانون مدة الحبس الاحتياطى.

الله يمسي بالخير كل اللي اتشدوا في اعتصام نادي القضاة ... و كل المعتقلين عمواما

المادة (42)
كل مواطن يقبض عليه أو يحبس أو تقيد حريته بأى قيد تجب معاملته بما يحفظ عليه كرامة الانسان، ولا يجوز ايذاؤه بدنيا أو معنويا، كما لا يجوز حجزه أو حبسه فى غير الأماكن الخاضعة للقوانين الصادرة بتنظيم السجون.
وكل قول يثبت أنه صدر من مواطن تحت وطأة شئ مما تقدم أو التهديد بشئ منه يهدر ولا يعول عليه.

هييييييييه دنيا ... فين الشرقاوي و كريم و لا عبير العسكري

المادة (44)
للمساكن حرمة فلا يجوز دخولها ولا تفتيشها الا بأمر قضائى مسبب وفقا لأحكام القانون.

دا ساعة اعتقال احد الاخوان بالاسكندرية ..

تعبوا نفسهم عالفاضي الجماعة بتوع الدستور دول

المادة (47)
حرية الرأى مكفولة، ولكل انسان التعبير عن رأيه ونشره بالقول أو الكتابة أو التصوير أو غير ذلك من وسائل التعبير فى حدود القانون، والنقد الذاتى والنقد البناء ضمان لسلامة البناء الوطني.

بيقولك "لكل انسان" يبقى أكيد احنا مش انسان ولا ابراهيم عيسى و لا وائل الابراشي انسان ولا حد انسان خالص يعني .. او مبيحافظوش عالضمان بتاع البناء الوطني لسلامة المارة !!

المادة (48)
حرية الصحافة والطباعة والنشر ووسائل الاعلام مكفولة، والرقابة على الصحف محظورة وانذارها أو وقفها أو الغاؤها بالطريق الادارى محظور، ويجوز استثناء فى حالة اعلان الطوارئ أو زمن الحرب أن يفرض على الصحف والمطبوعات ووسائل الاعلام رقابة محددة فى الأمور التى تتصل بالسلامة العامة أو أغراض الأمن القومى، وذلك كله وفقا للقانون.

اهه حط فيها طوارئ و امن قومي و الامور اللي تتصل بالسلامة يا قلبي .. احم .. العامة.

و البس بئا

المادة (57)
كل اعتداء على الحرية الشخصية أو حرمة الحياة الخاصة للمواطنين وغيرها من الحقوق والحريات العامة التى يكفلها الدستور والقانون جريمة لا تسقط الدعوى الجنائية ولا المدنية الناشئة عنها بالتقادم، وتكفل الدولة تعويضا عادلا لمن وقع عليه الاعتداء.

المادة دي بترفعلي الضغط

طبعا فيه مواد تانية كتير مسخرة و اكثرها شللاً المادة المعدلة 76 " مادة جمال مبارك " ... و اللي طالبة معاه تهييس يقرا الدستور -الدستور الدستور مش الجريدة-... دا كاتبة عالم دماغها عالية فحت .

يا ريت وانت بتقراه تكون لواحدك .. لأن فيه مواد بتستدعي الفاظ معينة او اصوات مش

طبيعية ..

من الآخر كدا ... الدستور دا لازم يتغير ... مينفعش الترقيع دا .. من اول النظام الاقتصادي اللي اتغير 180 امام جيمي و رجالة .. لغاية الحريات و الحقوق كلها تمشي لاي دولة غير دولتنا ... مفيش غير صلاحياتة اسم الله علية هي اللي زي اللفل فالموضوع .. و مفيش دولة محترمة يكون 80% او اكتر من الصلاحيات فيد راجل واحد داخل على مرحلة الشيخوخة.

سيبك من كل دا و خش عالكلام الجد اللي ينقط ...

دوس هنا جامد كدا

و هنا بالمرة

و دي كمان

و الله يرحم شعب مصر و المعارضة الراضية بفتات الديموقراطية... احنا السبب فاللي بيجرالنا

انتصار ام اشتغالة كالمعتاد

2006-08-19T05:29:00.000-07:00

اتكلم الكتير عن انتصارات حزب الله و اقيمت احتفالات الانتصار و اغاني الانتصار ...

و لكن هل حقا انتصار حزب الله انتصار ؟؟

هو انتصار غير منتصر .. او صمود بطعم الانتصار .. ما جعلة انتصار تخاذل العرب... فكل حاكم عربي يقف موقف المشاهد و حاطت ايده فـ... جيبة ولا كأن لبنان دولة عربية ..- حجج واهية ظهرت زي الدفاع عن تراب الوطن دي- .. ايضا الصمود امام دولة تدعي ان جيشها لا يقهر... فلم يستطيع قهر ميلشيات.

و لكن لننظر و نقارن بين آلاف الضحايا اللبنايين و موتى اسرائيل ... بين تدمير كلى للبنية التحتية اللبنانية و هدم كام منزل باسرائيل .

لم تستطيع اسرائيل ردع المقاومة وقف اطلاق الصواريخ .. رغم ان موضوع الصواريخ شئ عادي و لكنة كان غير متوقع بهذا الكم من حزب الله .. فاي دولة عندها كرامة من دول الجوار ارادت الرد تستطيع الوصول للعمق الاسرائيلي و بسهولة... ما يحسب لها تفوقها فالمواجهات و لم تحصل اسرائيل على الجنديين و دي نقط تحسب لحزب الله ... و لكن قامت اسرائيل بالتوغل فالجنوب و لم تسلم اسير لبناني واحد من آلاف الاسرى.

اي ان لو تكلمنا عن انتصار سيكون لصمود المقاومة امام جيش محمي من امريكا و مدعوم من العرب .

قد يكون كلامي تكسير مأآديف الفرحانين بالنصر و انا منهم طبعا... و لكن عند النظر للخسائر الفادحة يجب ان نقف لحظة ... و من الممكن ان تكون الاحتفاليات بالانتصار لرفع اروح المعنوية ليس إلا... وقف اطلاق النار يجعلنا نقف لحظة لنفكر .انتصار حقيقي ام اشتغالة كالعادة في الحروب العربية من تهويل اعلامي و خلافة . ..

و لكن على اي حال ... فما حدث احرج اسرائيل احراج شديد و صمود المقاومة انتصارا

و مبروك علينا نصر الله.